Düýn Türkmenistanyň Saparmyrat Türkmenbaşy adyndaky Şekillendiriş sungaty muzeýinde şu muzeýiň fondunda saklanýan eserleriň sergisi açyldy. Iki bölümden ybarat bolan bu sergi milli senenamadaky belli senelere - Milli matam gününe hem-de Türkmenistanyň Garaşsyzlygynyň 16 ýyllygyna bagyşlanýar.

Umuman sergide ýurdumyzyň tanymal suratkeşleriniň we heýkeltaraşlarynyň dürli ýyllarda döreden we muzeýiň fondunda saklanýan eserleri görkezildi. Birinji ekspozisiýada ýer ýüzündäki pajygaly wakalaryň birini - 1948-nji ýylda Aşgabatdaky ýer titremäni başyndan geçiren türkmen halkynyň mertligini we gahrymançylygyny beýan edýän eserler ýerleşdirilipdir. Bu ýerde suratlar bilen birlikde S.Artykmämmedowyň «Zemin nalasy», M.Nuryýewiň «Ýer titreme» we beýleki özboluşly, kiçeňräk heýkellerini görmek bolýar. Eserleriň ählisinde türkmen halkynyň özboluşly däp-dessurlary, onuň durnuklylygy we zähmetsöýerligi täsirli beýan edilipdir. Hut şu häsiýetler weýran bolan şäheri täzeden dikeldip, Garaşsyzlyk zamanasynda ak mermerli paýtagta öwürmäge mümkinçilik berdi, paýtagtyň häzirki ajaýyp keşbi çeper suratlarda şekillendirilipdir.

Serginiň ikinji bölümi Ýylgynly depäniň çäginde ýüze çykarylan hem-de biziň eýýamymyzdan öňki IV müňýyllygyň ikinji çärýegine degişli taryhy eksponatlar ýerleşdirilipdir. Muzeýiň sergi ekspozisiýasyndaky eksponatlaryň arasynda zenanlaryň toýundan edilen heýkeljikleri, ownuk daşdan edilen heýkelleriň haýran galdyryjy nusgalary, nagyşlanan daş gaplar, Ýylgynlydaky ybadathanalaryň diwarlaryndan gadymy nagyşlar, bürünçden we süňkden edilen ýaraglar, daş monjuklary we beýlekiler bar.
Serginiň açylyş dabarasyna türkmen jemgyýetçiliginiň wekilleri bilen birlikde «Türkmenistan: Altyn asyryň muzeýleri» atly Halkara ylmy maslahata ýygnananlar hem gatnaşdylar.