Gurbanguly Berdimuhamedow sammitiň kuluarlarynda bu ýere gelen Prezidentler bilen duşuşdy. Russiýa Federasiýasynyň Prezidenti Wladimir Putin bilen duşuşygyň barşynda ikitaraplaýyn hyzmatdaşlygyň wajyp meseleleri boýunça pikir alşyldy. Ikitaraplaýyn hyzmatdaşlygyň käbir jähetleri boýunça Gyrgyzystanyň Prezidenti Kurmanbek Bakiýew, Belarusyň Prezidenti Aleksandr Lukaşenko, Gazagystanyň Prezidenti Nursultan Nazarbaýew, Özbegistanyň Prezidenti Islam Karimow, Azerbaýjanyň Prezidenti Ilham Aliýew, Gruziýanyň Prezidenti Mihail Saakaşwili, Ermenistanyň Prezidenti Robert Koçarýan we Moldowanyň Prezidenti Wladimir Woronin bilen gysgaça söhbetdeşlikler boldy. Gepleşikleriň barşynda döwletara hyzmatdaşlygy çuňlaşdyrmaga özara gyzyklanma bildirildi.

«Somon» Köşgüniň Dabaralar zalynda uly bolmadyk düzümde başlanan GDA döwletleriniň baştutanlarynyň Geňeşiniň mejlisiniň barşynda döwlet baştutanlary sammitiň gün tertibini we onuň işiniň reglamentini tassykladylar. Soňra duşuşyk «Gümmezli zalda» giňişleýin düzümde dowam etdirildi.
GDA-nyň sammitinde, hususan-da, Arkalaşygy mundan beýläk hem ösdürmegiň konsepsiýasyny işläp taýýarlamaga we ykdysady hem-de gumanitar ugurlarda hyzmatdaşlygy berkitmäge degişli meseleleriň 20-ä golaýy, şeýle hem guramaçylyk meseleleriniň birnäçesi girizildi. Şeýle hem sammitiň dowamynda köpçülikleýin howpsuzlyk, jenaýatçylyga we terrorçylyga garşy göreş, migrasiýa sferasynda hyzmatdaşlyk we GDA-nyň çäklerinde düzgün-tertip meselelerine aýratyn orun berildi.
Mejlisiň jemleri boýunça degişli resminamalaryň ençemesi, hususan-da, GDA-ny mundan beýlägem ösdürmegiň Konsepsiýasy goldanyldy we ony durmuşa geçirmegiň esasy çäreleriniň Meýilnamasy kabul edildi. Mejlise gatnaşyjylar şu duşuşygyň üstünlikli geçendigini biragyzdan bellediler we GDA-nyň indiki sammitiniň 2008-nji ýylyň Ruhnama aýynda Bişkekde geçirilmegi barada ylalaşdylar.

Türkmenistanyň Garaşsyz Döwletleriň Arkalaşygynyň ozalkysy ýaly, assosirlenen agzasy bolup durýandygyny ýatladýarys. Türkmenistanyň ilkinji Prezidenti Beýik Saparmyrat Türkmenbaşynyň ýurdumyzyň hemişelik Bitaraplyk derejesinden gelip çykýan halkara borçlaryna esaslanan bu başlangyjy 2005-nji ýylyň Alp Arslan aýynda Kazanda bolan GDA ýurtlarynyň sammitinde Arkalaşygyň döwlet baştutanlary tarapyndan doly goldanyldy we degişli resminamalarda berkidildi. Ilkibaşdan saýlanyp alnan ugra eýerilýändigini tassyklap, Gurbanguly Berdimuhamedow Türkmenistanyň mundan beýläk hem Arkalaşygyň işlerine şu statusda işjeň gatnaşyp, netijeli hyzmatdaşlygy ikitaraplaýyn we köptaraplaýyn formatda ösdürjekdigini eýýäm birnäçe gezek aýdypdy.