Düýn Aşgabatda «Türkmenistan: Altyn asyryň muzeýleri» atly halkara ylmy maslahat öz işini tamamlady. Hormatly Prezidentimiz Gurbanguly Berdimuhamedowyň howandarlygynda guralan wekilçilikli forum muzeý işini ösdürmegiň wajyp meselelerine, dünýäde türkmen halkynyň bahasyna ýetip bolmajak mirasyny wagyz etmäge bagyşlandy.

Ozal habar berlişi ýaly, Aşgabada ylmy maslahatyň işine gatnaşmak üçin alymlar, dünýäniň iri muzeýleriniň ekspertleri we hünärmenleri, şeýle hem UNESKO, TIKA, TÜRKSOÝ ýaly abraýly halkara guramalarynyň wekilleri ýygnandylar. Jahanyň dürli halklarynyň medeniýetleriniň gatnaşyklaryny ösdürmäge möhüm we saldamly goşant bolan «Türkmenistan: Altyn asyryň muzeýleri» atly halkara ylmy maslahat ýurdumyzda hormatly Prezidentimiz Gurbanguly Berdimuhamedowyň ýolbaşçylygynda amala aşyrylýan milletiň ruhy galkynyş, giňişleýin we konstruktiw halkara hyzmatdaşlygy syýasatyny durmuşa geçirmegiň aýdyň nusgasy boldy.

Forumyň işiniň barşynda, oňa gatnaşyjylara Garaşsyzlyk ýyllarynda bina edilen, häzirki wagtda ýurduň iri ylmy we medeni merkezlerine öwrülen özboluşly muzeýlerine baryp görmäge mümkinçilik döredildi. Myhmanlarymyz «Köne Nusaý» we «Gadymy Merw» Döwlet taryhy-medeni goraghanalarynda arheologlaryň işi bilen tanyşdylar. Elbetde, dünýä siwilizasiýasynyň gadymy ojaklarynyň biri, legendar Marguş ýurdunyň paýtagty Goňurdepä barlyp görülmegi hemmelerde ýatdan çykmajak täsir galdyrdy. Ylmy maslahata gatnaşyjylaryň köp sanly ekskursiýalardan galan täsirleri şu gün seksiýalaryň dördüsindäki iş mejlisiniň dowamynda aýdylan gyzykly habarlarda öz beýanyny tapdy.
Jemi «Türkmenistan: Altyn asyryň muzeýleri» halkara ylmy maslahatynyň işiniň dowamynda ýüzden gowrak habar we çykyşlar diňlenildi hem-de ara alnyp maslahatlaşyldy. Naýbaşy arhitektura binalaryny we beýleki medeni gymmatlyklary muzeýlere öwürmegiň wajyp meseleleri alymlaryň we ekspertleriň gepleşikleriniň esasy meselesi boldy. Ylmy maslahata gatnaşyjylar bu ugurda ýurtlaryň birnäçesiniň tejribesi bilen tanyşdylar. Şu jähetden muzeý ekspozisiýalary we gaznalary bilen işlemegi guramakda ulanylýan iň täze usullar we öňdebaryjy tehnologiýalar barada içgin pikir alşyldy. Çykyş edenler, şeýle hem täze kompýuter informasiýa merkezini döretmegiň dünýä muzeýleri boýunça maglumatlary ýygnamagyň we sistemalaşdyrmagyň zerurlygyny bellediler.

Çykyşlaryň aglaba bölegi halkara syýahatçylygyny ösdürmekde muzeýleriň roluna bagyşlandy. Hususan-da, baý medeni, özboluşly taryhy ýadygärlikleri, üýtgeşik däp-dessurlary bolan Garaşsyz, Bitarap Türkmenistan jahanyň dürli künjeklerinden köp sanly syýahatçylar üçin medeni gezelenje gelinýän ýere öwrülip bilerdi. Şonuň üçinem dünýäde bahasyna ýetip bolmajak bu baýlygy wagyz etmegiň formalaryny we usullaryny ösdürmek ýurduň muzeýleriniň öňünde durýan esasy wezipeleriň biridir.
Forumyň aýry-aýry seksiýalarynyň işiniň dowamynda, şeýle hem dünýä medeniýetinde Türkmenistanyň muzeý gymmatlyklarynyň ähmiýetine bagyşlanan, täze milli galkynyş eýýamynda muzeý işini mundan beýläk hem ösdürmegiň we kämilleşdirmegiň meselelerine bagyşlanylan habarlaryň birnäçesi diňlenildi. Türkmenistanyň UNESKO ýaly abraýly hökümetara guramasy bilen hyzmatdaşlykda uly oňyn tejribe toplandygy çykyşlarda aýdyldy. Çykyş edenler şu netijeli hyzmatdaşlygy giňeltmegiň, çuňlaşdyrmagyň, gürrüňsiz, taryhy we medeni ýadygärlikleri goramak barada mundan beýläkki progrese ýardam etjekdigini bellediler.

Halkara ylmy konferensiýanyň ýapylyş dabarasynda onuň işiniň jemleri jemlendi. Ýygnananlaryň pikirine görä, häzir forum diňe bir milli mirasy öwrenmäge we gorap saklamaga goşant goşman, eýsem Türkmenistanyň we dünýäniň beýleki ýurtlarynyň muzeýleriniň arasynda netijeli gatnaşyklary has-da ösdürdi. Hormatly Prezidentimiz Gurbanguly Berdimuhamedowa gadymy türkmen topragyna gelmäge we muzeý işini ösdürmegiň wajyp meselelerini ara alyp maslahatlaşmaga döreden mümkinçiligi üçin çuňňur minnetdarlyk bildirip, ylmy maslahata gatnaşyjylar şu örän möhüm ugurda ýakyn hyzmatdaşlygy dowam etdirmegiň zerurlygyny aýtdylar.

Halkara ylmy maslahatyň işi tamamlanandan soň, oňa gatnaşyjylar Türkmenistanyň Prezidenti Gurbanguly Berdimuhamedowa Ýüzlenme kabul etdiler.

«Türkmenistan: Altyn asyryň muzeýleri» atly Halkara ylmy maslahata gatnaşyjylara hormatly Prezidentimiz Gurbanguly Berdimuhamedowyň adyndan dabaraly agşamlyk nahary berildi.
Halkara ylmy maslahatyň giňişleýin medeni maksatnamasynyň çäklerinde oňa gatnaşyjylar Garaşsyzlyk aýynyň 6-synda «Serdaryň saglyk ýoluna» baryp görerler, şeýle hem Aşgabadyň gözel ýerleri bilen tanyşmagy dowam ederler.