Ruhnama aýynyň 27-28-ine Beýik Britaniýanyň London şäherinde geçen Türkmenistanyň çeper döredijilik sergisi uly üstünlik bilen tamamlandy. Sergi iri «Burren Energy» kompaniýasynyň ýardam bermeginde türkmen medeniýetini gowy bilýän we oňa uly sarpa goýýan britan suratkeşi Brijit Tempest tarapyndan guraldy.

Angliýanyň paýtagtynyň merkezinde ýerleşýän «Aziýa Haus» binasynyň giň zalyna gelenler elde dokalan haly önümleriniň indi müňlerçe ýyllaryň dowamynda dünýäde türkmen halyçylygynyň şöhratyny saklap gelýän ajaýyp nusgalarynyň onlarçasy bilen ýakyndan tanyşmaga mümkinçilik aldylar. Sungatyň bu görnüşini oňat bilýän we söýýän daşary ýurtly haly muşdaklaryna türkmen halyçylarynyň hakyky el işlerini öz gözleri bilen görmäge, şeýle hem elde dokalýan halylaryň taryhy we Türkmenistanyň bu pudagynyň häzirki zamanda ösüşi baradaky maglumatlary almaga mümkinçilik döredildi.

Şeýle hem sergide türkmen suratkeşleriniň žiwopis eserleri, halk saz gurallarynyň nusgalary, ussat zergärleriň işleri, amaly-haşam sungatynyň eserleri, dürli görnüşli ýadygärlik sowgatlary görkezildi. Sergide türkmen medeniýetiniň ähli baýlyklaryny we ajaýyp gözelligini görkezýän milli altyn-kümüş şaý-seplerini görkezmek üçin aýratyn ýer bölünip berildi. Onuň gapdalynda bolsa Garaşsyz, baky Bitarap Türkmenistan we onuň ak mermerli paýtagty Aşgabat baradaky surat panoramasy görkezilýär.

Türkmen sergisi britan paýtagtynyň medeniýet we sungat işgärlerinde, Beýik Britaniýada resmi taýdan bellenen diplomatik wekilhanalaryň, işewür adamlaryň, habar beriş serişdeleriniň wekillerinde, ýaşlarda uly gyzyklanma döretdi. Londondaky serginiň açylyşyna türkmen suratkeşler topary hem gatnaşdy.

Sergini guranlaryň öz çykyşlarynda nygtaýyşlary ýaly, sergi iki halkyň arasyndaky medeni we dostlukly gatnaşyklary berkitmekdäki ýene bir ädim bolar. Sebäbi sungat, esasan-da halkyň sungaty terjime etmegi talap etmeýän we adamlara birek-biregi ýakyndan tanamaga we has gowy düşünmäge ýardam berýän uniwersal dildir.