Prezident Gurbanguly Berdimuhamedowyň Täjigistana sapary geçen hepdäniň esasy wakasy boldy, ol täze taryhy şertlerde iki döwletiň hyzmatdaşlygyna täzeçe çemeleşmeleri kesgitledi. Bolup geçen gepleşikleriň netijeliligi, gol çekilen ylalaşyklaryň uzakmöhletleýin häsiýeti Türkmenistanyň milli, sebitleýin we dünýä bähbitleriniň ýakynlaşmagyna gönükdirilen strategiýasynyň döwrüň talaplaryna laýyk gelýändigini, ählumumy ykrar edilmegine we abraýa mynasypdygyny aýdyň tassyklady.

Merkezi Aziýada dostluk we hoşniýetli goňşuçylyk ýagdaýyny döretmek Prezident Gurbanguly Berdimuhamedowyň daşary syýasy doktrinasynyň möhüm bölegidir. Bu barada türkmen lideri ençeme gezek, şol sanda ýakynda Nýu-Ýorkda BMG-niň Baş Assambleýasynda çykyş edende aýtdy. Hyzmatdaşlyk etmegiň netijeli modeli Türkmenistanyň—sebitde ýeke-täk Bitarap döwletiň derejesine esaslanýar, biziň halkymyz bolsa gadymdan bäri parahatçylyk we hoşniýetlilik ideallaryna ygrarlydyr. Örän gysga döwrüň içinde progressiw reformator syýasatçynyň abraýyna mynasyp bolmaga ýetişen, birsyhly taraplaryň garaýyşlaryny ýakynlaşdyrýan we iş ýüzündäki netijelere getirýän konstruktiw ideýalary hem-de teklipleri hödürleýän Gurbanguly Berdimuhamedow bolsa şol ideallara hem-de syýasy ynama daýanýar.

Türkmenistanyň baştutany kökleri gadymy döwürlerden gözbaş alyp gaýdýan goňşy döwletler bilen gatnaşyklara aýratyn ähmiýet berip, birnäçe başlangyçlar, şol sanda energiýa serişdelerini dünýä bazarlaryna çykarmagyň alternatiw ýollaryny emele getirmäge, ulag kommunikasiýalaryny we energiýa ulgamlaryny ösdürmäge mümkinçilik berýän turba geçirijiler infrastrukturasyny döretmek baradaky başlangyçlar bilen çykyş etdi. Bu taslamalaryň her biri ykdysady bähbitleri kanagatlandyrmak bilen, olara gatnaşyjy ýurtlaryň ikitaraplaýyn we köptaraplaýyn goşulyşmagyna, olaryň öz aralarynda we dünýä bileleşigi bilen aragatnaşyklarynyň pugtalanmagyna ýardam edýär, sebitde parahatçylygyň hem-de durnuklylygyň goşmaça kepillendirmesi bolup çykyş edýär.

Aýdyň aýdylsa, türkmen lideriniň başlangyçlary ýurtlaryň arasyndaky hyzmatdaşlygyň, halklaryň arasyndaky dostlugyň we ynanyşmagyň köprülerini gurýar. Ýokary derejede türkmen-täjik duşuşyklarynyň barşynda bu ýagdaý aýratyn nygtaldy. Prezident Emomali Rahmon öz ýurdunda höküm sürýän parahatçylygyň we ylalaşygyň täjik halkynyň iň esasy we gymmatly baýlygy bolup durýandygyny ykrar edip, bu babatda doganlyk Türkmenistanyň tagallalaryna hem-de goldawyna, türkmen döwletiniň parahatçylyk söýüjilikli syýasatyna özüniň minnetdardygyny aýtdy, şol syýasat bolsa Merkezi Aziýa sebitinde durnuklylygyň möhüm faktory boldy. Bu barada Prezident Gurbanguly Berdimuhamedowyň Täjigistanyň parlamentarileri, daýhanlary, işewür toparlarynyň hem-de jemgyýetçiliginiň wekilleri bilen duşuşyklarynda hem aýdylyp geçildi.

Geçirilýän gepleşikleriň barşyna syn eden täjigistanlylaryň muňa uly gyzyklanma bildirýändiklerini bellemän geçmek bolmaz, sebäbi olar şol gepleşiklerde dogduk topragynyň mundan beýläk-de gülläp ösmeginiň, parahatçylygyň hem-de wepaly we ynamdar goňşusy bilen dostlugyň girewini görýärler. Bu saparyň bütin dowamynda örän mähirlilik, ýürekdeşlik we göwnaçyklyk höküm sürdi, şol saparyň maksatnamasyna bolsa Täjigistanyň parlamentine — Milli mejlisine, iň oňat ekerançylyk hojalyklarynyň biri bolan «Hoji Kamol» daýhan birleşigine, Tursunzade şäherinde ýerleşen uly metallurgiýa kärhanasyna-täjik alýumin kompaniýasynyň önümçilik toplumyna baryp görmek goşuldy. Üzümçilik bolsa şol daýhan birleşiginiň buýsanjy hasaplanylýar, şol ýerde üzümiň naýbaşy sortlary ösdürilip ýetişdirilýär. Hemme ýerde täjigistanlylar Türkmenistanyň Prezidentini mähirli mübäreklediler, hemme ýerde oňa ägirt uly hormat goýuldy we üns berildi.

Iki ýurduň liderleriniň geçiren resmi geple¬şikleri tüýs ýürekden dostluk, özara hormat goýmak, konstruktiw çemeleşmek ruhunda boldy, şol gepleşikleriň jemleri boýunça möhüm döwletara resminamalarynyň bir toparyna gol çekildi. Olaryň hatarynda syýasy, söwda-ykdysady we ylmy-tehniki hyzmatdaş¬ly¬gyň esasy ugurlaryny kesgitlän Türkmenistan bilen Täjigistan Respublikasynyň arasyndaky dostluk hem-de hyzmatdaşlyk hakyndaky Şertnama, medeniýet we sungat, bilim babatdaky, maýa goýumlaryny höweslendirmek we özara goramak hakyndaky ylalaşyklar bar. Olaryň her biri türkmen ýangyç-çalgy materiallaryny we elektrik energiýasyny Täjigistana, täjik alýumin senagatynyň önümlerini Türkmenistana ibermek ýaly ugurlarda netijeli hyzmatdaşlyk etmek, dokma senagatynda, oba hojalygynda, üstaşyr ulag gatnawynda, aragatnaşykda, daşky gurşawy goramak babatda bilelikdäki taslamalary amala aşyrmak üçin giň mümkinçilikleri açýar. Şeýlelikde iki goňşy döwlet asyrlaryň dowamynda däp bolup gelen dostluga, doganlyga we hoşniýetli erk-islege türkmen-täjik gatnaşyklarynyň ähli potensialyny peýdalanmaga iki tarapyň hem çalyşýandygyna üýtgewsiz ygrarlydyklaryny äşgär görkezdiler.

Eýýäm bellenilip geçilişi ýaly, halkara hyzmatdaşlygynyň meselelerinde Türkmenistanyň Prezidenti ikitaraplaýyn aragatnaşyklaryň netijeliligine çuňňur ynam bildirýär. Türkmen lideriniň syýasy we döwlet pragmatizmi şundan ybaratdyr, halkara hukugynyň prinsiplerini berjaý etmek bilen bir hatarda milli we kooperatiw bähbitlere aýdyň göz ýetirmek we delillendirip ylalaşmak integrasion maksatnamalaryň esasyny düzmelidir. Munuň özi gatnaşyk etmegiň syýasy taraplaryna hem ykdysady taraplaryna hem degişlidir. Bu bolsa köp taraplaýyn hyzmatdaşlygyň ýeke-täk dogry ýoludyr, global maksatlar bolan parahatçylygy we howpsuzlygy gazanmagyň netijeli serişdesidir.

Türkmen lideriniň prinsipial garaýşyna, onuň açyklygyna, dogruçyllygyna hem-de konstruktiw çemeleşmesine syýasy hyzmatdaşlar hem, işewür hyzmatdaşlar hem hormat goýýarlar. Ýokary derejedäki duşuşyklaryň tapgyry muny ýene-de bir gezek tassyklady, şol duşuşyklary Gurbanguly Berdimuhamedow Duşenbede GDA döwletleriniň baştutanlarynyň sammiti wagtynda geçirdi. Russiýa Federasiýasynyň Prezidenti Wladimir Putin, Gyrgyzystanyň, Belarusyň, Gazagystanyň, Özbegistanyň, Azerbaýjanyň, Ermenistanyň, Moldowanyň ýolbaşçylary bilen geçirilen gepleşikleriň barşynda ikitaraplaýyn özara gatnaşyklaryň möhüm meseleleri boýunça pikir alşyldy, döwletara hyzmatdaşlygyny çuňlaşdyrmaga özara gyzyklanylýandygy tassyklanyldy.

Tutuşlygyna alnanda GDA döwletleriniň baştutanlarynyň nobatdaky mejlisiniň gün tertibine, hususan-da, Arkalaşygy mundan beýläk-de ösdürmegiň konsepsiýasyny işläp taýýarlamaga, ykdysady we gumanitar ugurlarda hyzmatdaşlygy pugtalandyrmaga degişli meseleleriň 20-ä golaýy, şol sanda birnäçe guramaçylyk meseleleri goşuldy, Türkmenistan bolsa GDA-nyň assosirlenen agzasydyr. Kollektiwleýin howpsuzlyk, jenaýatçylyga we terrorçylyga garşy göreş alyp barmak, GDA giňişliginde migrasion ugurda we hukuk tertibini goramakda hyzmatdaşlyk etmek meselelerine aýratyn orun berildi.

Hepdäniň beýleki resmi wakalary hem Türkmenistanyň syýasatynyň köp ugurlydygyny äşgär görkezýär. Prezident Hindistanyň, Niderlandlar Patyşalygynyň Adatdan daşary we Doly ygtyýarly ilçileri, meşhur «CLAAS Global Sales GmbH» german kompaniýasynyň ýolbaşçylary bilen duşuşyklarynda ähli ugurlar boýunça—ýangyç-energetika toplumy, maglumatlar tehnologiýasy, oba hojalygy, medeni alyş-çalyş, ylmy gatnaşyklar, syýahatçylyk babatda hyzmatdaşlygy hemmetaraplaýyn ösdürmäge iki tarapyň hem gyzyklanýandygy we oňa isleg bildirýändigi gürrüňsiz suratda bellenip geçildi.

«Türkmenistan: Altyn asyryň muzeýleri» atly halkara konferensiýasyna gatnaşyjylarda—dünýäniň ýigrimiden gowrak ýurdundan: Hindistandan, Kanadadan, Eýrandan, Germaniýadan, Italiýadan, Russiýadan, Gazagystandan, Özbegistandan, Azerbaýjandan, Fransiýadan, Gyrgyzystandan, Ukrainadan, Belarusdan, Koreýadan, Täjigistanadan, Päkistandan, Türkiýeden, ABŞ-dan, Beýik Britaniýadan, Belgiýadan, Ýaponiýadan gelen muzeý işi boýunça alymlarda we hünärmenlerde Türkmenistan barada aýdyň täsirler galdy.

Şeýlelikde, türkmen döwleti öz ertirki gününe ynamly gadam basmak bilen, öz abadançylygyna hem, beýleki halklaryň abadançylygyna hem ýardam edýän barha täze we täze ädimleri ädýär. Türkmenistan daşary ýurtly hyzmatdaşlar bilen özara bähbitli gatnaşyklary ösdürmäge mümkinçilikleri açýan oňyn Bitaraplyk prinsiplerine üýtgewsiz wepaly bolmak bilen, bu mümkinçiligi ählumumy parahatçylygyň we progressiw ösüşiň bähbitlerine peýdalanmaga çalyşýar.