Garaşsyzlyk aýynyň 5-inde Türkmenistanyň paýtagtynda «Adam hukuklary boýunça halkara we milli ulgamlar» diýen tema boýunça seminar geçirildi. Türkmenistanyň Prezidentiniň ýanyndaky Demokratiýa we adam hukuklary baradaky Türkmen milli instituty bilen BMG-niň Ösüş maksatnamasy tarapyndan guralan bu çäre Mejlisiň deputatlaryny, ýurdumyzyň jemgyýetçilik guramalarynyň wekillerini, halkara ekspertlerini, öz işi boýunça adamyň konstitusion hukuklaryny we azatlyklaryny iş ýüzünde durmuşa geçirmek bilen gös-göni baglanyşykly bolan döwlet düzümleriniň işgärlerini bir ýere ýygnady.
Badalga alan seminar halkara ekspertleri tarapyndan milli institutlar üçin berilýän maslahatlar tapgyry bilen utgaşyp gider. Ol Türkmenistanyň Prezidenti Gurbanguly Berdimuhamedowyň kararyna laýyklykda döredilen Halkara borçnamalarynyň ýerine ýetirlişini üpjün etmek boýunça pudagara toparynyň alyp barýan jogapkärli işini durmuşa geçirmegiň ýolunda ilkinji möhüm ädim bolmalydyr.

Seminaryň açylyşynda BMG-niň Türkmenistandaky Hemişelik utgaşdyryjysy Riçard Ýangyň nygtaýşy ýaly, bu ädimler Türkmenistanyň BMG bilen çuňlaşdyrylan hyzmatdaşlyga wepalydygyny, türkmen hökümetiniň adam hukuklary babatdaky monitoringiň guramalary bilen konstruktiw gepleşiklere, bu möhüm ulgamda mundan beýläk-de uzakmöhletleýin özara hyzmatdaşlyga taýýardygyny nobatdaky gezek subut edýär.

Türkmenistanda hasabatlary düzmegiň mümkinçiliklerini ösdürmäge gönükdirilen hyzmatdaşlygyň täze taslamasynyň çäklerinde BMG-niň şertnamalaýyn organlaryna milli dokladlary taýýarlamak we olaryň maslahatlarynyň, şol sanda kanun döredijilik praktikasy babatdaky masalahatlarynyň durmuşa geçirilmegi boýunça bilelikdäki işler amala aşyrylýar.
Adam hukuklary boýunça Türkmenistan tarapyndan tassyklanylan halkara resminamalarynyň hatarynda jyns kemsidilmeleriniň ähli görnüşlerini ýok etmek baradaky halkara Konwensiýasy, aýallar babatda kemsidilmeleriň ähli görnüşlerini ýok etmek baradaky Konwensiýa, çaganyň hukuklary baradaky Konwensiýa bar. 2004-nji ýylda Türkmenistan eýýäm şol esasy Konwensiýa-laryň üçüsiniň ýerine ýetirilmegi boýunça özüniň milli hasabatlaryny BMG-niň komissiýalaryna hödürledi.

Häzirki duşuşygyň barşynda şol hasabatlary düzmäge gös-göni gatnaşan hünärmenler, şeýle hem daşary ýurtly ekspertler Halkara borçnamalarynyň ýerine ýetirilmegini üpjün etmek boýunça pudagara toparynyň agzalary bo-lup durýan beýleki ministrlikleriň we pudaklaryň işgärleri bilen resminamalaryň üstünde işlemek we zerur maglumatlary toplamak barada tejribe alyşdylar. Seminaryň barşynda onuň diňleýjileri milli dokladlary taýýarlamagyň metodlary we prinsipleri, şeýle hem halkara şertnamalary-nyň esasy düzgünleri bilen tanyşdyryldy, türkmen tarapynyň öňünde şolar boýunça takyk hasabatlary düzmek wezipesi durýar.