Garaşsyzlyk aýynyň 6-syna irden Türkmenistanyň Prezidenti Gurbanguly Berdimuhamedow Türkmenistanyň Ministrler Kabinetiniň nobatdaky mejlisini geçirdi, onda gündelik döwlet syýasatynyň ilkinji nobatdaky meselelerine garaldy.

Döwlet baştutany mejlisi açyp, şu gün ähli türkmen halky tebigy betbagtçylyk zerarly sähel pursadyň içinde ömür tanapy kesilen edermen ata-babalarymyzyň ýagty ýadygärligini hatyralap, milli senenamamyzyň gussaly senesini — Ählihalk matam gününi belläp geçýär diýip belledi. Türkmenistanlylar öz halkynyň ruhy däplerine wepalylygy saklamak bilen, möçberi boýunça aýylganç bolan 1948-nji ýyldaky Aşgabat ýer titremesiniň wakalaryny hakydasynda mukaddes saklaýarlar, şol ýer titremesi bolsa, onlarça ýyllaryň geçendigine garamazdan, uly ýitginiň unudylmaz yzasy we gussasy bolup, adamlaryň ýüreklerini sarsdyrýar.

Gurbanguly Berdimuhamedowyň nygtaýşy ýaly, biziň watandaşlarymyzyň şehit bolan 176 müňüsi hakyndaky ýatlama, türkmen halky üçin asyrlaryň dowamynda aýawly saklanylýan we nesilden-nesle geçirilip gelinýän milletimiziň ruhy sütünleri ýaly mukaddesdir. Ählihalk matam gününde bütin ýurdumyzda XX asyryň iň aýylganç tebigy betbagtçylyklarynyň biriniň pidalarynyň ählisiniň jaýynyň jennet bolmagy dileg edilip, aýat-doga okalýar we sadaka berilýär. Agşam bolsa biz, milletimiziň döwlet we ruhy galkynyşynyň gözbaşylarynda duran ýurdumyzyň ilkinji Prezidenti Beýik Saparmyrat Türkmenbaşynyň ýagty ýadygärligini hatyralarys diýip, Gurbanguly Berdimuhamedow aýtdy.

Gurbanguly Berdimuhamedow mejlisiň gün tertibiniň esasy meselelerine geçip, Täjigistana ýaňy-ýakynda tamamlanan resmi saparynyň esasy jemlerini gysgaça häsiýetlendirdi. Prezident geçirilen gepleşikleriň ýokary netijeliligini, gazanylan ylalaşyklaryň uzakmöhletli häsiýete eýedigini nygtap, degişli ýolbaşçylaryň öňünde Täjigistanyň Prezidenti Emomali Rahmonyň Türkmenistana jogap saparyny ýokary guramaçylyk derejesinde üpjün etmek barada wezipe goýdy, şol sapar bolsa Bitaraplyk aýynyň birinji ongünlügine bellenildi.
Soňra öz gözegçilik edýän pudaklarynda işleriň ýagdaýy hakynda hasabat beren hökümetiň başlygynyň orunbasarlaryna söz berildi.

Ministrler Kabinetiniň Başlygynyň orunbasary T.Tagyýew ýangyç-energetika toplumyndaky işleriň netijeleri hakyndaky hasabat bilen çykyş etdi. Döwlet baştutany onuň çykyşyny diňläp, Türkmenistanyň baý uglewodorod serişdelerini netijeli özleşdirmegiň ýurdumyzda amala aşyrylýan giň möçberli sosial-ykdysady maksatnamalaryň, şeýle hem energetika pudagyndaky halkara borçnamalarynyň üstünlikli ýerine ýetirilmegi üçin birinji derejeli ähmiýetiniň bardygyny belledi. Bu babatda Prezident ýangyç-energetika toplumynyň ýolbaşçylaryndan ähli zerur çäreleri görmegi hem-de «Türkmenistanyň nebitgaz senagatyny ösdürmegiň 2030-njy ýyla çenli döwür üçin maksatnamasyny» gürrüňsiz durmuşa geçirmegi üpjün etmegi tabşyrdy, şol maksatnamada pudagy ösdürmegiň anyk sepgitleri we strategiki ugurlary kesgitlenildi.

Wise-premýer H.Saparlyýew bilim reformasynyň durmuşa geçirilişiniň meseleleri boýunça hasabat berdi. Ol şeýle hem Prezidente soňky ýyllarda gazanylan, türkmen talyplaryny daşary ýurtlarda okatmaga degişli bolan ylalaşyklaryň ýerine ýetirilişiniň barşy hakynda habar berdi. Gurbanguly Berdimuhamedow ýurdumyzyň bilim ulgamyny ösdürmegiň möhüm şerti bolan gumanitar ugurdaky giň halkara hyzmatdaşlygynyň ähmiýetini nygtap, dünýäniň iri ylmy we okuw merkezleri bilen bu ugurda özara gatnaşyklary mundan beýläk-de giňeltmegiň zerurdygyny belledi. Häzirki wagtda milli ykdysadyýetiň ähli pudaklarynda öňdebaryjy tehnologiýalary, ylmy-tehniki progresiň soňky gazananlaryny ornaşdyrmaga ilkinji nobatda üns berilýär. Daşary ýurtlaryň ýokary okuw mekdepleriniň uçurymlary dünýä derejesine laýyk gelýän bilimi alyp, ýokary hünärli işgärler zerur bolan uçastoklarda işe çekilmelidir diýip, döwlet baştutany aýtdy.
Hökümet baştutanynyň orunbasary G.Aşyrow ulag toplumynyň we aragatnaşyk pudagynyň işi hakynda hasabat berip, döwlet baştutanyna bu ugurda birnäçe möhüm taslamalaryň durmuşa geçirilişiniň hem-de taýýarlanylyşynyň barşy hakynda jikme-jik habar berdi. Gurbanguly Berdimuhamedow emele gelýän konýunkturadan has operatiw netije çykarmagyň, bu esasy pudaklaryň öňünde durýan wezipeleri çözmäge sowatly, professional taýdan çemeleşmegiň zerurdygyny nygtady we G.Aşyrowdan bu ugurda işi çaltlaşdyrmagy, Türkmenistanyň durmuş-ykdysady strategiýasyny amala aşyrmakda möhüm orun degişli bolan pudaklaýyn desgalary çalt gurmak barada çäreleri görmegi talap etdi. Hususan-da, Prezident jemgyýetçilik ulaglarynyň işini mundan beýläk-de kämilleşdirmek bilen baglanyşykly meseleleri haýal etmän çözmek barada görkezme berdi.

Wise-premýer N.Şagulyýew gurluşyk desgalarynda işleriň barşy hakynda hasabat berdi, şol desgalar bolsa Türkmenistanyň Garaşsyzlyk gününiň öňüsyrasynda ulanylmaga berler. Gurbanguly Berdimuhamedow hasabaty düýpli seljerip, hil we ygtybarlylyk ýaly şäher gurluşyk iş tejribesine bildirilýän talabyň derwaýysdygyna ünsi jemledi we baýramçylyk mynasybetli işe girizilmeli ähli desgalaryň haýsydyr bir ýetmezçilikleri bolmazdan we şertnamada bellenilen möhletlere berk laýyklykda ulanylmaga berilmelidigini nygtady.
Türkmenistanyň Ministrler Kabinetiniň Başlygynyň orunbasary M.Ýazmuhammedowanyň hasabatynda Garaşsyzlygymyzyň 16 ýyllygynyň baýram edilmegine taýýarlyk görmegiň temasy dowam etdirildi, ol bu işiň tassyklanylan, Türkmenistanyň merkezi gazetlerinde çap edilen maksatnama laýyklykda alnyp barylýandygyny habar berdi. Gurbanguly Berdimuhamedow hasabaty diňläp we bu senäniň diňe bir Watanymyzyň, türkmen halkynyň taryhynda däl, eýsem her bir türkmenistanlynyň terjimehalynda möhüm sene hökmünde ähmiýetini nygtap, ýaýbaňlanýan seneler bilen baglanyşykly dabaralary umumy döwlet möçberinde, ýokary guramaçylyk derejesinde geçirmek barada wezipe goýdy.

Mejlisiň başlygy A.Nurberdiýewa döwlet baştutanyna milli parlamentiň konstitusion reformany tapgyrma-tapgyr durmuşa geçirmek bilen baglanyşykly işi hakynda habar berdi. Ýurdumyzyň parlamentarileri amala aşyrylýan özgertmeleri kanunçylyk taýdan üpjün etmek meselelerine örän jogapkärli çemeleşýärler, hemişe wakalaryň jümmüşinde bolýarlar, ýerli dolandyryş edaralaryny —geňeşlikleri pugtalandyrmak baradaky işe, welaýat we Aşgabat şäher halk maslahatlaryna saýlawlara taýýarlyk görmäge işeňňir gatnaşýarlar diýip, Mejlisiň ýolbaşçysy hormatly Prezidentimizi ynandyrdy.

Gurbanguly Berdimuhamedow reformalaryň halkara hukugynyň progressiw normalaryna laýyk gelýän berk kanunçylyk binýadyny döretmegiň örän möhümdigini nygtap, daýhan birleşikleriniň hukuklaryny hem-de ygtyýarlyklaryny giňeltmek ýaly meselä mejlise gatnaşyjylaryň ünsüni çekdi. Prezidentiň nygtaýşy ýaly, önümçilik wezipelerini netijeli çözmegi, oba zähmetkeşleriniň bähbitlerini hemmetaraplaýyn durmuşa geçirmegi üpjün etjek daýhan hojalyklarynyň maliýe we maddy-tehniki özbaşdaklygyna degişli meseleler eserdeňlik bilen, oýlanyşylyp çözülmelidir.

Hökümetiň baştutanynyň orunbasary, Türkmenistanyň Daşary işler ministri R.Meredow döwletiň daşary syýasatyny amala aşyrmagyň çäklerinde göz öňünde tutulýan halkara duşuşyklaryna we gepleşiklerine görülýän taýýarlyk barada hasabat berdi, ol hususan-da, geljek hepdede Ýewropa Bileleşiginiň daşary syýasat we howpsuzlyk boýunça Ýokary wekili Hawýer Solananyň Aşgabada sapar bilen gelýändigini habar berdi. Şol günler Rumyniýanyň daşary işler ministriniň sapary bolar. Ýurdumyzyň daşary syýasat edarasynyň ýolbaşçysy Hazarýaka döwletleriniň baştutanlarynyň ýokary derejedäki duşuşygyna taýýarlyk görmegiň meseleleri hakynda hem habar berdi, şol duşuşyk Garaşsyzlyk aýynyň 15-16-synda Tähranda bolar.
Gurbanguly Berdimuhamedow mejlisiň ahyrynda hökümet baştutanynyň orunbasarlaryna bellenilen parametrlere laýyklykda gözegçilik edýän pudaklaryny ösdürmäge täze itergi bermek üçin olaryň işini seljermegi tabşyrdy. Bu işiň, şeýle hem tutuşlygyna alnanda şu ýylyň geçen dokuz aýynda Türkmenistany sosial-ykdysady taýdan ösdürmegiň hem jemleri Ministrler Kabinetiniň geljek hepdede boljak mejlisinde jemlener.