Türkmenistanda gussaly sene—1948-nji ýyldaky weýrançylykly Aşgabat ýertitremesiniň pidalarynyň Ählihalk matam güni bellenilýär. Türkmen halkynyň taryhynda gussaly wakalaryň biriniň bolup geçeli bäri 59 ýyl geçdi, şol waka baradaky ýatlama her bir türkmenistanlynyň ýüregini henize bu güne çenli hem gam-gussa batyrýar. 1948-nji ýylyň Garaşsyzlyk aýynyň 5-inden 6-syna geçilýän gije 1 sagat 12 minutda tebigy betbagtçylygyň ägirt uly güýji bir pursatda owadan we gülläp ösýän şäheri hem-de onuň töwereklerini büs-bütinleýin weýran etdi, biziň watandaşlarymyzyň 176 müňüsiniň ömür tanapyny kesip, her bir maşgala diýen ýaly ýetimçiligiň we öwezini dolup bolmajak ýitginiň gam-gussasyny getirdi. Onlarça ýyl geçenden soň, Garaşsyzlyk ýyllarynda bütin dünýä bu heläkçiligiň hakyky möçberleri hakyndaky hakykaty bildi, halkymyz bolsa milli däplere görä, öz dogan-garyndaşlarynyň we ýakynlarynyň ýadygärligini hatyralap, bu gussaly senäni Ählihalk matam güni hökmünde bellemäge mümkinçilik aldy.

Şu gün bütin ýurdumyzda matam lentalary dakylan Döwlet baýdaklary aşak düşürildi, hemme ýerde matam tutulyp, sadaka berilýär. Henize bu güne çenli şol hasratly gijedäki elhenç wakany hakydasynda saklaýan türkmenistanlylaryň millionlarçasynyň ýüreklerini çuňňur gam-gussa gaplap alýar. Aýylganç ýertitremesini gözi bilen görenleriň gürrüňlerinden hem-de ýatlamalaryndan bu ýowuz tebigy betbagtçylygyň döreden heläkçilikleri hakynda bilýänleriň ýürekleri sarsýar.

Ir bilen aşgabatlylaryň we paýtagtymyzyň myhmanlarynyň müňlerçesi 1948-nji ýylyň ýertitremesinde gurban bolanlaryň hemmesiniň ýadygärligini hatyralamak üçin memorial toplumlaryň we ýadygärlikleriň ýanyna geldiler. Paýtagtymyzyň merkezinde dikeldilen, Aşgabat ýertitremesiniň pidalarynyň memorial ýadygärligine gül dessesini goýmagyň ýas çäresine Türkmenistanyň Prezidenti Gurbanguly Berdimuhamedow gatnaşdy.

Döwlet baştutany aýylganç heläkçiligiň bigünä pidalarynyň ýadygärligini hatyralamak üçin bu ýere gelenleriň hemmesini mähirli mübärekleýär. Bir minutlap dymmak bilen wepat bolanlaryň ýadygärligi hatyralanýar. Türkmenistanyň Döwlet senasy ýaňlanýar. Ýurdumyzyň müftüsi şehitleriň alnyna barsyn diýip doga okaýar we Garaşsyz Watanymyzyň abadançylygynyň hem-de gülläp ösmeginiň hatyrasyna türkmenistanlylaryň döredijilikli zähmet çekmegini dileg edýär.

Gurbanguly Berdimuhamedow çuň matam tutýandygynyň alamaty hökmünde baş egip, ýadygärligiň etegindäki baky oduň öňünde wenok goýýar. Bu aýylganç heläkçilik türkmen döwletiniň baştutanynyň maşgalasyna hem gussa getirdi, şol gussaly gije onuň atasy, oba çagalaryny okatmagyň we olara terbiýe bermegiň asylly işine ömrüni bagyş eden mekdep mugallymy Berdimuhammet Annaýew hem wepat boldy.

Döwlet baştutanynyň yzy bilen Mejlisiň ýolbaşçylary, hökümet agzalary, Türkmenistanda resmi taýdan bellenen diplomatiki missiýalaryň, daşary ýurt kompaniýalarynyň, dindarlaryň we şäherimiziň jemgyýetçilik guramalarynyň wekilleri ýadygärligiň etegine gül desselerini goýýarlar. Gussaly ýagdaýda dymmak bilen, tolgundyryjy «Keçpelek» mukamynyň sazyna goşulyp, üznüksiz adam akymy bu belent ýadygärlige tarap hereket edýär.

«Ýertitremesi» skulptura kompozisiýasynyň memorial toplumynyň çürbaşyndaky—öz şirin janyndan geçip we ýaşaýşyň dowam etmeginiň hatyrasyna jigerbendini halas edýän zenanyň elindäki körpe çaganyň figurasyny, adamzadyň ölmez-ýitmezliginiň we kül içinden galkynan şäheriň baky simwolyny baky oduň ýagtysy şuglalandyrýar. Üç gezek gaýtadan dikeldilen, ak mermere örtülen, täze keşbinde biziň ata-babalarymyzyň ýurdumyzyň ýagty geljegi hakyndaky arzuwlaryny we düşünjelerini, türkmenleriň geljekki nesilleriniň bagtly ykbalyny beýan edýän Aşgabadyň öz gözbaşyny hut şu ýerden alyp gaýdýanlygy tötänleýin däldir, biziň halkymyz öz taryhynyň agyr synaglaryny başdan geçirip, söýgüli Aşgabadymyzy gaýtadan dikeltdi, paýtagtymyzy Ýer şarynda iň owadan şäherleriň birine, parahatçylygyň, asudalygyň, bagtyň we abadançylygyň mekanyna öwürdi. Häzir hem gözel bolan paýtagtymyz geljekde ertekilerdäki ýaly has hem ajaýyp keşbe girer.

Häzirki wagtda Türkmenistanyň paýtagty öz ajaýyp keşbi bilen biziň umumy öýümizde—Garaşsyz, Bitarap Türkmenistanda bolup geçýän giň möçberli özgertmeleri äşgär görkezýär. Aşgabady ösdürmek ýakyn geljekde Türkmenistanyň Prezidenti Gurbanguly Berdimuhamedow tarapyndan öňde goýlan ileri tutulýan wezipeleriň biridir, bu ajaýyp şäher bolsa sebitleýin parahatçylygy üpjün ediş merkeziniň derejesinde şäher gurluşygynyň häzirki zaman däplerine eýerilip abadanlaşdyrylýar. Türkmen lideriniň başlangyjy bilen işlenilip taýýarlanylýan, paýtagtymyzyň medeni-işewür merkezini—Aşgabat-sitini emele getirýän hakyky täzeçil taslama hem muňa aýdyň şaýatlyk edýär.



Emele gelen däbe eýermek bilen, şu gün Garaşsyz Türkmenistan döwletini esaslandyryjy we onuň ilkinji Prezidenti Saparmyrat Nyyazowyn obasy Gypjakda Prezident Gurbanguly Berdimuhamedowyň adyndan uly sadaka berildi. Agyz beklenýän mahaly musulman dininiň kanunlaryna laýyklykda sadaka agzaçarda berildi.
Türkmenistanyň ähli şäherlerinde we obalarynda Ählihalk matam güni sadaka berildi we aýat-töwir edildi.