Şu gün, Garaşsyzlyk aýynyň 8-inde bütin yslam dünýäsi musulmanlaryň millionlarçasy üçin mukaddes saýylýan baýramçylyklaryň biri bolan gudratly Gadyr gijesini garşylaýar. Rowaýata görä, 610-njy ýylda hut mukaddes Oraz aýynyň 27-nji gününiň gijesinde Jabal an-Nur dagynyň Hira gowagynda Muhammet pygambere Gurhanyň ilkinji süresi ýollanylypdyr. Şondan bäri Lýalýatul-Kadr diýlip atlandyrylýan şol gije Allatagala adamlaryň ykbaly hakynda çözgüdi kabul edýär. Adam toba edip, Allatagaladan eden günäleriniň geçilmegini dileýär, Gurhan okap, öýke-kineleri bagyşlap, ýalňyşlyklary seljerip, geljek üçin meýilleri düzýär.

Türkmenistanlylar üçin Gadyr gijesi hakyky ynsanperwerligiň we rehimdarlygyň nyşanyna hem öwrüldi, sebäbi Garaşsyz, Bitarap döwletimizi esaslandyryjy we onuň ilkinji Prezidenti Beýik Saparmyrat Türkmenbaşy tarapyndan ýola goýlan däbe görä, şol gije kanuny bozan, ýöne öz eden etmişleri hakynda çynlakaý ökünýän adamlar barasynda ýokary derejede rehimdarlyk çäresi bilen dabaralanýar. Täze özgertmeleriň we progressiw reformalaryň eýýamynda hormatly Prezidentimiz Gurbanguly Berdimuhamedow Türkmenistanyň ynsanperwerlik we rehimdarlyk syýasatyna çuňňur ygrarlydygyny görkezdi. «Mukaddes Gadyr gijesi mynasybetli iş kesilenleriň günäsini geçmek hakynda» döwlet baştutanynyň çykaran Permanyna laýyklykda gudratly gijäniň öňüsyrasynda ak ýürekli zähmet çekip, asylly işler bilen jemgyýetiň we ýakynlarynyň öňündäki öz günäsini ýuwmak üçin 9 müňden gowrak adam dogduk ojagyna gaýdyp geldi.

Gadyr gijesi her bir öýe merhemet iner, azatlyga çykanlaryň öýlerinde adamlaryň gözlerinde şatlyk gözýaşlary buldurar, olaryň dillerinde bolsa edilen ynam we tämiz pikirler hem-de täze durmuşa başlamaga hoşniýetli meýiller bilen jemgyýete gaýdyp gelmäge berlen mümkinçilik üçin Gurbanguly Haja minnetdarlyk sözleri ýaňlanar. Ýerlerde ozalky iş kesilenlere işler garaşýar, günäsi geçilenlere kadaly durmuşa gaýdyp gelenlerinde diňe bir gulluk borjy boýunça bu iş bilen meşgullanmaly adamlar däl, eýsem biziň ähli watandaşlarymyz hem kömek bermäge taýýardyrlar. Rehimdarlyk, hoşniýetlilige bolan ynam, ýakynyňa kömek bermäge taýýar bolmak—bularyň hemmesi öz ata-babalarynyň wesýetlerine wepaly türkmen halkynyň ruhy medeniýetiniň özenini düzýär.