Daşoguz welaýatynyň Gurbansoltan eje adyndaky etrabynda doglan we häzirki wagtda sport ussatlygynyň ýokary mekdebinde kämillik ýoluny geçýän Ömürbek Bazarbaýew Taýlandyň Çiang-Maý şäherinde tamamlanan erkekleriň arasyndaky 79-njy dünýä çempionatynda 62 kilograma çenli agram derejesinde planetanyň güýçli ştangaçylarynyň bäşligine girdi.
Dünýäniň 79 ýurdunyň wekilleriniň gatnaşan bu ýaryşy, 2008-nji ýylda Pekinde geçiriljek Olimpiada gatnaşmaga hukuk berýär. Ondan hem başga, Olimpiada gatnaşmak üçin berilýän ygtyýarnamanyň sany dünýäniň soňky iki çempionatynda—2006-njy ýylda Santo-Domingoda (Dominikan Respublikasy) we 2007-nji ýylda Çiang-Maýda (Taýland) geçen çempionatlarda toparlaryň eýelän orny boýunça toplan sanyna baglydyr. Ygtyýarnamalar oçkolary hasaplamak ýoly bilen diňe ýurtlaryň 27-sine berildi, ýagny ilkinji 6 topar Olimpiada 6, galan 7 topar 5, 14-den 20-nji orunlardaky toparlar 4, ahyrky 21-den 27-nji orunlardaky toparlar hem 3 ýollanmadan aldylar.

Biziň ýygyndy toparymyzyň türgenleşdirijileri esasan 2004-nji ýylda talyplaryň arasynda geçirilen dünýä çempionatynyň çempiony, Aziýanyň 2004-nji ýyldaky çempionatynyň bürünç baýragynyň eýesi, 2000-nji ýylda Sidneýde we 2004-nji ýylda Afinada geçen Olimpiýa oýunlaryna we 2002-nji ýylda Pusanda (Koreýa) we 2006-njy ýylda Dohada (Katar) geçen Aziýa oýunlaryna gatnaşan Ömürbek Bazarbaýewe, şeýle hem onuň ýanyndaky beýleki agyr atletikaçylara bil bagladylar.

Baýrakly orunlar ugrunda 62 kilogram agrama çenli derejede 35 ýurtdan ştangaçylaryň 47-si özara bäsleşdiler. Bäsdeşleriniň şeýle köpdügine garamazdan, türkmen toparynyň lideri ýokary derejä galmagy başardy. Ömürbek ştangany bat bilen götermekde 132 kilogram bilen ýedinji netijäni görkezdi we ikinji maşkda ştangany itip galdyrmak boýunça hem ilkinji iki synanyşygy netijeli peýdalandy. Ol başda 156 kilogramy galdyrdy, soňra bolsa 162 kilogramy galdyryp Türkmenistanyň rekordyny täzeledi. Ol 2003-nji ýylda Wankuwerde (Kanada) geçen dünýä çempionatynda göteren agramyndan 2 kilogram artyk göterdi. Ahyrky synanyşykda 26 ýaşly halkara derejeli sport ussady, Türkmenistanyň milli ýygyndy toparynyň baş türgenleşdirijisi Ikram Mätkerimowyň ýetişdiren türgeni 165 kilogramy galdyrmaga synanyşdy. Eger-de ony galdyryp bilen bolsa, ol Bazarbaýewe ilkinji gezek ulularyň arasyndaky çempionatda kiçi bürünç medaly gazanmaga mümkinçilik bererdi. Emma ol oňa başartmady. Netijede, Ö.Bazarbaýew ştangany itip galdyrmak boýunça bäşinji orny eýeledi we ştangany götermegiň iki görnüşi boýunça 294 kilogram göterip, Türkmenistanyň ýene bir rekordyny täzeledi. Bu bolsa onuň dört ýyl mundan ozal Wankuwerde geçen dünýä çempionatynda görkezen netijesinden 1,5 kilogram köpdür. Ömürbek iki ýyl mundan ozal Katarda geçen dünýä çempionatynda 286 kilogram netije bilen altynjy, 2004-nji ýylda Gresiýada geçen soňky Olimpiadada hem ştanga götermegiň iki görnüşi boýunça 287,5 kilogram netije bilen ýedinji orny eýeledi.

Ö.Bazarbaýew teswirnamanyň jemleri boýunça 2006-njy ýylyň dünýä çempionatynyň bürünç baýragynyň dördünji eýesi Oskar Figuýeradan (Kolumbiýa) bary-ýogy 1, bürünç medalynyň eýesi Iwaýlo Filewden (Bolgariýa) hem 7 kilogram yza galdy. 62 kilograma çenli agram derejede altyny eýelän KHDR-iň wekili Im Ýon Sundan hytaýly Ýan Fanyň öz agramynyň has ýeňil gelendigi sebäpli altyn hytaýly Ýan Fana berlip, ol dünýäniň çempiony boldy. Türgenleriň ikisi hem 315 kilogramy galdyrmagy başardy, ýöne Ýanyň öz agramy Imden 140 gramm ýeňil geldi.
21 ýaşly halkara derejeli sport ussady, 2004-nji ýylda talyplaryň arasynda geçirilen dünýä çempionatynyň kümüş baýragynyň eýesi Tolkunbek Hudaýbergenow öz ýarawsyzlygyna garamazdan şol agram derejede mertlerçe çykyş edip we öz şahsy rekordyny (276 kilogram) gaýtalap, hormatly 18-nji orny eýeledi. Türkmenistanyň ýene bir wekili, türkmen toparyna hasap oçkosyny toplamaga ýardam beren, Milli sport we syýahatçylyk institutynyň 25 ýaşly talyby Mansur Rejebow 22-nji orny eýeledi.

Toparlaýyn hasapda türkmen ştangaçylary 27-nji orny eýelediler. Olar bir ýyl mundan ozal Santo-Domingoda geçen dünýä çempionatynda 37-nji orny eýeläpdiler. Dünýäniň çempionatlarynyň ikisiniň netijeleri boýunça Türkmenistanyň ýygyndy topary 29-njy orny eýeläp, Olimpiada gitmek üçin berilýän ygtyýarnamalaryň üçüsini almaga 18 oçkosy ýetmedi.
Olimpiada ýollanma alanlar doping gözegçiliginiň derňewleriniň, şeýle hem 2008-nji ýylda Ýaponiýada geçiriljek Aziýa çempionatynyň netijelerinden soň belli bolar. Şol çempionatda Olimpiada gatnaşmaga ygtyýarnamalaryň ikisini almak üçin türkmen agyr atletikaçylaryna toparlaýyn hasapda birinji ýa-da ikinji orny eýelemegi zerur bolup durýar. Ildeşlerimize wezipäniň hötdesinden gelmek başartmasa, onda Türkmenistanyň ýygyndy toparynyň lideri, 62 kilograma çenli agram derejede dünýäniň güýçli ştangaçylarynyň bäşligine girýän Ömürbek Bazarbaýew 2008-nji ýyldaky Olimpiada gatnaşmak üçin şahsy ýollanma alar. Ýöne ol 2008-nji ýylyň Oguz aýynyň 1-inden güýje girýär diýip, Agyr atletika boýunça milli merkeziň başlygy Artur Emirýan TDH-niň habarçysyna habar berdi.