Düýn agşam Türkmenistanyň Prezidenti Gurbanguly Berdimuhamedow nobatdaky iş sapary bilen Aşgabada aýlanyp, birnäçe möhüm desgalaryň gurluşygynyň barşyny barlady, şeýle hem täze şäher gurluşyklary üçin ýerleri kesgitledi.

Gurbanguly Berdimuhamedow Aşgabadyň demirgazyk bölegine baryp, täze söwda toplumynyň gurulmagy göz öňünde tutulýan ýeri bilen tanyşdy, şol ýerde döwlet baştutanyny Ministrler Kabinetiniň Başlygynyň orunbasary N.Şagulyýew we şäheriň häkimi D.Orazow garşyladylar. Täze söwda toplumynyň ägirt uly meýdanynda häzirki wagtda «jygyldyk» diýlip atlandyrylýan täze lomaý-söwda bazary ýerleşer. Döwlet baştutanyna habar berlişi ýaly, Söwda we alyjylar birleşmeleri ministrligi eýýäm toplumy gurmak üçin halkara tenderini yglan etdi we potratçy kesgitlenilen badyna taslamany durmuşa geçirip başlar.

Gurbanguly Berdimuhamedow söwda merkeziniň ýerleşýän ýeri baradaky teklibi goldap, onuň halkara standartlaryna laýyk gelmeginiň zerurdygyny nygtady. Döwlet baştutany ýanaşyk ýerleri abadanlaşdyrmak meselelerine aýratyn üns berdi. Hormatly Prezidentimiz, hususan-da, täze bazara eltýän ýoluň ugrunda amatly duralgalary gurup, onuň durkuny täzelemek barada görkezme berdi. Şeýle hem şäheriň bu böleginde ýerasty suwlarynyň döredýän howpuny aradan aýyrmak babatda teklipleri işläp taýýarlamak barada görkezme berildi. Döwlet baştutanymyzyň belleýşi ýaly, bu işe şäher infrastrukturasyny ösdürmegiň möhüm ugry hökmünde seredip, meseleleriň çözülmegine toplumlaýyn çemeleşilmelidigini nygtady.
Soňra Gurbanguly Berdimuhamedow Bitarap Türkmenistan şaýolunyň demirgazyk böleginde guruljak desgalaryň taslamalary bilen tanyşdy. Bu şaýoluň ugrunda ýakyn geljekde häzirki zaman supermarketler we edara ediş binalary gurlar. Hormatly Prezidentimiz hödürlenen taslamalary umuman makullap, şol supermarketleriň geljekde dünýä tejribesinde bolşy ýaly, hususy eýeçilige berlip biljekdigini belledi. Ynha, şonuň üçin hem ýurdumyzyň hususy sektorynyň wekilleri gurluşyklara häzirden belli bir möçberde maýa goýup, geljekdäki biznesiniň esaslaryny tutup bilerler diýip, hormatly Prezidentimiz belledi.

Soňra ýaşaýyş jaý maksatnamasynyň durmuşa geçirilişiniň barşy bilen tanşyp, Gurbanguly Berdimuhamedow bu ugurda işiň depginlerini ýokarlandyrmagyň möhümdigini nygtady, desgalaryň ýokary hilliliginiň we ygtybarlylygynyň üpjün edilmegini talap etdi. Döwlet baştutany Türkmenistanyň Garaşsyzlygynyň 16 ýyllygynyň baýramçylygyna çenli «Parahat» toplumynda täze ýaşaýyş jaýlarynyň birnäçesiniň ulanmaga beriljekdigini, olarda aşgabatlylaryň maşgalalarynyň onlarçasynyň täze jaý toýlaryny tutjakdygyny maglumat hökmünde kabul etdi.
Özüniň iş saparynyň barşynda hormatly Prezidentimiz şeýle hem Aşgabat-Daşoguz awtoulag ýolunda abadanlaşdyryş işleriniň barşy bilen tanyşdy.