Düýn Türkmenistanyň Prezidenti Gurbanguly Berdimuhamedow ýurdumyzyň Içeri işler ministrliginde giňişleýin maslahat geçirdi, şol maslahatda içeri işler ministri H. Annagurbanowyň günäsi bilen we başdan sowmalygynda ýol berlen gödek düzgün bozulmalary halka ýetirip, IIM-iň hatarlarynda kanunçylygy pugtalandyrmagyň meselelerini gozgady.

Döwlet baştutany bu ýere ýygnanan ýolbaşçylara, ilkinji nobatda hukuk goraýjy edaralaryň ýolbaşçylaryna ýüzlenip, şu zalda şu ýylyň ýazynda bolan gürrüň hakynda ýatlatdy. Hormatly Prezidentimiz täze galkynyş eýýamynda kanuny goraýjylaryň öňünde goýlan wezipeler, Türkmenistany syýasy, sosial-ykdysady we ruhy taýdan ösdürmegiň strategiki maksatlary hakynda gürrüň boldy diýip aýtdy. Gurbanguly Berdimuhamedow bu maksatlara tarap ýolunda Türkmenistanyň parahatçylyk, hoşniýetli goňşuçylyk we açyklyk syýasatyny yzygiderli durmuşa geçirýän ýurt hökmünde halkara abraýyna mynasyp bolup, eýýäm uly üstünlikleri gazanandygyny belledi hem-de döwlet gurluşygynyň ileri tutulýan ugurlaryna we ilkinji nobatda raýatlaryň azatlyklaryny we kanuny hukuklaryny goramak baradaky konstitusion normalara gyşarnyksyz eýermek babatda hukuk goraýjy edaralaryň öňünde durýan wezipeleri häsiýetlendirdi. Milletiň lideri munuň häzirki zaman türkmen jemgyýetini ösdürmegiň esasy ýörelgesidigini nygtap, Türkmenistanyň ýurdumyzyň progresiniň we gülläp ösmeginiň aýrylmaz şerti hökmünde demokratiki ösüşiň möhüm talaplaryna ygrarlydygyny tassyklady.

Gurbanguly Berdimuhamedow bu babatda hukuk goraýjy edaralaryna möhüm orun berilýändigi barada söz açyp, döwletimiziň olaryň maddy-tehniki binýadyny pugtalandyrmak, işgärleriň hünär taýýarlygyny kämilleşdirmek boýunça ägirt uly tagalla edýändigini belledi. Bu düzümleriň hajatlary üçin häzirki zaman tehnikasy satyn alynýar, täze binalar, şol sanda ýokary okuw mekdepleri gurulýar.

Gynansak-da, jemgyýetde agzybirligi we ylalaşygy pugtalandyrmaly, kanunçylygyň hem-de tertip-düzgüniň goragynda durmaly hukuk goraýjy edaralaryň işini düýpli gowulandyrmak barada biziň beren tabşyryklarymyz häzirlikçe berjaý edilmedi diýip, hormatly Prezidentimiz nygtady. IIM-niň ulgamynda amatsyz ýagdaýyň emele gelendigini boýun almak gerek.
Soňra çykyş eden Türkmenistanyň Baş prokurory M. Ogşukow IIM-niň ulgamynda geçirilen barlaglaryň netijeleri hakynda habar berdi, şol barlaglaryň barşynda ministrligiň ýokary derejedäki ýolbaşçylary tarapyndan hem, onuň düzüm birlikleri tarapyndan hem wezipe düzgün bozmalarynyň köp sanly halatlarynyň üsti açyldy. Barlaglaryň maglumatlarynyň galplaşdyrylmagynyň, hasabatlaryň ýoýulmagynyň, özi-de diňe bir bilgeşleýin däl, eýsem ministriň gös-göni görkezmesi bilen şeýdilendiginiň köp sanly halatlary ýüze çykaryldy. Mysal üçin, H.Annagurbanow öz ýegeniniň eden düýpli jenaýatyny gizlemek barada görkezme beripdir.

Gurbanguly Berdimuhamedow kanunlara hormat goýmak döwletiň we her bir raýatyň mukaddes borjudyr diýip nygtady. Hukuk goraýjy edaralaryň işgärleri we has-da onuň ýolbaşçylary bu meselede görelde bolmalydyrlar, ýöne üsti açylan faktlaryň şaýatlyk edişi ýaly, IIM-de bolsa kanun gözçykgynç ýagdaýda äsgermezlik edilipdir diýip, hormatly Prezidentimiz aýtdy.
Şu gün biz emele gelen ýagdaýa açyk we aç-açan garamalydyrys hem-de oňa obýektiw baha bermelidiris, döwlet tarapyndan içeri işler edaralaryna berlen hukuklaryň we ygtyýarlyklaryň äsgermezlik edilmeginiň, eden-etdiligiň nä derejede we näme üçin mümkin bolandygy baradaky sowala aýyl-saýyl jogap bermelidiris diýip, hormatly Prezidentimiz aýtdy. Sebäbi alym-berimiň we parahorlugyň zyýanly ýagdaýyndan başga hukuk goraýjy edaralaryň işiniň esasyny düzýän adalatlylyk we gumanizm prinsipleriniň özi hem äsgermezlik edilipdir.

Şeýlelikde, H. Annagurbanow wezipä bellenilenden soň bada-bat garyndaşparazlyk ýa-da tanyş-bilişlik halatlarynyň ýüze çykmagyna ýol berilmeli däldigi barada duýduryldy diýip, döwlet baştutany belledi. Emma ol bu talapdan netije çykarmady. Şunuň bilen baglylykda, hiç kime, has beteri hem ýolbaşçylara ýurdumyzyň we halkymyzyň bähbitlerini öz bet niýeti üçin ulanmaga ýol berilmez diýip, hormatly Prezidentimiz nygtady. Biz bu kadanyň jemgyýetimizde gyşarnyksyz berjaý edilmegini hökman gazanarys. Şu günki söhbetdeşlik hem bu ugurda ädilen ädim bolar.

Türkmenistanyň Prezidentiniň ýanyndaky Hukuk goraýjy edaralaryň işiniň meseleleri boýunça raýatlaryň ýüz tutmalaryna garamak baradaky döwlet toparyna gelip gowuşýan hatlar we arzalar jemgyýetçilik pikiriniň özboluşly barometridir diýip, Gurbanguly Berdimuhamedow sözüni dowam etdirdi, şol jemgyýetçilik pikiri bolsa bu hukuk goraýjy edaralaryň peýdasyna däldir. Soňky wagtlarda degişli wezipeli adamlaryň kanuna ters gelýän hereketleri barada raýatlaryň şikaýatlarynyň sany iki esse artdy. Munuň özi IIM-niň işindäki düzgün bozulmalaryň, onuň işiniň prinsiplerini üpjün etmäge gowuşgynsyz çemeleşmegiň gös-göni netijesidir, ministrligiň häzirki ýolbaşçylary bolsa hut şeýle işlediler. Gönüsini aýtsaň, ministrligiň işiniň stili we usullary günüň talaplaryna laýyk gelmeýär, laýyk gelmezlik bilen hem çäklenmän, Türkmenistanda hakykatda ähli ugurlarda geçirilýän özgertmelere päsgel berýär. Özgertmeleriň täsiri göýä IIM-ne degişli däl ýaly, bu ýerde jogapkärçiligiň, iş başarjaňlygyň, talap edijiligiň derejesi örän pese düşüpdir. Gurbanguly Berdimuhamedow ýangyn howpsuzlygyna jogap berýän podrazdeleniýeleriň işini mysal getirdi. Hormatly Prezidentimiziň nygtaýşy ýaly, bu ýerde desgalaryň ýangyn howpsuzlygy kadalaryna laýyk gelýändigi babatda tutuşlaýyn tükellemäni geçirmek baradaky görkezmelerden degişli netije çykarylmandyr. Şonuň netijesinde paýtagtymyzyň merkezi bazarynda uly ýangyn boldy.

Tertip-düzgüni goraýjylaryň abraýyna düýpli zeper ýetirildi we olar öz at-abraýlaryny dikeltmek üçin yhlas bilen işlemeli bolarlar diýip, döwlet baştutany nygtady. Emma welin biziň üçin jemgyýetde Kanunyň rüstemligini, onuň ileri tutulmagyny berkarar etmek has möhümdir. Hut şu wezipä ilkinji nobatda içeri işler edaralarynyň hem-de ähli hukuk goraýjy organlaryň işleri tabyn edilmelidir. Dogrusy, olaryň adynda hem ýurdumyzyň Konstitusiýasy tarapyndan kepillendirilen we döwlet kanunlaryna laýyklykda işlenip taýýarlanylan hukuklary goramagyň esasy wezipesi beýan edilendir. Gurbanguly Berdimuhamedow bular barada aýdyp, hukugyň ileri tutulmagy türkmen halkynyň mynasyp durmuşyny üpjün etmäge, ýurdumyzyň abadançylygyna hem-de gülläp ösmegine gönükdirilen döwlet syýasatyny durmuşa geçirmegiň möhüm ugrudyr diýip nygtady.

Döwlet baştutany ministrlige ýolbaşçylyk etmegi üpjün etmedik, kanunçylygyň köp sanly bozulmalaryna ýol beren adam bu wezipä mynasyp däldir diýip nygtady we H. Annagurbanowy içeri işler ministri wezipesinden boşatmak baradaky teklibi Türkmenistanyň Mejlisine iberjekdigini habar berdi. Hormatly Prezidentimiz bu wedomstwa täze ýolbaşçy edip, öň Türkmenistanyň Beýik Saparmyrat Türkmenbaşy adyndaky Harby akademiýanyň rektory bolup işlän O. Amanmyradowy bellemegi teklip etdi.

Işde goýberen düýpli kemçilikleri üçin N. Ýagmyrow we M. Ataýew içeri işler ministriniň orunbasarlary wezipelerinden boşadyldy.

Gurbanguly Berdimuhamedow maslahatyň barşynda işgärleri wezipä bellemegiň ýene-de bir uly meselesini çözdi. Hormatly Prezidentimiz Türkmenistanyň Milli howpsuzlyk ministri G. Aşyrmuhammedowyň saglyk ýagdaýyna görä bu wezipeden boşatmak baradaky haýyşyny kanagatlandyryp, bu wezipä Ç. Amanowy belledi.

Gurbanguly Berdimuhamedow türkmenistanlylaryň hil taýdan täze durmuşyny üpjün etjek reformalaryň we başlangyçlaryň üstünlikli öňe gitmeginiň iňňän möhüm şertleri bolan türkmen jemgyýetiniň asuda, parahat we döredijilikli durmuşynyň sütünlerini berkitmekde milli howpsuzlyk edaralarynyň ornuny nygtap, bu düzümiň işini mundan beýläk-de kämilleşdirmek baradaky wezipeleri öňde goýdy. Şunda bu babatda kanuna berk eýermek, hususan-da, şahsyýetiň azatlyklaryny we hukuklaryny goramak boýunça onuň talaplaryny ýerine ýetirmek möhüm wezipedir diýip hormatly Prezidentimiz ýene bir gezek nygtady.

Gurbanguly Berdimuhamedow maslahat tamamlanandan soň, hukuk goraýjy edaralaryň işgärleriniň ählisini dogruçyl, päk ýürekli, doly güýç bilen işlemäge çagyryp, olar bu bolan söhbetdeşlikden netije çykararlar we Kanuna gulluk edýänleriň belent adyny ödärler diýip, ynam bildirdi.