Garaşsyzlyk aýynyň 9-yna türkmen paýtagtynda golaýlap gelýän baş baýrama—mukaddes Garaşsyzlygyň 16 ýyllygyna gabatlap, ýaşaýyş jaýlarynyň ilkinjisi ulanmaga berildi. Şäheriň esasy köçeleriniň biri Bitarap Türkmenistan şaýolunda «Sehil» belli türk firmasy dört gatly, ak mermere bürelen, owadan ýaşaýyş jaýyny gysga wagtda gurdy we ony iş buýruja—«Türkmenpagta» döwlet konsernine tabşyrdy.

Meýdany 75-100 kwadrat metr bolan, iki we üç otagly 24 öýüň köpüsini ipoteka kreditini ulanyp, döwlet konserniniň işgärleri satyn aldylar, galany bolsa şäher häkimliginiň üsti bilen aşgabatlylara satylar. Täze jaýda aşhanalar we sanitariýa uzelleri zerur enjamlar we durmuş tehnikasy bilen üpjün edildi. Jaýlaryň ählisine telefon çekilip, merkezleşdirilen ýyladyş we ýelejirediş ulgamy bilen üpjün edilendir. Binanyň töwereginde gazonlar ýerleşdirilipdir, nahallar oturdylypdyr, oturgyçlar we yşyklandyryjylar goýlupdyr, onuň golaýynda çagalar we sport meýdançalary, şeýle hem ýerasty awtoduralga we dürli çäreleri geçirmek üçin ýer enjamlaşdyrylypdyr. Bu bina «Türkmenpagta» döwlet konserniniň soňky ýyllarda öz serişdeleriniň hasabyna guran bäşinji jaýydyr. Şu edaranyň tabşyrygy bilen köpgatly belent jaýlaryň ýene ikisi paýtagtyň günorta böleginde gurulýar.

Ýakyn ýyllarda Bitarap Türkmenistan şaýolunyň demirgazyk böleginde tutuşlygyna döwrebap, oňaýly ýaşaýyş jaýlary gurlar. Şeýle hem bu ýerde dokma toplumynyň ikinji nobatdakysy işe giriziler, «KAMAZ» serwis merkeziniň jaýlary we tranzit awiaýolagçylar üçin myhmanhanalar gurlar. Şu günler ýoluň Türkmenistanyň Gahrymany Atamyrat Nyýazow adyndaky şaýol bilen kesişýän ýerindäki çüwdürimiň durky täzelenip başlandy. Ýene birnäçe aýdan ol işe girizilip, ýurduň baş şäheriniň özboluşly gözellikleriniň biri bolar.

Paýtagtyň sazlaşykly ösýän şu künjegi Bitarap Türkmenistan şaýolunda döwrebap supermarketler we edara jaýlary gurlandan soň öz gutarnykly görnüşine girer. Mälim bolşy ýaly, türkmen döwletiniň baştutany Gurbanguly Berdimuhamedow Aşgabada golaýdaky iş saparynyň barşynda olaryň taslamasyny goldady.