Garaşsyzlyk aýynyň 9-yna Türkmenistanyň Prezidenti Gurbanguly Berdimuhamedow wekilçilikli delegasiýanyň ýolbaşçysy hökmünde Türkmenistana gelen GDA-nyň ýerine ýetiriji komitetiniň başlygynyň birinji orunbasary W.Garkuny kabul etdi.

Myhman Türkmenistanyň baştutany bilen mähirli salamlaşyp, Gurbanguly Berdimuhamedowa Belarus Respublikasynyň ýolbaşçylygynyň iň gowy arzuwlaryny aýtdy. Mälim bolşy ýaly, GDA-nyň ştab-kwartirasy şol ýerde ýerleşýär. Şeýle hem W.Garkun türkmen paýtagtyna Minsk-Aşgabat aralygyndaky täze awiareýs bilen gelendigini belledi. Munuň özi türkmen lideriniň giň halkara hyzmatdaşlygyna gönükdirilen oňyn syýasaty ýöredýändigini görkezýän nobatdaky subutnama bolup durýar. GDA-nyň ýerine ýetiriji komitetiniň başlygynyň orunbasary Gurbanguly Berdimuhamedowa Duşenbe şäherinde geçirilen GDA-nyň sammitine gatnaşandygy üçin hem-de Arkalaşyga girýän ýurtlaryň hökümetleriniň baştutanlarynyň Geňeşiniň nobatdaky mejlisini Aşgabatda geçirmegi teklip edendigi üçin minnetdarlyk bildirdi.

Gurbanguly Berdimuhamedow aýdylan ýagşy sözler üçin minnetdarlyk bildirip, Belarusyň ýolbaşçylygyna öz salamyny ýollady hem-de türkmen paýtagtynyň belent mertebeli myhmanlary garşy almak üçin taýýardygyny we üstünlikli işlemek üçin ähli şertleriň dörediljekdigini belledi. Türkmen lideri Türkmenistanyň giň halkara hyzmatdaşlygyny ýola goýmak we berkitmek meseleleri boýunça gyşarnyksyz eýerýän ýörelgesini beýan etdi hem-de şol ýörelgäniň türkmen döwletiniň açyklygy, dostlugy we hoşniýetli goňşuçylygy ugur edinip ýöredýän syýasatynyň möhüm prinsiplerine laýyk gelýändigini belledi. Hormatly Prezidentimiziň bellemegine görä, häzirki wagtda garaşsyz döwletler öz gatnaşyklaryny täze esasda -milli we umumy bähbitleri oňaýly utgaşdyrmak, özara bähbitlilik we deňhukukly hyzmatdaşlyk arkaly gurýarlar. Gurbanguly Berdimuhamedow Türkmenistanyň GDA-nyň assosirlenen agzasy hökmünde şol derejeden has işjeň ýagdaýda peýdalanjakdygyny hem-de ikitaraplaýyn we köptaraplaýyn görnüşde netijeli gatnaşyklary ösdürmek arkaly Arkalaşygyň işine gatnaşjakdygyny tassyklady.
Duşuşykda Sanjar aýynyň 22-sinde Aşgabatda GDA girýän ýurtlaryň hökümetleriniň ýolbaşçylarynyň Geňeşiniň mejlisini geçirmek bilen bagly meselelere, hususan-da, onuň meýilnamasyna, guramaçylyk meseleleriniň birnäçesine garaldy.

Duşuşygyň ahyrynda söhbetdeşler edilen gürrüň babatda kanagatlanma bildirip, GDA-nyň çäklerinde deňlik, ykdysady taýdan maksadalaýyklyk hem-de adata öwrülen dostlukly gatnaşyklara we hyzmatdaşlyga hormat goýmak ýörelgeleri esasynda mundan beýläk-de netijeli hyzmatdaşlyk edilmelidigi barada aýtdylar.