Garaşsyzlyk aýynyň 9-yna Türkmenistanyň Prezidenti Gurbanguly Berdimuhamedow «IPC Consult International» kompaniýasynyň ýolbaşçysy Ýaşar Inçesuwy kabul etdi. Gyzyklanma bildirilen söhbetdeşligiň barşynda Türkmenistanyň hökümetiniň bu kompaniýa bilen hyzmatdaşlygynyň ýagdaýy we perspektiwasy ara alnyp maslahatlaşyldy.

Duşuşmaga döredilen mümkinçilik üçin Türkmen döwletiniň baştutanyna minnetdarlyk bildirip, türkiýeli biznesmen kompaniýanyň işi we Türkmenistan bilen özara bähbitli hyzmat¬daşlygy berkitmek üçin «IPC Consult International» kompaniýasynyň edýän netijeli tagallalary barada habar berdi.

Tehniki taýdan ýokary hilliliginiň döwrebap dizaýnyň we ýokary amatlylygyň utgaşygy «IPC Consult International» kompaniýasynyň getirýän awtomobilleriniň esasy artykmaçlygydyr diýip, döwlet baştutany aýtdy, hut şu sazlaşyk hem Türkmenistanyň siziň kompaniýaňyz bilen uzakmöhletleýin hyzmatdaşlygyny kesgitläpdi, kompaniýa indi ençeme ýyl bäri türkmen bazarynda netijeli işläp gelýär. Siziň getirýän awtomobilleriňiz ýük we ýolagçy daşaýar, halk hojalygynyň pudaklaryna hyzmat edýär, ýurduň ykdysady toplumynyň dürli sferalarynda netijeli ulanylýar diýip, Gurbanguly Berdimuhamedow belledi.

Şu jähtden täze, perspektiwaly bilelikdäki taslamalar barada pikir alşyldy. Ýaşar Inçesuwyň aýtmagyna görä, ozal gazanylan ylalaşyklaryň çäklerinde paýtagtyň kommunal hojalygynyň hajatlary üçin ýakyn wagtda ýokary öndürijilikli ýörite tehnikanyň uly tapgyry getiriler. Myhman şeýle hem Aşgabadyň awtoparky üçin kiçi awtobuslaryň gerek möçberiniň getirilmeli möhletiniň çaltlandyryljakdygyna döwlet baştutanyny ynandyrdy.

Duşuşygyň ahyrynda öz işine berlen ýokary baha we bildirilen ynam üçin döwlet baştutanyna minnetdarlyk bildirip, türk biznesmeni ýakyn wagtda hyzmatdaşlyk barada täze teklipleri taýýarlamaga taýyndygyny we türkmen halkynyň abadançylygynyň we Türkmenistanyň gülläp ösmeginiň hatyrasyna hormatly Prezidentimiziň başlangyjy boýunça işlenip taýýarlanylýan ägirt uly taslamalary üstünlikli durmuşa geçirmekde tagalla baryny etjekdigini aýtdy.