Garaşsyzlyk aýynyň 9-yna Türkmenistanyň Prezidenti Gurbanguly Berdimuhamedow Ýewropa Bileleşiginiň daşary syýasat we howpsuzlyk boýunça Ýokary wekili Hawýer Solanany, şeýle hem ÝEB-niň Merkezi Aziýa ýurtlary boýunça ýörite wekili Pýer Moreli kabul etdi. Olar türkmen paýtagtyna sapar bilen geldiler. Duşuşygyň barşynda Türkmenistan bilen Ýewropa Bileleşiginiň arasyndaky hyzmatdaşlygyň ýagdaýy we geljegi barada özara gyzyklanma bildirilip pikir alşyldy. Şol hyzmatdaşlyk parahatçylygyň, hoşniýetliligiň we giň halkara gatnaşyklarynyň potensialyny pugtalandyrmagyň maksatlaryna laýyk gelýär.

Gurbanguly Berdimuhamedow we Hawýer Solana birek-biregi mübärekläp, ikitaraplaýyn gatnaşyklaryň ileri tutulýan meselelerini ara alyp maslahatlaşmagy dowam etdirmek üçin täze mümkinçilige kanagatlanma bildirdiler. Häzir bu gatnaşyklar hil taýdan täze tapgyra çykýar. Türkmenistanyň Prezidenti bilen ÝEB-niň Ýokary wekiliniň ilkinji duşuşygy ýakynda Nýu-Ýork şäherinde bolupdy. Şol ýerde türkmen döwletiniň baştutany Birleşen Milletler Guramasynyň Baş Assambleýasynyň 62-nji sessiýasynyň işine gatnaşdy we ikitaraplaýyn gepleşikleriň ençemesini geçirdi.

Hawýer Solananyň belleýşi ýaly, Brýusselde, ÝEB-niň ştab-kwartirasynda türkmen lideriniň geljekki saparyna ruhubelentlik bilen garaşýandyklaryny aýtdy. Munuň özi Ýewropa Bileleşiginiň Garaşsyz, Bitarap Türkmenistan bilen konstruktiw gatnaşyklary mundan beýläk hem pugtalandyrmaga we ösdürmäge çalyşýandygyna şaýatlyk edýär. Söhbetdeşligiň dowamynda ýokary wezipeli myhman özüniň Aşgabada haýran galýandygyny aýdyp, bary-ýogy birnäçe ýylda düýpli özgeren şäheriň öňküden hem gözel keşbe girendigini belledi. Ol türkmen paýtagtynda 1998-nji ýylda bolupdy.

Gurbanguly Berdimuhamedow myhmany özüniň geçirýän reformalar syýasatynyň ileri tutulýan ugurlary bilen tanyşdyryp, şeýle hem ýewropa ugrunyň Türkmenistanyň daşary syýasy strategiýasynyň ileri tutulýan ugurlarynyň biri bolup durýandygyny tassyklady, soňky ýyllarda ÝEB bilen ýola goýlan netijeli gatnaşyklara ýokary baha berdi. Hormatly Prezidentimiz TASIS maksatnamasynyň çäklerindäki gatnaşyklary hyzmatdaşlygyň aýdyň mysaly hökmünde görkezdi. Şu gatnaşyklaryň netijesinde bilelikdäki taslamalaryň ençemesi durmuşa geçirildi. Döwlet baştutanynyň nygtaýşy ýaly, Türkmenistan we ÝEB Merkezi Aziýa sebitinde hem-de bütin dünýäde howpsuzlygyň we durnuklylygyň hatyrasyna tagallalary birleşdirip, neşe dolanyşygyna we häzirki dünýäniň beýleki nogsanlyklaryna garşy göreşmek ýaly möhüm ulgamda hem üstünlikli hyzmatdaşlyk edýärler.

Duşuşygyň barşynda söhbetdeşler Türkmenistan bilen Ýewropa Bileleşiginiň netijeli gatnaşyklarynyň çalt depginler bilen ösýändigini belläp, iki tarapyň hem köp ugurlar boýunça özara bähbitli hyzmatdaşlygy giňeltmäge we işeňňirleşdirmäge gyzyklanma bildirýändigini tassykladylar. Ýangyç-energetika toplumynda hyzmatdaşlyk etmek söhbetdeşligiň aýratyn temasyna öwrüldi. Türkmenistan we ÝEB ýurtlary şu ugurda özara bähbitli hyzmatdaşlygyň uly geljeginiň bardygyny belleýärler.

Prezident Gurbanguly Berdimuhamedowyň nygtaýşy ýaly, Türkmenistan özüniň baý uglewodorod gorlaryny bütin adamzadyň hyzmatyna goýmaga çalşyp, özüniň energiýa serişdelerini dünýä bazarlaryna ibermegiň köp wariantlylyk ýörelgesine eýerýär. Türkmenistan — Hytaý gaz geçirijisini gurmak bilen baglanyşykly taslamany durmuşa geçirmek, şeýle hem Hazarýaka gaz geçirijisini, günorta ugurda Owganystanyň üsti bilen Päkistana we Hindistana gaz geçirijisini çekmek meýilnamasy munuň aýdyň subutnamasy bolup durýar. Şu jähtden hormatly Prezidentimiz we myhman Ýewropa ýurtlaryna ýangyç ibermegiň marşrutynyň warianty hökmünde Transhazar gaz geçirijisiniň taslamasyny durmuşa geçirmegiň mümkinçilikleri babatda pikir alyşdylar. Gurbanguly Berdimuhamedow ýangyç-energetika toplumynda hyzmatdaşlygy ösdürmegiň möhümdigini belläp, Ýewropanyň kompaniýalaryny Hazaryň türkmen ýalpaklygyndaky geljegi uly uglewodorod ýataklaryny özleşdirmäge gatnaşmaga çagyrdy.

Öz nobatynda jenap Hawýer Solana Ýewropa Bileleşiginiň Türkmenistan bilen berk gatnaşyklary ýola goýmaga çalyşýandygyny tassyklady. ÝEB Türkmenistany ygtybarly we borçnamalaryny gyşarnyksyz ýerine ýetirýän hyzmatdaş hasaplaýar. Ýokary wezipeli myhman ýurdumyzyň sebitde eýeleýän möhüm geosyýasy ýagdaýy barada aýdyp, Merkezi Aziýada durnuklylygy üpjün etmegiň wajyp faktory hökmünde türkmen Bitaraplygynyň ornuny belledi. ÝEB-niň ýokary wezipeli wekili Ýewropa Bileleşigi bilen konstruktiw gatnaşyklary ösdürmäge çalyşýandygy üçin hormatly Prezidentimiz Gurbanguly Berdimuhamedowa minnetdarlyk bildirip, türkmen liderini ýakyndan tanaýandygyna tüýs ýürekden buýsanýandygyny nygtady. Myhman Gurbanguly Berdimuhamedowyň ýurda baştutan bolup, gysga döwrüň içinde dünýä möçberindäki progressiw syýasatçy hökmünde uly abraýa eýe bolandygyny, bu tanyşlygy dowam etdirmäge umyt edýändigini belledi.

Gurbanguly Berdimuhamedow we Hawýer Solana hoşlaşan mahaly Türkmenistan bilen ÝEB-niň arasyndaky gatnaşyklaryň mundan beýläk-de üstünlikli ösdüriljekdigine ynam bildirdiler. Türkmen lideriniň Brýussele boljak sapary şol gatnaşyklaryň taryhyna täze sahypany ýazar.

Duşuşyga Fransiýa Respublikasynyň Türkmenistandaky Adatdan daşary we Doly ygtyýarly ilçisi Kristian Leşerwi gatnaşdy.
Özüniň Aşgabada saparynyň çäklerinde ÝEB-niň daşary syýasat we howpsuzlyk boýunça Ýokary wekili Türkmenistanyň Daşary işler ministrliginde kabul edildi, şeýle hem ol ýurdumyzyň nebitgaz toplumynyň ýolbaşçylary bilen duşuşdy.