Düýn paýtagtymyzda Türkmenistanyň at gazanan sungat işgäri Annadurdy Almämmedowyň 70 ýyllyk ýubileýine bagyşlanan personal sergisi açyldy. Türkmenistanyň Döwlet çeperçilik akademiýasynyň sergi zalynda ýaýbaňlandyrylan uly ekspozisiýanyň düzümine ussadyň dürli ýyllarda döreden eserleriniň 200-den gowragy girizildi.
Aşgabadyň döwlet çeperçilik uçilişşesiniň we Daşkendiň A.N.Ostrowskiý adyndaky teatral-çeperçilik institutynyň uçurymy Annadurdy Almämmedowyň döredijiligi biziň ýurdumyzda hem, daşary ýurtlarda hem giňden bellidir. Özüniň professional işine ol teatr suratkeşi hökmünde başlapdy, ol spektakllaryň 40-dan gowragyny çeperçilik taýdan bezedi. 1966-njy ýyldan başlap, Annadurdy Almämmedow dürli sergilere yzygiderli gatnaşýar. Şeýlelikde, Beýik Britaniýanyň, Türkiýäniň, Eýranyň, Owganystanyň, Russiýanyň, Özbegistanyň we beýleki ýurtlaryň şekillendiriş sungatyny söýüjileri ussadyň işleri bilen tanyşmaga mümkinçilik aldylar. Onuň eserleri şeýle hem daşary ýurtlaryň hususy kolleksiýalarynda, şol sanda Gollandiýada, Siriýada, Rumyniýada we ABŞ-da saklanylýar.

Türkmenistanyň Medeniýet we teleradioýaýlymlar ministrliginiň, ýurdumyzyň Suratkeşler birleşiginiň we akademiýanyň ýolbaşçylarynyň bilelikdäki tagallalary arkaly guralan ýubileý sergisine gelen tomaşaçylar Annadurdy Almämmedowyň žiwopis we grafika işlerini görüp bilerler, şolaryň her birinde biziň daşymyzy gurşap alan dünýä onuň göz ýetirişi öz beýanyny tapypdyr. Ene topraga söýgini wasp edýän, türkmen tebigatynyň gaýtalanmajak gözelligini we sazlaşygyny özüne siňdiren şol eserleriň ählisi duýgularyň aňrybaş päkligi, çeperçilik pikiriniň ýönekeýligi we aýdyňlygy bilen ünsi çekýär. Annadurdy Almämmedowyň, ynha, eýýäm 40 ýyldan gowrak wagtyň dowamynda türkmen suratkeşleriniň ýaş nesilleriniň halypasy bolup gelýändigini hem bellemek gerek. Şoňa görä-de, häzirki sergide onuň eserleri bilen bir hatarda Türkmenistanyň Döwlet çeperçilik akademiýasynyň zehinli talyplarynyň işleri hem sergä çykarylypdyr, belli ussat häzir şol ýerde sapak berýär.

Annadurdy Almämmedowy döredijilik durmuşynda şanly waka we 70 ýyllyk ýubileýi mynasybetli mübäreklemäge onuň köp sanly kärdeşleri we şägirtleri geldiler. Serginiň açylyş dabarasyna şeýle hem medeniýet we sungat işgärleri, paýtagtymyzyň giň jemgyýetçiliginiň, köpçülikleýin habar beriş serişdeleriniň wekilleri, talyp ýaşlar gatnaşdylar. Annadurdy Almämmedowyň eserleri bilen aşgabatlylaryň we paýtagtymyzyň myhmanlarynyň Garaşsyzlyk aýynyň tutuş dowamynda tanşyp biljekdiklerini aýdylanlaryň üstüne goşaýmak galýar.