Garaşsyz, Bitarap Türkmenistanda hormatly Prezidentimiz Gurbanguly Berdimuhamedow tarapyndan durmuşa geçirilýän konstitusion reformalary amala aşyrmagyň ýolunda täze, täsirli çäre bolan möhüm jemgyýetçilik-syýasy waka taýýarlyk görmek giňden ýaýbaňlandyrylýar. Bitaraplyk aýynyň 9-ynda ýurdumyzda welaýat, Aşgabat şäher, şeýle hem Daşoguz welaýatynyň täze döredilen Ruhubelent etrabynyň halk maslahatlarynyň agzalarynyň ýerli häkimiýetiň wekilçilikli organlaryna dogruçyl we ak ýürekli zähmeti bilen watandaşlarynyň hormatyna hem-de ynamyna mynasyp bolan, abraýly halk wekillerini goşjak saýlawlar geçer.

Türkmenistanyň Konstitusiýasyna we saýlawlar hakyndaky kanunçylyga laýyklykda ýurdumyzda hemme ýerde giň saýlaw kampaniýasyna badalga berildi. Şol çäräniň çäklerinde Merkezi saýlaw toparynyň we welaýat saýlaw toparlarynyň birinji mejlisleri boldy, şolaryň barşynda saýlawlara taýýarlyk görmegi we saýlawlary ýokary guramaçylyk derejesinde geçirmegi üpjün etjek ilkinji nobatdaky çäreleriň meýilnamalary tassyklanyldy, saýlaw okruglary döredildi, şäher we etrap saýlaw toparlarynyň sanawlary tassyklanyldy.
Bellenilişi ýaly, öňde boljak saýlawlar hakyky halk häkimiýetiniň köp derejeli ulgamyny kemala getirmegiň ýolunda möhüm tapgyrdyr. Munuň özi Garaşsyz, Bitarap Türkmenistanyň türkmen jemgyýetini mundan beýläk-de demokratiýalaşdyrmagyň, şahsyýete, milli Konstitusiýada berkidilen ýokary ahlak prinsiplerine esaslanýan raýatlaryň hukuklaryny berk berjaý etmegiň ýolundan barýandygynyň ýene-de bir aýdyň şaýatnamasydyr.

Täze wekilçilikli organlar geňeşler, şäher we etrap halk maslahatlary bilen bilelikde, ýakyn ýyllarda hormatly Prezidentimiz Gurbanguly Berdimuhamedowyň syýasatyny, türkmen lideriniň jemgyýetimiziň we döwletimiziň durmuşynyň ähli ugurlaryny gurşap alýan progressiw reformalaryny, Türkmenistanyň ägirt uly ykdysady we ruhy potensialyny doly hem-de hemmetaraplaýyn durmuşa geçirmäge, milletimiziň agzybirligini pugtalandyrmaga, türkmen halkynyň maddy hal-ýagdaýyny ýokarlandyrmaga gönükdirilen ägirt uly durmuş-ykdysady maksatnamalaryny işeňňir durmuşa geçirijiler bolarlar. Bu talaplary nazara almak bilen, welaýat saýlaw toparlarynyň mejlislerinde başy başlanan jemgyýetçilik, syýasy çäresi hakynda ilatyň hemmetaraplaýyn habardar edilmeginiň, habar beriş serişdelerinde saýlaw kampaniýasyny wagyz etmegi üpjün etmegiň zerurdygyna aýratyn üns berildi. Jemgyýetçilik guramalarynyň aktiwistleri saýlawçylara halk häkimiýetiniň wekilçilikli organlarynyň agzalaryna saýlawlar hakyndaky Türkmenistanyň täze kanunynyň esasy düzgünlerini, saýlawçylaryň hukuklaryny we borçlaryny, ses bermegiň tertibini we başgalary düşündirmek boýunça uly guramaçylyk hem-de agitasion işi geçirmeli bolarlar.

Türkmenistanda saýlawlary we sala salşyklary geçirmek baradaky Merkezi toparyň goldaw bermeginde ýurdumyzyň şäherlerinde we obalarynda ähli saýlaw uçastoklary kanunçylyk namalarynyň tekstleri bolan kitapçalar, şeýle hem köp dürli usulyýet gollanmalary, ýatlama kitapçalary, kadalaşdyryjy resminamalar, aň-düşünje berýän edebiýat, döwlet nyşanlary şekillendirilen plakatlar, transparantlar bilen üpjün ediler. Şeýlelikde, saýlawçylar islendik wagtda saýlawlar hakynda doly maglumatlary alyp bilerler.