Tiz wagtdan planetamyzyň dürli künjeklerinde tomaşaçylaryň millionlarçasy türkmen halkynyň baý medeni mirasy we Garaşsyz, Bitarap Türkmenistanyň häzirki güni hakyndaky täze dokumental filme tomaşa ederler.

Ozal habar berlişi ýaly, UNESKO-nyň buýurmasy boýunça biziň ýurdumyzyň çäklerinde täze kinolentany «Türkmenistan: Altyn asyryň muzeýleri» atly halkara ylmy konferensiýanyň işine gatnaşan Tokionyň TBS tele alyp eşitdiriş kompaniýasyndan ýapon dokumentalçylarynyň topary surata düşürdi.

Filmiň esasy wezipeleriniň biri giň halkara jemgyýetçiligini 1999-njy ýylda UNESKO-nyň Bütindünýä mirasynyň abraýly sanawyna goşulan Gadymy Merwiň täsin ýadygärlikleri, şeýle hem Marguş ýurdunda gazuw-agtaryş işleri geçirilende arheologlar tarapyndan ýüze çykarylan gymmatly tapyndylar bilen tanyşdyrmakdan ybaratdyr. Surata düşüriş topary halkara maslahatyna gatnaşyjylar bilen bilelikde paýtagtymyzdaky muzeýlerde, gadymy Goňurdepe şäher harabalygynda, Mary welaýatynyň birleşen muzeýinde boldular, şeýle hem şu ýyl bütindünýä mirasynyň desgasynyň derejesini alan parfiýalylaryň Nusaý galasyny surata düşürdiler. Diňe bir gymmatly muzeý eksponatlary däl, eýsem, biziň halkymyz tarapyndan aýawly saklanyp gelinýän urp-adatlar we däp-dessurlar hem kinokameranyň obýektiwine düşdi. Täze film «Türkmenistan: Altyn asyryň muzeýleri» atly halkara ylmy konferensiýasynyň—muzeý işini ösdürmäge bagyşlanylan we Türkmenistanyň Prezidenti Gurbanguly Berdimuhamedowyň başlangyjy bilen Merkezi Aziýa sebitiniň çäklerinde ilkinji gezek geçirilen iri maslahatyň işi hakynda hem gürrüň berer.

Dünýä medeniýetiniň ösüşine uly goşant goşan gadymy siwilizasiýanyň Watany, milletiň ruhy galkynyşy döwleti ösdürmegiň esasy wezipesi hasaplanylýan ýurt bolan Türkmenistan hakyndaky täze filme millionlarça tomaşaçylar syn ederler.

Türkmenistanyň UNESKO-nyň işleri boýunça Milli komissiýasynyň sekretariatynda TDH-niň habarçysyna habar berişleri ýaly, täze dokumental film BMG-niň alty dilinde çykarylar we Aşgabatda tanyşdyrylandan soň, bu iri halkara, hökümetara guramasynyň ugry boýunça dünýäniň dürli ýurtlaryna ýaýradylar.