Düýn Ruhabat etrabynyň Gypjak obasynda ýurdumyzyň Aragatnaşyk ministrliginiň düzüm birligi bolan aragatnaşyk uzeliniň edara ediş-tehniki binasy ulanylmaga berildi, bu obada toplumlaýyn özgertmeler maksatnamasy ýaýbaňlandyrylýar. Onuň açylyş dabarasyna hökümet agzalary, ýerli häkimiýet organlarynyň, dindarlaryň, habar beriş serişdeleriniň wekilleri, ministrlikleriň we pudaklaýyn dolandyryş edaralarynyň hünärmenleri, hormatly ýaşulular, okuwçy ýaşlar gatnaşdy.

Özboluşly iki gat binany «Sur Inşaat» türk firmasy bir ýyldan hem az wagtda gurdy. Taslama laýyklykda birinji gatda poçta bölümi we ähli zerur enjamlar bilen üpjün edilen şäherara-halkara gepleşik punkty, şeýle hem mukaddes Ruhnama otagy ýerleşýär. Ikinji gatda sanly ATS zallary, operatorçylyk-edara ediş we inžener-tehniki jaýlar, «awtozal» we başgalar ýerleşýär.

Bu täze desganyň iň uly meýdany telefon stansiýasy üçin berildi. Ýurdumyzyň aragatnaşykçylary ony oturtdylar we optiki-süýümli kabeliň kömegi bilen ýurdumyzyň bir bitewi telefon ulgamyna birleşdirdiler. Täze kärhana dünýä standartlarynyň derejesinde häzirki zaman telekommunikasion enjamlary we kompýuter tehnologiýalary bilen üpjün edilendir hem-de abonentlere sanly şäherara, halkara, öýjükli we poçta aragatnaşygynyň hyzmatlaryny, şol sanda «EMS»—ekspress poçta hyzmatlaryny etmäge ukyplydyr. Gypjakda açylan aragatnaşyk uzeliniň özünde etrapda ulanylýan ähli kuwwatlyklary birleşdirendigini bellemek gerek.

Beýik Serdarymyz tarapyndan başy başlanan iri möçberli özgertmeler maksatnamasy bolan paýtagtymyzyň golaýyndaky Ruhabat etrabyny ösdürmek hem-de abadanlaşdyrmak häzirki wagtda hormatly Prezidentimiz Gurbanguly Berdimuhamedowyň täze başlangyçlarynda dowam etdirilýär hem-de ileri tutulýan ähmiýetli taslamanyň derejesini aldy. Bu ýerde şol taslamany durmuşa geçirmegiň çäklerinde dürli maksatly iri desgalaryň onlarçasy guruldy, ulanylmaga berildi we olaryň gurluşygy dowam etdirilýär, olaryň arasynda «Ruhubelent» paýdarlar jemgyýetiniň pomidory gaýtadan işleýän zawody, ýüňi ilkinji gezek işläp geçýän «Ahal ýüň» kärhanasy, dokma toplumy, mermeri we graniti işläp bejerýän zawod, turba zawody, panbarhat öndürýän zawod we beýlekiler bar. Indi olaryň hataryna täze häzirki zaman aragatnaşyk uzeli hem goşuldy.

Dabara gatnaşyjylaryň nygtaýşy ýaly, täze galkynyş eýýamynda aragatnaşyk we telekommunikasiýalar pudagy milli ykdysadyýetimiziň geljegi uly we depginli ösdürilýän pudaklarynyň hataryna okgunly çykdy. Täze desganyň ulanylmaga berilmegi Türkmenistanyň baştutanynyň ýurdumyzyň ilatyny we halk hojalygyny halkara standartlarynyň derejesinde häzirki zaman hem-de ýokary hilli aragatnaşyk hyzmatlary bilen üpjün etmek baradaky saýlawlaryň öň ýanyndaky maksatnamalarynyň üstünlikli durmuşa geçirilmeginiň ýolunda ýene-de bir möhüm ädimdir. Bu ýere ýygnananlar mukaddes Garaşsyzlygymyzyň 16 ýyllygy mynasybetli hormatly Prezidentimiz Gurbanguly Berdimuhamedowy tüýs ýürekden gutlap, türkmen halky hakynda çäksiz alada edýändigi üçin milletiň liderine çuňňur minnetdarlyk bildirdiler, berk jan saglyk, bagt we progressiw özgertmeleriň hem-de reformalaryň ýolunda täze üstünlikleri arzuw etdiler.