Türkmenistanyň milli ýygyndy toparynyň futbolçylary Pnompene uçdular. Garaşsyzlyk aýynyň 11-inde Olimpiýa stadionynda 2010-njy ýylda geçiriljek dünýäniň Kubogyny almak ugrundaky ýaryşa gatnaşmak üçin bu ýerde Kambojanyň futbol topary bilen saýlama oýunlaryň duşuşygyny geçirerler.

Bu duşuşyga biziň ýygyndy toparymyzyň baş türgenleşdirijisi Rahym Gurbanmämmedow ýygyndy toparymyza futbolçylaryň 18-sini, şol sanda başga ýerlerde oýnaýan oýunçylaryň hem 13-sini çagyrdy. Olar: derwezeçiler Nikita Gorbunow («Şagadam», Türkmenbaşy) we Rahmanberdi Alihanow (HTTU, Aşgabat), meýdandaky oýunçylar — Begli Annageldiýew (HTTU), Maksim Kazankow («Aşgabat»), Muslim Agaýew («Merw», Mary), Geldimyrat Garahanow («Metallurg», Bekabad), Goçguly Goçgulyýew («Kuruwçi», Daşkent), Omar Berdiýew, Myrat Hemraýew (ikisi hem Samarkandyň «Samarkand-Dinamo» toparyndan), Ýagmyrmyrat Annamyradow, Didar Hajyýew (ikisi hem Namanganyň «Nowbahar» toparyndan), Ýewgeniý Zemskow («Lokomotiw», Daşkent), Arif Mirzoýew, Artur Geworkýan, Döwletmyrat Ataýew (hemmesi-de Guzaryň «Şurtan» toparyndan), Nazar Baýramow («Nebitçi», Baku), Mekan Nasyrow we Mämmedaly Garadanow (ikisi hem Ýewlahyň «Karwan» toparyndan).
Türkmenistan bilen Kambojanyň ýygyndy toparlarynyň duşuşygyna Bangladeşiň eminler topary eminlik ederler. Olar FIFA-nyň eminleri Ram Krişna Goş, onuň kömekçileri Abdul Munaf we Amanat Ali Halder. Ätiýaçlykdaky emin Riýaz Raşid (Maldiwler). Duşuşygyň komissary Masud Enaýat (Eýran).
Bu duşuşyk Türkmenistan bilen Kambojanyň ýygyndy toparlarynyň arasyndaky ilkinji taryhy duşuşyk bolar.

Dünýäniň Kubogyny almak ugrunda 2006-njy ýylda geçirilen ýaryşa Kamboja gatnaşmady. Bu duşuşyga taýýarlyk hökmünde olar Türkmenistanyň ýygyndy topary bilen bilelikde däbe öwrülen Nerunyň Kubogy ugrundaky ýaryşa gatnaşdylar. Baýrak fondy 100 müň dollara barabar bolan bu ýaryş Nýu-Delide geçirildi we onda Kambojanyň ýygyndy topary 5-nji orny eýeledi. Olar Hindistanyň ýygyndy toparyndan 0:6 (ýaryşyň ýeňijisi), Siriýadan 1:5, Gyrgyzystandan 3:4 hasabynda utulyp, Bangladeşiň ýygyndy topary bilen 1:1 hasabynda oýnady.

Mälim bolşy ýaly, 2010-njy ýylda geçiriljek dünýäniň çempionatyna ýollanma almak üçin Aziýa yklymyndan milli ýygyndy toparlaryň 41-si özara bäsleşerler. Reýtinge laýyklykda Aziýadan iň gowy toparlaryň bäşisi — Awstraliýa, Günorta Koreýa, Saud Arabystany, Ýaponiýa we Eýran toparlaýyn saýlama ýaryşyna (ýaryşyň 3-nji raundy) gatnaşarlar. Bu ýaryş 2008-nji ýylyň Baýdak aýynyň 6-syndan Ruhnama aýynyň 10-y aralygynda geçer. Galan ýygyndy toparlar 1-nji raunddan başlap çykyş ederler. 1-nji raundda ýeňiş gazanan 19 toparyň iň az reýtingi bolan sekizisi 2-nji raunda çykarlar, beýleki 11-si bolsa 3-nji raundda oýnar. Kuweýtiň we Indoneziýanyň ýygyndy toparlary öz garşydaşlary Butan bilen Guamyň ýygyndy toparlarynyň ýaryşdan çykandyklary üçin eýýäm indiki aýlawa çykdylar. 1-nji raundda geçen duşuşyklaryň käbirleri şular ýaly ýagdaýda tamamlandy: Bangladeş - Täjigistan 1:1, Tailand - Makao 6:1, Wetnam - BAE 0:1, Siriýa - Owganystan 3:0, Liwan - Hindistan 4:1, Oman - Nepal 2:0, Palestina - Singapur 0:4, Ýemen - Maldiwler 3:0.

Garaşsyzlyk aýynyň 28-inde jogap duşuşyklary geçiriler.