Türkmenistanyň Prezidentiniň ýanyndaky Ylym we tehnika baradaky ýokary geňeşiň ylmy-nazaryýet žurnalynyň 4-nji sany Magtymguly adyndaky Türkmen döwlet uniwersitetiniň mugallymlary Ý.Nuryýew bilen T.Diwanowanyň Türkmenistanyň Prezidenti Gurbanguly Berdimuhamedowyň döwlet strategiýasynyň ileri tutulýan ugurlarynyň birine bagyşlanan «Hukukçy hünärmenleriň taýýarlanyşy we hukuk öwreniş ylmy kämillik ýolunda» diýen makalasy bilen açylýar.

Filolog A.Karryýewanyň žurnalda çap edilen makalasy «Mahmyt Zamahşary: döwürleriň we nesilleriň arabaglanyşygy» diýip atlandyrylýar. Ol orta asyrlaryň beýik türkmen alymynyň we şahyrynyň kitabynyň ilkinji gezek rus diline terjime edilen bölekleri bilen makalasynyň üstüni ýetirýär. Milli golýazmalar institutynyň işgäri H.Agorazow öz makalasyny Seljuk türkmen döwletiniň taryhyny öwrenmekde gymmatly ýazuw ýadygärligine, lingwist A.Öwezow bolsa türkmen dilinde tirkeş sözleriň ýazuw düzgünlerine bagyşlady. Magtymguly adyndaky Dil we edebiýat institutyndan O.Akmämmedow türkmen diliniň Garaşsyzlyk ýyllarynda dörän jemgyýetçilik-syýasy adalgalary we olaryň ýasalyş ýollary barada ýazýar.

S.A.Nyýazow adyndaky Türkmen oba hojalyk uniwersitetiniň mugallymy J.Ataýew öz makalasynda oba hojalyk önümçiliginiň guralyşyny kämilleşdirmegiň meselelerini gozgasa, Çöller, ösümlik we haýwanat dünýäsi milli institutynyň işgäri L.Gulmämmedowa iýilýän kömelek şiitakeni ösdürip ýetişdirmegiň usullaryny işläp düzmek barada gürrüň berýär.
Kardiologiýa ylmy-kliniki we bejeriş merkeziniň işgärleriniň makalasy ýürege emeli elektrik işlediji çatylan näsaglarda ýürek ritminiň bozulmalaryna bagyşlanypdyr.

Žurnalyň şu sanyndaky beýleki makalalaryň arasynda Fiziologiýa ylmy-kliniki merkezi hassahananyň ylmy merkeziniň Garaşsyzlyk ýyllarynda saglygy goraýyş ulgamyna goşandy, Merkezi
Köpetdagyň akarlarynyň suwunyň hiliniň çaklamasyny işläp düzmek, oba hojalyk önümlerini guratmak we dowamly saklamak baradaky makalalar bar. Žurnalyň fizika-matematika bölüminde türkmen alymlarynyň iki üýtgeýän predelli käbir çyzykly integral deňsizlikler we özara dörtgranlyk we beýleki ylmy habarlar baradaky makalalary çap edilipdir.