Garaşsyzlyk aýynyň 11-ine Türkmenistanyň Prezidenti Gurbanguly Berdimuhamedow Amerikanyň «Boing» kompaniýasynyň Merkezi Aziýa we Ýewropa ýurtlarynda satuw boýunça direktory Serdar Gurzy kabul etdi.
Döwlet baştutany bilen mähirli salamlaşyp, myhman «Boing» kompaniýasynyň adyndan işjeň hyzmatdaşlygy dowam etdirmäge taýýardygy üçin çyn ýürekden minnetdarlyk bildirdi we öz tarapyndan amerikan kompaniýasynyň Türkmenistanyň ygtybarly we uzakmöhletleýin hyzmatdaşy hökmünde öz abraýyna buýsanýandygyny nygtady.

Serdar Gurzyny mübärekläp we mähirli sözler üçin oňa minnetdarlyk bildirip, hormatly Prezidentimiz «Boing» kompaniýasynyň Türkmenistan bilen köpýyllyk netijeli hyzmatdaşlygyna ýokary baha berdi we şu özara bähbitli hyzmatdaşlygyň türkmen döwletiniň ösüşiniň täze tapgyryny tapawutlandyrýan uly möçberli özgertmeler reformasy mynasybetli aýratyn möhüm ähmiýete eýe bolýandygyny nygtady. Gurbanguly Berdimuhamedow giňişleýin halkara hyzmatdaşlyk syýasaty, ýurduň künjekleriniň ykdysady taýdan çalt ösmegi Türkmenistanyň awiaparkynyň has giňeldilmegini we täzelenmegini talap edýär diýip belledi. Biz şunda dünýäde öňdebaryjy, ygtybarly we amatly awiatehnikany öndürýän «Boing» kompaniýasy bilen ýyllaryň synagyndan geçen hyzmatdaşlygy ileri tutýarys diýip, döwlet baştutanyna aýtdy. Köp ýolagçy gatnatmaga niýetlenen soňky modifikasiýaly «Boing-737-900» kysymly täze uçarlaryň ikisini satyn almak baradaky çözgüt hut şunuň bilen baglanyşyklydyr diýip, döwlet baştutany belledi. Ozalkysy ýaly, uçarlarda milli bezeg elementleri ulanylar.

Hyzmatdaşlygyň mundan beýläkki perspektiwasyny ara alyp maslahatlaşyp, taraplar ony bar bolan ägirt uly potensialyň esasynda ösdürmek barada ylalaşdylar. Şu jähtden Türkmenistanyň raýat howa floty üçin kadrlary—ekipažlaryň ikinji düzümini, tehniki personaly we bort prowodnikleri hem «Boing» kompaniýasynyň bazasynda taýýarlamagyň meseleleri ara alyp maslahatlaşyldy.

Myhman türkmen döwletiniň baştutanyna buýurma üçin minnetdarlyk bildirdi we türkmen tarapynyň tekliplerini we şertlerini göz öňünde tutup, «Boing» kompaniýasynyň aýratyn hormat hökmünde Aşgabatda serwis merkezini, angar gurjakdygyny we «Türkmenhowaýollary» döwlet milli gullugy üçin ätiýaçlyk şaýlary iberjekdigini habar berdi.
Duşuşygyň ahyrynda taraplar netijeli hyzmatdaşlygyň özara bähbitler göz öňünde tutulyp, üstünlikli ösdüriljekdigine ynam bildirdiler.

TDH-a beren interwýusynda Türkmenistanyň Prezidenti bilen duşuşygyň jemlerini teswirläp, Serdar Gurz, hususan-da: «Men hyzmatdaşlygymyzyň derejesine we onuň ösüşiniň perspektiwasyna guwanýaryn. Türkmen awialiniýalary güýçlenip, täze belentliklere galýar. Siziň uçarmanlaryňyz we ekspertleriňiz ussatlygyň ýokary derejesini görkezip işleýärler. Biz diňe bir awiasiýada däl, eýsem ähli sferalarda gözümiziň alnynda günsaýyn güýçlenýän hakyky progresi görýäris. Meniň özüm «Türkmenhowaýollarynyň» hyzmatyndan höwes bilen peýdalanýaryn. Ýene Aşgabada Garaşsyzlyk aýynyň 27-sinde Türkmenistanyň Garaşsyzlyk baýramyna gelmäge umyt bildirýärin. Türkmenistanlylary şu baýram bilen ýürekden gutlaýaryn, hökümetiňize we tutuş türkmen halkyna abadançylyk we rowaçlyk arzuw edýärin» diýip nygtady.