Düýn Beýik Saparmyrat Türkmenbaşy adyndaky Türkmenistanyň Milli medeniýet merkeziniň Mukamlar köşgünde bolan höwesjeň ýaş ýerine ýetirijileriň «Ýaňlan, Diýarym!» bäsleşiginiň jemleýji tapgyrynyň ýeňijileriniň uly gala konserti ýurdumyzyň medeni durmuşynda ajaýyp waka boldy.

Ýurdumyzyň baş baýramynyň — Garaşsyzlyk gününiň öňüsyrasynda Türkmenistanyň Prezidentiniň yglan eden «Beýik Saparmyrat Türkmenbaşynyň Altyn asyry» atly bäsleşiginiň çäklerinde däp boýunça geçirilýän bu konsert ýaş zehinleriň hakykatdan hem umumymilli gözden geçirilişi, ýaşlara halkymyzyň gymmatly ruhy hazynasyna, onuň baý saz medeniýetine aralaşmagyna ýardam edip, ýurdumyzyň ähli künjeklerinden ýaş ýigitleriň we gyzlaryň ýüzlerçesi üçin ussatlygyň belentliklerine tarap özboluşly döredijilik galkynyşy boldy.

Şol gün bäsleşige gatnaşyjylara hormatly Prezidentimiz Gurbanguly Berdimuhamedowyň gutlag sözleri bu sungat mekanynda aýratyn dabaraly ýaňlandy. Döwlet baştutany zehinli türkmen ýaşlary hakynda buýsanç bilen seslendi, olaryň täze galkynyş zamanasynyň ösen medeniýetini döretmäge önjeýli we mynasyp goşandy goşmagyna garaşylýar. «Milli sungatymyz bilen halkymyza hyzmat etmekde, onuň özboluşly öwüşginlerini we aýratynlyklaryny Ýer ýüzüne ýaýmakda yhlasyňyzy, ylhamyňyzy, zehiniňizi gaýgyrmaň! Şöhratly ata-babalarymyzyň beýik ýeňişlerinden gözbaş alyp gaýdýan, dury akabaly ajaýyp sungatymyzy çuňňur özleşdirip we täze galkynyş zamanasynyň belent ruhuny baýdak edinip, türkmen halkyny täze ýeňişlere, üstünliklere ruhlandyryň!» diýip, hormatly Prezidentimiz ýaşlary çagyrdy.

Ýurdumyzyň ähli welaýatlarynda we Türkmenistanyň paýtagtynda geçirilen deslapky bäsleşiklerde bu hormatly hukugy gazanan baýramçylyk konsertine gatnaşyjylaryň on ikisiniň çykyşlary milletiň lideriniň çagyryşyna mynasyp jogap boldy. Söýgüli Watanymyza we onuň zehinli halkyna bagyşlanylan aýdymlar, halk mukamlary we wokal eserleri ýaş höwesjeň artistleriň ýerine ýetirmeginde tüýs ýürekden we özüne çekiji ýaňlandy. Olarda täze owazlar we gadymy milli däpler sazlaşykly utgaşdy. Saz kompozisiýalarynyň özboluşly häzirki zaman saz bezegi we ýeňijileriň özboluşly ýerine ýetirijilik ussatlygy adamlardan hyryn-dykyn doly zalda şowhunly el çarpyşmalaryny döredip, tomaşaçylaryň mynasyp bahasyna eýe boldy.

Beýik Serdarymyzyň sözlerine döredilen, bäsleşigiň özboluşly saz nyşanyna öwrülen we konserte gatnaşyjylaryň hemmesi tarapyndan ýerine ýetirilen tolgundyryjy «Ýaňlan, Diýarym!» aýdymy baýramçylykda durmuşa höwes döredýän kuwwatly owaz bolup ýaňlandy. Konsertiň ahyrynda ýeňijileri sylaglamak dabarasy boldy, şonda olaryň her birine bäsleşigi guraýjylar — Türkmenistanyň Medeniýet we teleradioýaýlymlar ministrliginiň wekilleri diplomlary, ýörite pul baýraklaryny we hormatly Prezidentimiz Gurbanguly Berdimuhamedowyň adyndan gymmat bahaly sowgatlary gowşurdylar. Ýurdumyzyň millionlarça teletomaşaçylary bu ajaýyp we ýatda galyjy aýdym-saz baýramçylygynyň şaýatlary boldular.