Gadymy türkmen topragyna ýene-de mukaddes Oraza baýramy geldi. Bu baýram gadymdan bäri rehim-şepagatlylygyň, hoşniýetliligiň we ruhy päkligiň dabaralanmagyny alamatlandyrýar. Şu gün daň säherden ýurdumyzyň ähli metjitlerinde dünýäniň ähli musulmanlary tarapyndan bellenilip geçilýän baýram mynasybetli aýat-töwirler okalýar. Munuň özi mukaddes Oraza aýynyň we 30 günlük agyz beklemegiň tamamlanýandygyny aňladýar.

Garaşsyzlygyň ilkinji ýyllaryndan milletiň gadymy ruhy gymmatlyklarynyň, onuň köp müňýyllyk özboluşly medeniýetiniň gaýtadan dikeldilmegi Türkmenistanyň döwlet syýasatynyň ileri tutulýan ugurlarynyň birine öwrüldi. Biziň ýurdumyzda 1999-njy ýyldan bäri resmi taýdan bellenilýän Oraza baýramynyň gaýtarylyp getirilmegi bu syýasatyň aýdyň miweleriniň biridir. Ata-babalarymyzyň beýik filosofik we ynsanperwerlik ideallary, gadymdan bäri türkmen halkyna mahsus bolan ynsansöýüjilik we adalatlylyk däpleri şu syýasatyň esasyna goýuldy. Bu däpler täze taryhy eýýamda mynasyp dowam etdirilýär. Biz ýene-de bu mukaddes musulman baýramyny bellemek mümkinçiligine eýe bolduk. Çünki bu baýramy köp asyrlaryň dowamynda türkmen topragynda şatlykly we aç-açanlyk ýagdaýynda, iň ýagty duýgular, ýagşy umyt-arzuwlar bilen belläp geçipdirler.

Türkmenistanlylaryň şu ýyl mukaddes Oraza baýramyny ýurdumyzyň baş baýramynyň—Garaşsyzlyk gününiň bosagasynda garşylamagynyň aýratyn many-mazmuny bardyr. Bu şanly sene milli senenamamyzda aýratyn orun eýeleýär. Şu ýyl bu sene uly ähmiýetli, hakyky taryhy wakalaryň ençemesine we Türkmenistanyň Prezidenti Gurbanguly Berdimuhamedowyň başlangyjy bilen durmuşa geçirilýän ägirt uly özgertmelere beslendi. Şol özgertmeler türkmen halkynyň bagtly durmuşynyň, mähriban Watanymyzyň gülläp ösmeginiň, onuň parahatçylyk, döredijilik we progres ýoly bilen üstünlikli öňe gitmeginiň hatyrasyna amala aşyrylýar. Şonuň üçin hem bu gün türkmenistanlylar özüniň täze galkynyş eýýamyna gadam basan Watanymyzyň abadançylygy baradaky ýadawsyz aladalary üçin döwlet baştutanynyň adyna tüýs ýürekden çykýan minnetdarlyk sözlerini aýdyp, onuň ähli asylly we hoşniýetli başlangyçlarynyň rowaç almagyny Beýik Biribardan dileg edýärler.

Hormatly Prezidentimiz Gurbanguly Berdimuhamedowyň Permanyna laýyklykda günäsi geçilen dokuz müňden gowrak ildeşlerimiziň hem rehim-şepagatlylyga beslenen Oraza baýramynyň şatlygyny biziň bilen paýlaşýandygyny bellemek gerek. Gadyr gijesiniň öň ýanynda olaryň ählisi tussaglykdan boşap, mähriban ojaklaryna gaýdyp geldiler we jemgyýetiň hem-de maşgalasynyň öňündäki günäsini halal zähmeti bilen ýuwmaga, öz ykbalyny doly özgertmäge mümkinçilik aldylar. Milletiň lideriniň bu ynsanperwerlik ädimi Garaşsyz, Bitarap Türkmenistanda ynsanyň döwletiň esasy gymmatlygy bolup durýandygynyň, baş wezipäniň bolsa jemgyýetiň durmuşynda ynsanperwerlik başlangyçlaryny, ruhubelentligi, adalatlylyk we kanunçylyk ýörelgelerini pugtalandyrmakdan ybaratdygynyň ýene bir aýdyň subutnamasy boldy.

Agzybir we bitewi türkmen halky mukaddes Oraza baýramyny bir uly agzybir maşgala hökmünde iň gowy arzuwlar we umytlar—mähriban topragymyzda ýagty we döredijilikli durmuşyň höküm sürmegi, çagalarymyzyň geljeginiň bagtly bolmagy baradaky umytlar bilen garşylaýar. Oraza baýramy biziň hoşniýetlilige we ynsanperwerlige bolan ynamymyzy berkidip, seçip alan ýolumyzda täze üstünlikleri eýelemek we belent sepgitlere ýetmek üçin güýç-kuwwatymyzy artdyrýar. Däp bolşy ýaly, şol gün, baýram namazyndan soň, hossarlaryňka we dostlaryňka myhmançylyga barylýar, hemmelere parahatçylyk we abadançylyk arzuw edilýär. Baýram güni: «Namaz-orazalar kabul bolsun!», «Orazalar kabul bolsun!», «Oraza baýramyňyz gutly bolsun!» diýen sözler bilen birek-biregi mübärekleýärler.

Goý, biziň ähli doga-dileglerimiz Gudraty Güýçli Allatagalanyň dergähinde kabul bolsun! Goý, biziň iň gowy arzuwlarymyz we umytlarymyz hasyl bolsun! Kabul bolsun!