Düýn uly şanly senäniň — Watanymyzyň Garaşsyzlygynyň öňüsyrasynda Prezident köşgünde edebiýat, medeniýet we sungat işgärleriniň arasynda her ýyl yglan edilýän «Beýik Saparmyrat Türkmenbaşynyň Altyn asyry» atly däp bolan bäsleşigiň ýeňijilerini sylaglamak dabarasy boldy. Bu şanly waka mynasybetli bu ýere ýurdumyzyň Mejlisiniň ýolbaşçylary, Ministrler Kabinetiniň Başlygynyň orunbasarlary we umumy döwlet bäsleşiginiň laureatlary — Türkmenistanyň Prezidentiniň elinden sylagy almagyň belent hormatyna eýe bolan dürli döredijilik işgärleriniň wekilleri çagyryldy.

Garaşsyzlyk we Altyn asyr eýýamy milli medeniýetiň we sungatyň hakyky gülläp ösýän eýýamy boldy. Hut, özbaşdak ösüş ýyllarynda türkmenistanlylar üçin geçen döwürleriň medeni mirasyny çuň we hemmetaraplaýyn öwrenmegiň, zehinleri ösdürmegiň mümkinçilikleri açyldy. Milli sungatymyzy ösdürmegi höweslendirmäge, täze zehinleri ýüze çykarmaga ýardam edýän, her ýyl ýurdumyzda geçirilýän «Beýik Saparmyrat Türkmenbaşynyň Altyn asyry» bäsleşigi munuň aýdyň subutnamalarynyň biridir.

Şu ýyl täze galkynyş eýýamyny tapawutlandyrýan progressiw reformalaryň fonunda, ählumumy ruhubelentlik ýagdaýynda geçirilen bu ägirt uly döredijilik gözden geçirilişi bir maksada — öz döredijiliginde häzirki wagtda Garaşsyz, Bitarap Türkmenistanyň durmuşyny, milletimiziň öz asyrlar boýy ruhy-ahlak baýlyklaryna hem-de umumyadamzat gymmatlyklaryna üýtgewsiz ygrarlydygyny beýan edýän, ýurdumyzyň ähli künjeklerinden gelen dürli ýaşdaky we kärdäki adamlaryň müňlerçesini birleşdirdi.
Hormatly Prezidentimiz Gurbanguly Berdimuhamedow duşuşygy açyp, bu ýere ýygnananlary mähirli mübärekledi we hemmeleri ýetip gelýän beýik baýramçylyk — Watanymyzyň Garaşsyzlygynyň 16 ýyllygy bilen gutlady, şu ýylky baýramçylygy türkmenistanlylaryň ýokary ruhy göteriliş ýagdaýynda garşylaýandyklaryny nygtady. Ýurdumyzda häzirki wagtda geçirilýän giň möçberli we çuň reformalaryň baş maksady adamdyr, onuň bagtydyr we abadançylygydyr diýip, hormatly Prezidentimiz belledi.

Gurbanguly Berdimuhamedow häzirki zaman türkmen jemgyýetiniň durmuşynda medeniýetiň we sungatyň tutýan orny hakynda söz açyp, müňýyllyklaryň üsti bilen getirilen we täze galkynyş eýýamynda Watanymyzyň üstünlikli ösüşiniň hem-de gülläp ösmeginiň aýrylmaz bölegi bolan belent ruhy medeniýetimiz türkmen halkynyň esasy baýlygy boldy, esasy baýlygydyr we esasy baýlygy bolar diýip nygtady. Döwlet baştutany häzirki şertlerde döredijilik işgärleriniň işiniň aýratyn ähmiýete eýe bolýandygyny belledi. Milletiň lideri «Indi biz täze döwürde ýaşaýarys. Döredijilik işgärleriniň hem täze döwre öz garaýşy, goşandy bolmaly. Siz öz eserleriňiz bilen adamlara şatlyk paýlap, demokratiýany ösdürmek, azatlygy, erkinligi wasp etmek ýaly işlerde nusgawy türkmen edebiýatynyň we sungatynyň ajaýyp däplerini dowam etdirijiler we ösdürijiler bolmalysyňyz» diýdi. Olar joşgunly zähmetleri bilen adamlaryň göwnüni götermelidirler. Demokratik jemgyýetiň kemala gelmegine mynasyp goşant goşmalydyrlar, nusgawy türkmen edebiýatynyň we sungatynyň ajaýyp däplerini dowam etdirmek hem-de ösdürmek bilen, azatlygymyzy we Garaşsyzlygymyzy wasp etmelidirler.

Döwlet baştutany döredijilik işgärleriniň durmuşy we netijeli işi üçin şertleri döretmek bilen baglanyşykly derwaýys meselelere aýratyn ähmiýet berdi. Şunuň bilen baglylykda hormatly Prezidentimiz häzirki zaman has oňaýly ýaşaýyş jaýlaryny, çagalar baglaryny, sungat mekdeplerini we döredijilik ýokary okuw mekdeplerini özünde jemleýän täze döredijilik şäherjigini döretmek ideýasyny aýtdy. Şular ýaly toplumy döretmek ideýasynyň ilkinji gezek Gurbanguly Berdimuhamedow tarapyndan ol ýurdumyzyň saglygy goraýşyna ýolbaşçylyk eden mahaly durmuşa geçirilendigini ýatlap geçeliň. Häzirki wagtda Arçabil şaýolunyň günortasynda gurlan ajaýyp medisina şäherjigi türkmenistanlylaryň buýsanjy boldy we ýurdumyzyň paýtagtynyň köp sanly myhmanlaryny haýran galdyrýar. Ýurdumyzyň medeniýet we sungat işgärleri üçin täze toplum aýratyn döredijilik bileleşigini döretmäge, täze zehinli nesli kemala getirmäge, täze döredijilik dinastiýalarynyň ýüze çykmagyna we asyrlaryň dowamynda türkmen medeniýetiniň güýç alan we güýç alýan aýratyn ruhy atmosferany döretmäge hyzmat eder.

Hormatly Prezidentimiz bu teklibiň durmuşa geçirilmeginiň eýýäm ýakyn günlerde badalga aljakdygyny we durmuşa geçirmek üçin döwletimiziň ähli zerur serişdeleri berjekdigini nygtap, Türkmenistanda iri möçberli sosial programmalary amala aşyrmagyň ýolunda ýene bir möhüm ädim boljak taslamanyň ileri tutulýandygyny belledi. Türkmen lideri şolary durmuşa geçirmek üçin bizde ähli şertleriň bardygyny belledi. Hormatly Prezidentimiz size diňe bir haýyşym bar: ruhubelent Watanymyza söýgi we ertirki güne ynam bilen işläň diýip, sözüni dowam etdirdi. Gurbanguly Berdimuhamedow zehinli türkmen ýaşlaryna ýüzlenip, olary «Döretmäge, döwletimiziň, jemgyýetimiziň durmuşyna has işjeň gatnaşmaga, olary ösdürmäge öz goşantlaryny goşmaga» çagyrdy.

Ýurdumyzyň medeniýet işgärleriniň ýaşuly nesliniň wekilleri döwlet baştutanynyň aýratyn minnetdarlygyna mynasyp boldular. «Türkmen hemişe-de halypaçylyk meselesine aýratyn üns beren halk. Men ýaşuly artistlerimize, ýazyjy-şahyrlarymyza mynasyp şägirtleri ýetişdirendikleri üçin, şu günki ösüşlerimize mynasyp goşant goşandyklary üçin minnetdarlyk bildirýärin» diýip, hormatly Prezidentimiz nygtady.

Hormatly Prezidentimiz Gurbanguly Berdimuhamedowyň çykyşy duşuşyga gatnaşyjylaryň ählisi tarapyndan ägirt uly üns we tolgunmak bilen garşylandy we ençeme gezek şowhunly el çarpyşmalary bilen onuň arasy kesildi.

Dabaraly pursat gelip ýetýär, hormatly Prezidentimiz Gurbanguly Berdimuhamedow medeniýet, edebiýat we sungat işgärleriniň arasynda yglan edilen «Beýik Saparmyrat Türkmenbaşynyň Altyn asyry» bäsleşiginiň ýeňijilerine sylaglary gowşurýar.

Türkmen sungatynyň ussat halypalary — şöhrat gazanan aýdymçylar, Watanymyzyň altyn owazlary Maýa Kulyýewa we Medeniýet Şahberdiýewa ilkinji bolup sahna çykýarlar, olaryň ajaýyp zehinleri milli saz medeniýetimiziň bezegi boldy. Olar çäksiz buýsanç we uly şatlyk duýgusy bilen milletiň lideriniň elinden diplomlary hem-de pul baýraklaryny alýarlar. M.Kulyýewa ýurdumyzyň medeniýet işgärleriniň ýaşuly nesliniň adyndan döwlet baştutanyna öz minnetdarlygyny beýan edip, häzirki zaman türkmen sungatynyň gözbaşynda duranlara, joşgunly zähmetleri bilen ata-babalarymyzyň şöhratly medeni däplerini dowam etdirenleriň zähmetine ýokary baha berýändigi üçin Gurbanguly Berdimuhamedowa tüýs ýürekden minnetdarlyk bildirdi, milletiň liderine Garaşsyz Watanymyzyň we türkmen halkynyň eşreti üçin täze üstünlikler arzuw etdi.

Bäsleşigiň ýeňijileri — žurnalistler, hudožnikler, şahyrlar we prozaçylar, aýdymçylar, sazandalar hem-de kompozitorlar biri-biriniň yzyndan sahna çykyp, hormatly Prezidentimize öz eserlerine ýokary baha berendigi, döwlet baştutanynyň türkmen halkynyň ruhy mirasyny dikeltmek hem-de ösdürmek, ýurdumyzda doly bahaly döredijilik işi bilen meşgullanmaga ähli şertleri döretmek barada ýadawsyz alada edýändigi we muňa üns berýändigi üçin tüýs ýürekden minnetdarlyk bildirdiler.

Milli medeniýetimiziň gülläp ösýän ajaýyp döwründe ýaşaýandygymyz üçin ykbalymyza minnetdardyrys, biz häzirki wagtda Türkmenistanyň sesiniň bütin dünýäde eşidilendigine, BMG-niň belent münberinden döwlet baştutanymyzyň biziň ýurdumyzyň parahatçylyk söýüjilik, açyklyk we hoşniýetli goňşuçylyk, rehim-şepagatlylyk hem-de myhmansöýerlik prinsiplerine — asyrlaryň dowamynda türkmenleriň ruhy medeniýetiniň esasyny düzýän, häzirki wagtda bolsa döwlet syýasatynyň derejesine çykarylan gymmatlyklara ygrarlydygyny yglan edendigine buýsanýarys diýip, bu ýerde çykyş edenler nygtadylar.

Bäsleşigiň laureatlarynyň köpüsiniň hormatly Prezidentimiz Gurbanguly Berdimuhamedowa minnetdarlyklaryny aýdymlary hem-de şahyrana eserlerini ruhubelentlik bilen ýerine ýetirmek arkaly beýan etmekleri Prezident Köşgündäki baýramçylyk ýagdaýyna aýdyň şaýatlyk edýär.

Gurbanguly Berdimuhamedow ajaýyp çykyşlary üçin dabara gatnaşyjylara minnetdarlyk bildirip, döredijilik işgärlerine öz zehinlerini, joşgunlaryny, gujur-gaýratlaryny we ussatlyklaryny Watanymyzyň bagtynyň hatyrasyna doly sarp etmegi wesýet edip, bu ýere ýygnananlary medeniýetimiziň we sungatymyzyň döwlet syýasatymyzyň esasy ileri tutulýan ugurlarynyň biri bolandygyna we şeýle boljakdygyna ynandyrdy. Döwlet baştutany bu ýere ýygnananlar bilen hoşlaşyp, olary ýetip gelýän baýramçylyklar — Oraza baýramy we Garaşsyzlyk güni bilen ýene-de bir gezek gutlady, hemmelere saglyk, bagt, zähmetde hem-de döredijilik işinde täze üstünlikleri, olaryň beren ähli sadakalarynyň gudraty güýçli Allatagalanyň dergähinde kabul bolmagyny arzuw etdi.