Dünýäniň Kubogyny almak ugrundaky ýaryşa gatnaşmak üçin geçirilen saýlama oýunlarda türkmen futbolçylary myhmançylykda Kambojanyň ýygyndy toparyny 1:0 hasabynda ýeňdiler. Dünýä çempionatynyň final bölegi 2010-njy ýylda Günorta Afrikada geçiriler.

Kambojada biziň toparymyzyň ştabyndan belli sport kommentatory Amanmuhammet Çaryýewiň habar berşi ýaly, şu ýyl Pnompeniň Olimpiýa stadionynda ilkinji gezek geçirilýän resmi ýaryşa Türkmenistanyň milli ýygyndy toparynyň türgenleşdirijileri bu duşuşyga başga ýerde oýnaýan oýunçylaryň 13-sini çagyrdylar. Oýunçylaryň başdaky düzüminde olaryň sekizisi meýdança çykdylar, ýene üçüsi bolsa belli bir wagtdan soň ýoldaşlaryny çalşyp, olaryň ýerine çykdylar.
Örän çygly we yssy howa duşuşyga öz täsirini ýetirdi. Garşydaşlar oýnuň birinji ýarymynda öz ussatlyklaryny görkezip bilmediler. Oýnuň ikinji ýarymynda türkmenistanlylar ynamly oýnap, oýnuň 70-nji minutyndan başlap inisiatiwany doly ele aldylar we oýnuň 85-nji minutynda Mämmedaly Garadanow pursatdan peýdalanyp, ýeňiş pökgüsini tora salmagy başardy.

Türkmenistanyň we Kambojanyň ýygyndy toparlarynyň jogap oýny Garaşsyzlyk aýynyň 28-inde Aşgabatda, Beýik Saparmyrat Türkmenbaşy adyndaky Olimpiýa stadionynda geçiriler.