Türkmenistanyň Suw hojalyk ministrligine ýer-gurluşyk tehnikasynyň—Belarus Respublikasynyň Mogilewsk awtomobil zawodynyň skreperlerinden we Russiýanyň Çelýabinsk traktor zawodynyň buldozerlerinden, şeýle hem Ýaponiýanyň «Komasu» kompaniýasynyň ekskawatorlaryndan we buldozerlerinden ybarat bolan täze uly tapgyry gelip gowuşdy.

Kuwwatly maşynlar Türkmenistanyň Prezidenti Gurbanguly Berdimuhamedow tarapyndan tassyklanan şertnamalaryň çäklerinde Türkmenistana getirildi. Şol şertnamalara laýyklykda ýurdumyzyň suw gurluşykçylary belorus we rus maşyn gurluşykçylaryndan jemi 100 sany buldozeri, 50 sany skreperi we beýleki ýörite maşynlary, şeýle hem Ýaponiýada öndürilen ekskawatorlaryň 120-sini we buldozerleriň 60-syny alarlar.

Suw hojalyk ministrliginiň ygtyýaryna gelip gowuşýan döwrebap tehnika, esasan, tarp ýerleri özleşdirmekde hem-de oba hojalygynyň strategik ekinleri—bugdaý we pagta üçin bölünip berlen we ep-esli möçberde artan ekin meýdanlarynyň melioratiw ýagdaýyny gowulandyrmak işlerinde ulanylar.

Ýerleriň melioratiw ýagdaýyny gowulandyrmak ýurdumyzyň oba hojalygyny düýpli özgertmek bilen baglylykda suw hojalyk düzümleriniň we oba senagat toplumynyň öňünde durýan derwaýys wezipeleriň biri hasaplanýar. Ekin meýdanlarynyň netijeli ulanylmagy, oba hojalyk ekinleri ösdürilip ýetişdirilende ýerleriň hasyllylygynyň artdyrylmagy gös-göni şol wezipäniň üstünlikli çözülmegine baglydyr. Şu maksat bilen, döwlet baştutany welaýatlaryň her birinde hojalyk hasaplaşygyndaky ýer-suw gurluşyk kärhanalaryny döretmek baradaky Karara gol çekdi. Hormatly Prezidentimiz Suw hojalyk ministrliginiň täze düzümleriniň hünärmenlerine suwaryş we şor suw akabalar ulgamlaryny, suw hojalyk desgalaryny gurmak we göwnejaý ýagdaýda saklamak, suw bilen üpjün etmek, täze ýerleri özleşdirmek we olary ekin dolanyşygyna girizmek bilen bagly işleri kompleksleýin ýerine ýetirmek ýaly uly möçberli wezipeleri tabşyrdy. Ýeri gelende aýtsak, häzirki wagtda welaýatlaryň «Ýersuwgurluşyk» müdirlikleriniň öz güýçleri bilen tarp ýerleriň 6 müň 200 gektary özleşdirildi, suw sowujylaryň we zeýkeşleriň 213 kilometri täzeden ulanmaga berildi, suwaryş ulgamlarynyň 127 kilometri çekildi hem-de 50 kilometrden gowrak täze kollektorlar guruldy. Tarp ýerleri özleşdirýän suw gurluşykçylaryň pikirine görä, munuň özi kuwwatly ýer gazyjy — gurluşyk tehnikasynyň işledilmegi netijesinde başa bardy, her aýda şeýle tehnika bilen Suw hojalyk ministrliginiň parkynyň üsti ýetirilýär.

Suw hojalyk ministrliginde TDH-niň habarçysyna habar berlişine görä, häzirki wagtda pudagyň Garaşsyzlyk ýyllarynda tutuşlygyna döwrebaplaşdyrylan maşyn parky esasan Ýaponiýanyň dünýäde belli «Komasu» kysymly ýörite tehnikasyndan ybarat. Häzirki wagtda türkmen suw gurluşykçylary bilen öňden bäri hyzmatdaşlyk edýän «Itoçu Korporeýşn» kompaniýasy bilen baglaşylan şertnama laýyklykda, ýurdumyza 30 sany ekskawator we 11 sany buldozer gelip gowuşdy. Tehnika 2008-nji ýylyň Nowruz aýynyň ahyryna çenli dolulygyna getiriler. Türkmen köli, Saryýazy suw howdany, «Türkmenistanyň Garaşsyzlygynyň 15 ýyllygy» suw howdany ýaly uly desgalary we beýlekileri gurmakda we işläp taýýarlamakda Ýaponiýanyň 500-den gowrak ekskawatorlary, buldozerleri, şeýle hem awtogreýderler, turba çekmek üçin niýetlenen maşynlar we beýlekiler jemlenildi, bular ýerli toprak-howa şertlerinde örän oňaýlydygyny görkezdi.
«Katerpilleriň» Türkmen kölündäki işlerde hem-de täzeden özleşdirilýän tarp ýerlerdäki suwarymly ekin meýdanlaryny giňeltmekde ulanylýan kuwwatly maşynlary hem ýokary öndürijilikli tehniki görkezijileri bilen häsiýetlendirilýär. Häzirki wagtda suw hojalyk işgärleriniň ygtyýarynda şu kysymly ýer gazyjy-gurluşyk tehnikasynyň 274-si bar, şolaryň 83-si geçen ýylyň ahyrynda we şu ýylyň başynda getirildi. 2007-nji ýylyň Ruhnama aýynda gol çekilen şertnamanyň çäklerinde suw hojalyk ministrligi «Katerpiller» amerikan kompaniýasynyň öndüren ekskawatorlarynyň 100 sanysyny satyn alar, «Zeppelin Internasional» kompaniýasy onuň Türkmenistandaky dileri bolup durýar.

Şeýle hem gymmat bahaly ýapon we amerikan maşynlarynyň tehniki we serwis hyzmatynyň ýola goýlandygyny bellemek gerek, munuň özi olaryň uzak wagtlap netijeli ulanylmagyna ýardam berýär.