Geçen hepde ruhy-ahlak babatda göwnüňi göterýän ýagdaýda geçdi. Gadymy türkmen topragyna mukaddes Oraza baýramy geldi. Bu baýram elmydama gowulyga ymtylmagyň, günäleri geçmegiň, parahatçylygyň baýramy hasaplanýar. Indi beýik baýrama—Türkmenistanyň Garaşsyzlygynyň 16 ýyllygyna çenli galan günler sanalyp ugraldy. Şol günleriň her biri täze desgalary ulanmaga bermek dabaralara ýa-da bu şanly senä bagyşlanan beýleki wakalara beslenýär.
Ählihalk baýramçylygynyň öňüsyrasynda Prezident Köşgünde her ýylda edebiýat, medeniýet we sungat işgärleriniň arasynda yglan edilýän Türkmenistanyň Prezidentiniň bäsleşigiň ýeňijileriniň sylaglamak dabarasy bolup geçdi. Şu ýylda täze galkynyş eýýamyna mahsus ösüşe gönükdirilen reformalaryň amala aşyrylýan mahalynda, ählumumy ruhy galkynyş ýagdaýynda geçen bu uly döredijilik gözden geçirilişine müňlerçe adam—ýurdumyzyň ähli künjeklerinden dürli ýaşdaky we dürli hünärdäki adamlar gatnaşdy. Olary bir maksat, ýagny häzirki wagtda Garaşsyz, Bitarap Türkmenistanyň durmuşyny öz döredijiliginde beýan etmek maksady birleşdirdi.

Gurbanguly Berdimuhamedow dabara gatnaşyjylaryň öňünde çykyş edende medeniýetiň we sungatyň häzirki zaman türkmen jemgyýetiniň durmuşynda möhüm ähmiýete eýe bolup durýandygyny belledi. Döwlet baştutany: «Indi biz täze döwürde ýaşaýarys. Döredijilik işgärleriniň hem täze döwre öz garaýşy, goşandy bolmaly. Siz öz eserleriňiz bilen adamlara şatlyk paýlap, demokratiýany ösdürmek, azatlygy, erkinligi wasp etmek ýaly işlerde nusgawy türkmen edebiýatynyň we sungatynyň ajaýyp däplerini dowam etdirijiler we ösdürijiler bolmalysyňyz» diýdi.

Milletiň ruhy-ahlak galkynyşyna, jemgyýetde ynsanperwerligiň belent ýörelgeleriniň berkarar edilmegine, asyrlarboýy türkmen medeniýetiniň kökleriniň gözbaşy bolan özboluşly ruhubelentligiň saklanylmagyna, täze zehinli nesilleriň terbiýelenilmegine, täze döredijilik nesilleriniň döremegine aýratyn ähmiýet bermek bilen, döwlet döredijilik işgärleriniň durmuşy we netijeli işlemegi üçin ähli şertleri döretmäge çalyşýar. Adamlaryň maddy hal-ýagdaýyny gowulandyrmak, her bir maşgalanyň durmuş derejesini ýokarlandyrmak, her bir adama öz döredijilik başlangyçlaryny amala aşyrmaga mümkinçilik bermek ýurdumyzyň sosial ösüşiniň esasy wezipesi bolup durýar. Munuň özi döwlet syýasatyna ynsanperwerlik we sahawatlylyk çaýýar. Täze döredijilik şäherjigini döretmek ideýasy munuň nobatdaky subutnamasydyr. Şol şäherjikde döwrebap we ähli oňaýlyklary bolan ýaşaýyş jaýlary, çagalar baglary, sungat mekdepleri we döredijilik ugurly ýokary okuw mekdepleri jemlener. Prezident bu teklibi bäsleşiginiň ýeňijilerini sylaglamak dabarasynda orta atdy.
Garaşsyzlyk baýramçylygyna bagyşlanyp geçirilen we indi geçiriljek dabaralar köpugurly bolup, giňden bellenilýär. Türkmen paýtagtynda baýramçylyga gabatlanyp täze binalar ulanmaga berildi, kaşaň jaýlaryň ýene biri bilen ýaşaýyş jaý fondunyň üsti ýetirildi. Soňra Ruhabat etrabynyň Gypjak obasynda aragatnaşyk edarasynyň administratiw-tehniki binasy poçta bölümi bilen bilelikde, şäherara-halkara gepleşikler nokady, sanly ATS ulanmaga berildi. Balkanabatda ýöriteleşdirilen «Altyn däne» firma dükany açyldy, onda çörek-bulka we konditer önümleriniň dürli görnüşleri bar.
Uly ähihalk baýramçylygyna taýýarlanmak bilen, Türkmenistanyň takyk iş depginini saklamagyny dowam etdirýändigini aýtman geçmek bolmaz. Munuň özi kanuna laýyk ýagdaýdyr. Çünki ýurduň taryhyndaky her bir şanly sene möhümdir, şonuň öňüsyrasynda we baýramçylyk günlerinde bolup geçýän wakalar bilen birlikde onuň ähmiýeti has-da artýar. Munuň özi ýeke-täk maksat däldir—uly möçberli özgerişleriň tebigy prosesi dowam edýär. Ähli zat özgerýär: ykdysadyýetde düýpli özgertmeler bolup geçýär, döwlet häkimiýetiniň institutlary reformirlenýär, içeri we daşary syýasatdaky çemeleşmeler çuňlaşdyrylýar.

Prezident Gurbanguly Berdimuhamedowyň Içeri işler ministrliginde geçiren giňişleýin maslahaty geçen hepdäniň has möhüm wakalarynyň birine öwrüldi. Biz öz täze taryhymyzy kanuny ileri tutmak, Konstitusiýa arkaly raýatlaryň kepillendirilen azatlyklaryny we hukuklaryny berjaý etmek esasynda gurýarys. Döwlet baştutanynyň hukuk goraýjy düzümleriň işgärleri bilen geçiren talap edijilikli gürrüňiniň temasy hukuk goraýjy edaralaryň işgärleriniň jemgyýetde agzybirligi we jebisligi pugtalandyrmak bilen, hut şu ýörelgeleriň goragynda durmalydygy barada boldy. Kanuny ýerine ýetirmek— döwletiň we her bir raýatyň mukaddes borjy bolup durýar. Hormatly Prezidentimiz şu kadanyň jemgyýetimizde gyşarnyksyz ýerine ýetirilmegini gazanmaga çalyşjakdygymyzy we hökman gazanjakdygymyzy nygtady.

Geçen hepdäniň ahyrynda geçirilen Ministrler Kabinetiniň mejlisiniň gün tertibine-de prinsipial häsiýetli meseleler goşuldy. Milletiň lideriniň reformalary tizleşdirmegiň möhümdigini aýdyp, muňa yzygiderli, hyjuwly we oýlanyşykly çemeleşýändigi bellidir. Intuisiýa, global syýasy we ykdysady maksatlaryň özenine çuňňur aralaşmak, pragmatizm we berk ölçegli berk reallyklary öňe sürýän döwürde, ylmy-tehniki progresiň soňky gazananlaryny gijikdirmän ulanmak arkaly ösýän ýurtlar bilen bu intellektual bäsdeşlikde yzda barýanlaryň arasyndaky tapawudyň ýylsaýyn artýan mahalynda, milletiň ykbaly barada aladalanmak—türkmen liderine üçünji müňýyllygyň has çylşyrymly şertlerinde ýeke-täk dogry pozisiýanyň eýelenilmelidigini salgy berýär.

Ählihalk tarapyndan saýlanylan Prezidentiň Türkmenistany mundan beýläk-de ösdürmek boýunça işläp düzen strategiýasynda syýasy, ykdysady, sosial faktorlar berk baglanyşdyrylýar, çünki bular ýurdumyzyň halkara bileleşigindäki pozisiýasyny berkitmelidir. Ine, bu gezek hem Gurbanguly Berdimuhamedow milli ykdysadyýeti halkara parametrlerine tiz ýetirmek barada aýdanynda, dünýä boýunça toplanan tejribäniň öwrenilmelidigini, halk hojalygyny dolandyrmagyň netijeli we çeýe sistemasynyň döredilmelidigini, bazaryň döwrebap marketing, harytlary öndürijileriň we hyzmatlary edýänleriň bäsdeşligi, hususy sektory pugtalandyrmak ýaly elementleriniň işjeň ýagdaýda ornaşdyrylmalydygyny belläp, şol wezipäni durmuşa geçirmegiň mehanizmini kesgitledi.

Ykdysady reformanyň üstünlikli bolmagy Türkmenistanyň Strategik meýilnamalaşdyryş we ykdysady ösüş institutynyň, şeýle hem Türkmenistanyň Statistika baradaky döwlet komitetiniň işiniň netijesine bagly bolar. Bularyň esasy wezipeleri ykdysadyýetde bolup geçýän prosesleri kompleksleýin seljermekden, ýakyn geljek we has uzak ýyllar üçin praktiki maslahatlary işläp düzmekden ybarat bolup durýar. Şolar esasynda döwletiň pul-kredit, salgyt-býujet, nyrh syýasaty dörediler, aýry-aýry pudaklaryň we tutuş ýurduň ösüşiniň ileri tutulýan ugurlary kesgitleniler. Şonda diňe bir maliýe, ykdysadyýet, statistika boýunça işleýänleriň däl-de, ähli ministrlikleriň we edaralaryň ýolbaşçylarynyň hem öz işlerini düýpgöter täzeden guramagy möhümdir. Indiden beýläk olaryň işiniň netijeliligi sanlaryň we görkezijileriň toplumy bilen däl-de, anyk işler, ýagny ilkinji nobatda ilatyň isleg bildirýän ýokary hilli harytlarynyň, azyk önümleriniň bolelinligi, elbetde, olaryň önümçiliginiň nyrhlaryň durnuklylygyny üpjün etmäge mümkinçilik berýän ýokary düşewüntliligi esasynda kesgitlener.

Geçen hepdede daşary syýasata degişli wakalar hem bolup geçdi. Şol wakalar Türkmenistanyň halkara derejesindäki pozisiýasyny aýdyň häsiýetlendirýär. Türkmen döwletiniň baştutany öz daşary syýasy strategiýasyny döretmek bilen, parahatçylygyň we ynsanperwerligiň hatyrasyna strategiki hyzmatdaşlyga, hoşniýetli goňşuçylyga, özara peýdalylyk hem-de birek-biregiň bähbitlerine hormat goýmak prinsiplerine esaslanýan deňhukukly hyzmatdaşlyga gönükdirilen ýörelgelere eýerýär. Munuň halkara syýasy we işewür toparlar tarapyndan has giňden goldanýandygyny durmuş görkezýär.
Türkmenistan bilen Ýewropa Bileleşiginiň häzirki wagtda hil taýdan täze derejä çykýan, şunuň bilen baglylykda ikitaraplaýyn hyzmatdaşlygy giňeltmegiň ägirt uly perspektiwasy açylýan gatnaşyklarynyň has-da işjeňleşdirilmegi munuň aýdyň subutnamasydyr. Gurbanguly Berdimuhamedowyň türkmen paýtagtynda saparda bolan Ýewropa Bileleşiginiň daşary syýasat we howpsuzlyk boýunça Ýokary wekili Hawýer Solana we Ýewropa Bileleşiginiň Merkezi Aziýa ýurtlary boýunça ýörite wekili Pýer Morel bilen duşuşygynyň barşynda bu barada gürrüň edildi. Meseleleriň ençemesini ara alyp maslahatlaşyp, söhbetdeşler ýangyç-energetika pudagynda hyzmatdaşlyga aýratyn üns berdiler. Türkmenistan we Ýewropa Bileleşiginiň ýurtlary bu ugurda, şol sanda transmilli turba geçirijiler strukturasyny döretmek, Hazaryň türkmen ýalpagynda perspektiwasy uly uglewodorod ýataklaryny özleşdirmek ýaly özara bähbitli işleri amala aşyrmak üçin uly mümkinçilikleriň bardygyny bellediler.

Energetika howpsuzlygy ykdysady ösüşiň we syýasy durnuklylygyň möhüm faktorydyr. Şu babatda dünýä derejesinde uly ähmiýetli uglewodorod serişdeleri bolan Türkmenistan öz ägirt uly potensialyny tutuş dünýä bileleşiginiň bähbitlerine netijeli durmuşa geçirmegiň meselelerini çözmäge örän jogapkärçilikli we konstruktiw garaýşy görkezdi we görkezýär. Türkmen lideriniň başlangyjy bilen öňe sürülýän strategik taslamalar-Hazarýaka we Hazarüsti gaz geçirijileri, Türkmenistan-Hytaý, Türkmenistan-Owganystan-Päkistan-Hindistan magistrallary Merkezi Aziýa ýurtlarynyň sosial-ykdysady ösüşine oňyn täsir edip biler, Ýewropa döwletleriniň ýangyçlara isleglerini kanagatlandyrmaga ýardam eder. Başgaça aýdanyňda, häzirki wagtda türkmen tebigy gazy päk ýürekli dostluga we adalatly hyzmatdaşlyga taýýar dürli ýurtlaryň hem-de halklaryň ykdysady integrasiýasy üçin serişde hökmünde çykyş edýär.

Diňe bir özüniň däl, eýsem partnýorlarynyň hem bähbitlerini göz öňünde tutup, uly möçberli halkara hyzmatdaşlygynyň pozisiýasyndan ugur alýan döwletdigini yglan eden Türkmenistan bu ugurda täzeden-täze ädimleri ädýär. Ýurduň ykdysadyýetiniň strategik pudaklarynyň ählisi-nebitgaz, demir ýol ulaglary, aragatnaşyk we kommunikasiýa pudaklary özara hyzmatdaşlygyň orbitasyna çekildi. Häzirki wagtda sanatoriýa-şypahana dynç alşy we halkara syýahatçylygy sferasynda bilelikdäki taslamalar üçin çäksiz mümkinçilikler açyldy. Elbetde, bu ýerde ilkinji nobatda «Awaza» milli syýahatçylyk zolagy barada gürrüň gidýär, ýakyn wagtda ägirt uly taslamalaryň ençemesiniň ilkinjisine-emeli derýanyň gurluşygyna başlanylar. Geçen hepdede köpçülikleýin habar beriş serişdelerinde «Türkmenistanyň käbir kanunçylyk namalaryna üýtgetmeler we goşmaçalar girizmek hakynda» Türkmenistanyň Kanuny çap edildi. Onda daşary ýurtly maýa goýujylaryna işjeň hyzmatdaşlygy ösdürmäge, ýurduň ykdysadyýetine daşary ýurt maýa goýumlaryny çekmäge güýçli itergi berjek hukuk kepilleri beýan edilýär.

Ertir goňşy Eýranyň paýtagty Tähranda başlanýan Hazarýaka döwletleriň baştutanlarynyň sammiti dürli ugurlarda üstünlikli we berk gatnaşyklary ýola goýmak üçin täze mümkinçilikleri açar. Ygtybarly binýat hökmünde Hazaryň hukuk derejesini işläp taýýarlamak meselesiniň oňa gatnaşyjylaryň üns merkezinde boljakdygy, Hazarýaka sebitindäki hyzmatdaşlygyň mundan beýläk hem şoňa esaslanyp guruljakdygy we ösdüriljekdigi göz öňünde tutulanda, ýokary derejedäki duşuşygyň netijeleri örän möhümdir.

Şol jähtden Tähran sammitiniň yzysüre—Garaşsyzlyk aýynyň 18-inde Özbegistan Respublikasynyň Prezidenti Islam Karimowyň Türkmenistana resmi saparynyň boljakdygyny bellemek gerek. Soňra Sanjar aýynyň 22-sinde Aşgabatda ýene bir iri we möhüm forum—GDA ýurtlarynyň hökümet baştutanlarynyň Geňeşiniň mejlisi geçiriler. Bu wakalaryň her biri däbe öwrülen dostluk, hoşmeýilli goňşuçylyk we ruhy ýakynlyk gatnaşyklary bilen baglanyşykly döwletleriň ikitaraplaýyn gatnaşyklaryny berkitmekde hem, dünýäniň geosyýasy we ykdysady kartasynda pozisiýalaryny pugtalandyrmakda hem örän möhüm, şanly wakadyr.