Düýn agşam Türkmenistanyň Prezidenti Gurbanguly Berdimuhamedow paýtagtymyza nobatdaky iş sapary bilen aýlanyp gördi we şäher gurluşygynyň täze iri taslamalaryny durmuşa geçirmäge badalga berdi.

Garaşsyzlyk şaýolundan günorta tarapa ugrap, milletiň lideri ilki bilen Türkmenistanyň Daşary ykdysady döwlet bankynyň kaşaň jaýynyň garşysynda saklandy, bu ýerde ony Ministrler Kabinetiniň Başlygynyň orunbasarlary N.Şagulyýew we M.Ýazmuhammedowa, medeniýet we teleradioýaýlymlar ministri K.Çaryýardurdyýew, Türkmen döwlet medeniýet institutynyň rektory H.Amangeldiýew, şeýle hem Aşgabat şäheriniň häkimi D.Orazow garşyladylar. Bu ýerde Gurbanguly Berdimuhamedow geljekki döredijilik şäherçesiniň ýerleşjek ýerini kesgitläp, täze özboluşly taslamany durmuşa geçirmäge badalga berdi, milletiň lideri bu baradaky pikiri Türkmenistanyň Prezidentiniň «Beýik Saparmyrat Türkmenbaşynyň Altyn asyry» bäsleşiginiň ýeňijileriniň sylaglanyş dabarasynda eden çykyşynda aýdypdy. Milletiň lideriniň pikirine görä, bu özboluşly toplumyň hataryna döredijilik ýokary okuw mekdepleri we sungat mekdepleri, şol sanda Türkmen döwlet medeniýet instituty we Türkmen milli konserwatoriýasynyň ýanyndaky ýöriteleşdirilen sazçylyk mekdep internaty, şeýle hem çagalar baglary we döredijilik işgärleri üçin döwrebap amatly jaýlar girer. Gurbanguly Berdimuhamedowyň belleýşi ýaly, aýratyn döredijilik bileleşigini döretmäge, ýaş zehinleri terbiýelemäge, täze döredijilik dinastiýalarynyň döremegine we asyrlarboýy türkmen milli medeniýetiniň gözbaşy bolup gelýän aýratyn ruhy atmosferany saklamaga ýardam etmek—täze şäherçäni döretmegiň baş maksadydyr.

Soňra döwlet baştutany paýtagtyň köp gatnawly köçeleri bolan 10 ýyl abadançylyk we Bitarap Türkmenistan şaýollarynyň kesişýän ýerinde saklandy. Bu ýerde Gurbanguly Berdimuhamedow çatrygyň dört tarapyndaky ýeriň toplumlaýyn gurluşygynyň taslamasy bilen tanyşdy, bu ýerde eýýäm ýokary amatlyklary bolan ýaşaýyş jaýlarynyň ikisi guruldy. Türkmenistanyň Prezidentiniň tabşyrygy bilen taýýarlanan taslamada ýene-de köp gatly ýaşaýyş jaýlarynyň ikisiniň we döwrebap söwda merkezleriniň 4-siniň gurluşygy göz öňünde tutulýar. Olar bilelikde bitewi binagärlik toplumyny döreder. Teklip edilen warianta jikme-jik garap we oňa birnäçe goşmaçalar we düzedişler girizip, Gurbanguly Berdimuhamedow umuman ony makullady. Aşgabatda we tutuş ýurtda amala aşyrylýan şäher gurluşyk maksatnamasynyň sosial ugra gönükdirilendigini ýene bir gezek nygtap, döwlet baştutany taslamalaryň awtorlaryndan we ony durmuşa geçirmäge jogapkär adamlardan gurluşygyň ýokary hilli bolmagyny we bellenen möhletde tamamlanmagyny üpjün etmegi talap etdi.

Soňra Gurbanguly Berdimuhamedow Arçabil şaýolundan «Serdaryň saglyk ýolunyň» başlanýan ýeri bolan Giňdiwaryň etegine tarap ugrady, bu ýerde paýtagtymyzy we onuň eteklerini abadanlaşdyrmak hakda jikme-jik gürrüň edildi. Iş saparynda öz ýanynda bolan ýolbaşçylaryň ünsüni ýol infrastrukturasyny kämilleşdirmäge we bag ekmäge çekip, döwlet baştutany öňde goýlan wezipeleri çözmäge toplumlaýyn çemeleşmegiň gerekdigini belledi. Şäher hojalygyny ýöretmek barada aýdylanda bolsa, şunda öňdebaryjy dünýä tejribesini nazarda tutmak, ony işjeň ulanmak we ýerli ýagdaýlary göz öňünde tutup durmuşa ornaşdyrmak gerek diýip, hormatly Prezidentimiz aýtdy. Häzirki Aşgabat—diňe bir çalt depginde ösýän megapolis bolman, eýsem Watanymyzyň paýtagtydyr, şonuň üçin hem bu ýerde alnyp barylýan işleriň ählisi ýokary derejede ýerine ýetirilmelidir diýip, Gurbanguly Berdimuhamedow nygtady.