Gurbanguly Berdimuhamedow Türkmenistanyň neşir önümleriniň II halkara sergisine we maslahatyna gatnaşyjylary hem-de neşirýat ulgamynyň işgärlerini gutlady.Gutlagda:«Mähriban Diýarymyzyň halk hojalygynyň möhüm pudaklarynyň biri bolan neşirýat ulgamynda Garaşsyzlyk ýyllary içinde gazanylan ösüşler, guwandyryjy üstünlikler, ýetilen belent sepgitler üçin size çuňňur minnetdarlyk bildirýärin”-diýip gutlagda aýdylýar.

Şeýle hem: “Men okuw kitaplaryny, gollanmalary, çeper eserleri, gazet-žurnallary, şeýle hem Türkmenistanyň milli medeniýet «Miras» merkezi tarapyndan neşire taýýarlanylýan gadymy golýazmalary ýokary hilli bezäp, neşir edip, halk köpçüligine ýetirýän hünärmenleri, ýaş nesle sowat, bilim berýän mugallymlar ýaly, sogap iş edýän adamlar hasap edýärin. Çünki, halkyň medeni, aň-bilim derejesini ösdürmezden ösen, kuwwatly döwleti gurup bolmaz. Ýurduň ykdysady kuwwatyny artdyrmak, ony ösen döwletleriň hataryna goşmak üçin, ilki bilen, bilimli, ruhy baý, maksada okgunly, sagdyn pikirlenmäge ukyply, Watana wepaly, kämil nesil kemala getirmeli. Bu jogapkärli we wajyp wezipä hötde gelmekde siziň alyp barýan işleriňiz aýratyn bellenilmäge mynasypdyr. Biz okuw kitaplaryny, adamlaryň ruhuny galkyndyrýan, çuňňur many-mazmunly, oňat bezegli çeper eserleri halkymyzyň ruhy baýlygy hasaplaýarys. Bu baýlygyň üstüni dolduryp durmak, halkyň neşir önümlerine bolan isleglerini kanagatlandyrmak siziň mukaddes borjuňyzdyr-diýip bellenilýär.