Ýurdumyzyň baş baýramçylygynyň-mukaddes Garaşsyzlygymyzyň 16 ýyllygynyň bosagasynda türkmen paýtagtyny ýene bir ajaýyp seýilgäh bezedi. Aşgabadyň iň kän gatnawly we çalt depginde gurulýan ýerleriniň biriniň-Garaşsyzlyk şaýolunyň günorta böleginde şu gün onuň açylyşy boldy. Uly bolmadyk täsin seýilgäh Türkmenistanyň Daşary ykdysady döwlet banky bilen Türkmenistanyň Gahrymany Atamyrat Nyýazow adyndaky orta mekdebiň aralygynda peýda boldy. Türkmenistanyň Daşary ykdysady döwlet bankynyň buýurmasy esasynda we şonuň serişdeleriniň hasabyna täze dynç alyş zolagyny «Şahin» türk firmasy gurdy we şol ýerde agaç nahallaryny oturtdy.

Iki gektara golaý meýdany eýeleýän seýilgähiň merkezinde çüwdürimli howuz we ony döredijileriň pikirlerine görä «Suw, howa we ýaşaýyş» düşünjesini aňladýan binagärlik kompozisiýasy ýerleşýär. Şol ýerde aşgabatlylara we paýtagtyň myhmanlaryna ýakymly täsinlik garaşýar: agşam çaglary we gijelerine ýörite yşyklandyryş arkaly çüwdürimiň akymlary älemgoşaryň ähli öwüşginleri bilen ýalkym atar. Seýilgähiň esasy ýodalary beton we granit bilen örtülipdir. Şol ýerde dürli görnüşli agaçlar we gyrymsy bezeg ösümlikleri oturdylypdyr, gülli meýdançalar döredilipdir, özboluşly oturgyçlar we yşyklandyryjylar goýlupdyr.

Garaşsyzlyk şaýolunyň ugrundaky täze seýilgäh Aşgabatda döredilýän seýilgäh-bag ansambly bilen sazlaşykly utgaşýar, ol şäheriň ýüzüni görkezýän ajaýyp ýerleriň birine öwrülýär. Galyberse-de, ol türkmen paýtagtynyň ilatynyň hem ýurdumyzyň ähli künjeklerinden we daşary ýurtlardan hem gelýän köpsanly myhmanlaryň söýgüli dynç alyş ýeri bolar.