Düýn paýtagtymyzda Türkmenistanyň Medeniýet we teleradioýaýlymlar ministrliginiň mukaddes Garaşsyzlygyň 16 ýyllygyna bagyşlanyp yglan eden «Muňa ajap Türkmenistan diýerler» atly döredijilik bäsleşiginiň jemi jemlendi. Bu ýerde indi däbe öwrülen baýramçylyk gözden geçirilişine gatnaşýan ýurdumyzyň şekillendiriş we amaly-haşam sungatynyň ussatlarynyň uly sergisi açyldy.

Türkmenistanyň Medeniýet we teleradioýaýlymlar ministrliginiň Sergi merkezinde görkezilýän sergide tanymal, şeýle hem ýaňy döredijilik ýoluna başlan ýaş hudožnikleriň—žiwopisçileriň, grafikleriň, heýkeltaraşlaryň, keramika we haly ussatlarynyň eserleriniň 250-ä golaýy bar. Dürli žanrlarda, stillerde we her dürli usulda we dürli reňkler ulanylyp ýerine ýetirilen bu işleriň ählisini bütewi bir tema—indi 16 ýyl bäri Garaşsyzlyk, progress we gülläp ösüş ýoly bilen ynamly öňe barýan Diýara söýgi temasy birleşdirýär. Şonuň üçinem türkmen halkynyň milli medeniýetiniň hakyky gülläp ösmeginiň eýýamy bolan täze taryhy eýýamyň wakalary beýan edilýän eserler sergide hormatly orny eýeleýär.

Türkmenistanyň Medeniýet we teleradioýaýlymlar ministrliginiň, ýurduň Suratkeşlar birleşiginiň we Sergi merkeziniň direksiýasynyň bilelikdäki tagallalary bilen guralan baýramçylyk sergisiniň açylyşyna döredijilik intelligensiýasynyň, jemgyýetçilik guramalarynyň, köpçülikleýin habar beriş serişdeleriniň wekilleri, paýtagyň okuwçy ýaşlary gatnaşdylar. Ýygnananlar hormatly Prezidentimiz Gurbanguly Berdimuhamedowyň jemgyýetçilik durmuşynyň ähli ugurlaryny öz içine alýan progressiw reformalar syýasatyny biragyzdan goldaýandyklaryny aýtdylar, milli medeniýeti we sungaty dikeltmek hem-de ösdürmek onuň ileri tutulýan ugurlarynyň biridir. Döwlet baştutanyna türkmen halkynyň bagtyýarlygynyň we abadançylygynyň hatyrasyna alyp barýan asylly işleri üçin tüýs ýürekden minnetdarlyk bildirip, şeýle hem golaýlap gelýän Garaşsyzlyk baýramy bilen gutlap, dabara gatnaşyjylar milletiň liderine berk jan saglyk, uzak ömür, ýokary döwlet wezipesinde egsilmez güýç-gaýrat we täzeden-täze ajaýyp üstünlikler arzuw etdiler.

Bäsleşigiň ýeňijilerini sylaglamak dabaranyň tolgundyryjy pursaty boldy. Emin agzalarynyň karary bilen, birinji orun hudožnikler A.Amangeldiýewe («Türkmen» triptihi) we N.Ýerşowa (natýurmortlar toplumy) üçin berildi. Ikinji orny M.Baltaýew («Saltyklar mukamy» žiwopis polotnosy) we B.Annagulyýew («Orta asyr» keramika kompozisiýasy), üçünji ýeri A.we S.Hojagulyýewler («Çarwalar» gobeleni) we O.Agabaýew («Ruhy çemen» we «Meýdan çemeni» grafikasy) üçin eýelediler. Döredijilik bäsleşiginiň ýeňijilerine Türkmenistanyň Medeniýet we teleradioýaýlymlar ministrliginiň adyndan pul baýraklary gowşuryldy. Mukaddes Garaşsyzlygyň 16 ýyllyk baýramynyň şanyna ýurduň Suratkeşler birleşigi we Sergi merkeziniň direksiýasy, şeýle hem höweslendiriji baýraklaryň onusyny döretdi. Baýraklara T.Esenmämmedow, G.Rozykulowa, R.Umarow, W.Gyllyýewa, Ý.Madatow, A.Saryýew, T.Kiselewa, K.Seýitmuhammedow, G.Tatow we A.Jumanyýazow mynasyp boldular.