«Türkmengeologiýa» döwlet konserniniň «Lebapnebitgazgözleg» müdirliginiň hünärmenleri tarapyndan Bagaja ýatagynda burawlanan 37-nji gözleg guýusyndan debiti million kub metrden geçýän gazyň senagat möçberindäki güýçli akymy alyndy. Uglewodorod ýangyjynyň täze çeşmesiniň çuňlugy taslama boýunça 3 müň metrden geçýär. Häzirki wagtda bu ýerde gözleg işleri amala aşyrylýar, şol işleriň netijesinde burawlaýjylaryň ýüze çykaran ýatagyndaky önümli gatlagyň parametrleri kesgitlener.

Bagaja Lebabyň geljegine uly umyt bildirilýän gaz kondensatly ýataklarynyň biridir. Kanadanyň «Termo Dizaýn inžiniring» kompaniýasy tarapyndan dolulygyna gurlup ulanmaga berlen gazy gaýtadan işleýän kuwwatly we döwrebap toplum Bagajanyň çig mal resurslarynyň hasabyna işleýär. Öndürilýän önüm—suwuklandyrylan gaz, esasan, eksporta ugradylýar, gaz kondensaty bolsa Seýdiniň nebiti gaýtadan işleýän zawodyna iberilýär, bu ýerde şondan dünýä bazarlarynda uly isleg bildirilýän ýokary hilli, dury nebit önümleri taýýarlanylýar.
Häzirki wagtda Bagajada synag işlerinden we senagat taýdan işläp taýýarlamalardan başga-da, gözleg-agtaryş işleri intensiw ýagdaýda ýaýbaňlandyryldy, şol işler uglewodorodlaryň täze we önümli ýataklarynyň ýüze çykarylmagyna we degişlilikde, nebitgaz pudagynyň çig mal binýadynyň pugtalandyrylmagyna gönükdirilendir. Mälim bolşy ýaly, şu wezipe ýurdumyzyň ýangyç-energetika toplumynda ileri tutulýan ugurlaryň biri bolup durýar, şol wezipäniň üstünlikli çözülmegi uglewodorod ýangyjynyň çykarylýan we gaýtadan işlenilýän möçberleriniň köpeldilmegine, dürli görnüşdäki nebithimiýa önümleriniň önümçiliginiň artdyrylmagyna ýardam berer.

Amyderýanyň sag kenarynda-da gözleg-agtaryş işleri güýçli depginler bilen alnyp barylýar, çünki Lebap welaýatynda nebitiň we gazyň çykarylyşyny ösdürmegiň perspektiwalary hut şu ýerler bilen baglydyr. Häzirki güne çenli Amyderýanyň sag kenaryndaky ýataklarda bar bolan «mawy ýangyjyň» gorlarynyň umumy möçberi takmynan 1,3 trillion kub metre barabar diýlip baha berilýär. Geçen ýylyň tomsunda hut şu ýerde Türkmenistan—Hytaý gaz geçirijisiniň gurluşygyna girişilmegi-de ýöne ýerden däldir, bu gaz geçirijisi Bagtyýarlyk şertnamalaýyn ýere degişli bolan Samandepe ýatagyndan gözbaş alyp gaýdýar. Dört döwletiň, şol sanda Özbegistanyň we Gazagystanyň çäklerinden çekilip, eksporta iberilýän täze ýangyç geçiriji desgany XXI asyryň iri halkara taslamasy diýip atlandyrýarlar. Onuň umumy uzynlygy 7 müň kilometre, «mawy ýangyjy» geçirijilik ukyby 30 milliard kub metre barabar bolar.
Lebabyň ýerasty gatlaklary diňe bir gaza däl, eýsem nebite hem baýdyr. Ýaşyldepe käni munuň aýdyň mysalydyr. Lebaply nebitçiler bu ýerde üç ýyldan gowrak wagt mundan ozal «gara altyn» çykaryp başladylar we şu döwürde ýer astyndan 1,5 million tonnadan gowrak uglewodorod çig malyny çykardylar. Gysga möhletlerde tehnologik desgalaryň tutuş toplumy — nebit arassalaýjy desgalar, rezerwuarlar, nebit ýygnaýjy nokat guruldy, guýular abadanlaşdyryldy, uzynlygy 80 kilometrden gowrak bolan Ýaşyldepe—Pelwert nebit geçirijisi çekildi. Bu nebit geçirijisi arkaly Amyderýanyň çep kenaryna çig mal ugradylýar, soňra ol bu ýerdäki nebit guýulýan terminaldan Seýdiniň nebiti gaýtadan işleýän zawodyna daşalýar.

Şu ýylyň başynda Lebap welaýatyna iş sapary wagtynda hormatly Prezidentimiz Gurbanguly Berdimuhamedow Ýaşyldepäniň nebitgaz çykarylýan ýataklarynda bolup gördi we pudagyň zähmetkeşleriniň öňünde iň ýakyn wagtlarda bu ýerde çykarylýan nebitiň bir gije-gündizdäki möçberini 2 müň tonna çenli ýetirmek barada wezipe goýdy. Döwlet Baştutanynyň nygtaýşy ýaly, häzirki wagtda bütin dünýäde iň bir geçginli haryda öwrülen «gara altyn» türkmen halkynyň esasy baýlyklarynyň biridir. Ol her bir türkmen maşgalasyna abadançylyk getirýär.
Gözleg-agtaryş we ulanyş buraw işleriniň möçberlerini artdyrmak bilen ýurdumyzyň ýangyç-energetika toplumynyň bölümleri ýangyjyň çykarylyşyny yzygiderli köpeldýärler. Mysal üçin, golaýda «Türkmennebit» döwlet konserniniň buýurmasy boýunça «Türkmengaz» döwlet konserniniň Ojakdaky buraw işleri müdirliginiň önümçilik brigadalary Ýaşyldepede 019 belgili guýyny burawlamak işlerini tamamladylar. Onuň taslama çuňlugy 3100 metrdir. Bu guýy synagdan geçirilende, nebitiň 50 tonna golaý debitli akymy alyndy. Barlag işleri tamamlanandan soň, guýy nebit çykaryjylara ulanmak üçin berler.

Tutuşlygyna alanyňda, ýurdumyzyň ýangyç-energetika toplumyny ösdürmegiň netijeli strategiýasyny yzygiderli durmuşa geçirmek arkaly eýýäm ýakyn günlerde Bagajanyň, Ýaşyldepäniň örän baý uglewodorod gorlary, Lebabyň beýleki nebitgazly känleri halkyň abadançylygyna hyzmat etmäge gönükdiriler. Bu bolsa Garaşsyz, baky Bitarap Türkmenistanyň abadançylygynyň we gülläp ösüşiniň kepili bolar.