Türkmenistanda neşe serişdeleriniň ulanylmagyna we olaryň bikanun dolanyşygyna garşy göreşiň halkara gününe bagyşlanan hepdelik başlandy. Bu sene her ýylda tutuş dünýä boýunça Oguz aýynyň 26-synda bellenilýär. Geçen dynçgününde türkmenistanlylaryň ählisi üçin sagdyn durmuş ýörelgesiniň ajaýyp simwolyna öwrülen «Serdaryň saglyk ýoluna» çykylmagy neşe serişdelerine garşy göreş çäreleriniň başlangyjy boldy. Umumymilli «Galkynyş» hereketine girýän jemgyýetçilik guramalary, Türkmenistanyň Neşelere garşy göreşmek baradaky döwlet gullugy, ýurdumyzyň Bilim, Saglygy goraýyş we derman senagaty ministrlikleri we Aşgabat şäher häkimligi tarapyndan guralan bu uly möçberli çärä «XXI asyryň mergisine» garşy berk böwet goýmak maksady bilen birleşen aşgabatlylaryň müňlerçesi gatnaşdy.

Deňiz portlarynda Hazarýaka döwletleriň we halkara guramalarynyň wekilleriniň gatnaşmagynda neşe serişdeleriniň bikanun dolanyşygyna garşy göreş bilen bagly meseleler boýunça ilkinji gezek geçirilýän halkara maslahaty hepdeligiň esasy çäreleriniň birine öwrüler, bu maslahat Pariž paktynyň başlangyjy bilen geçirilip, Oguz aýynyň 24-inde Aşgabatda öz işine başlar.

Türkmenistan neşe serişdeleriniň bikanun dolanyşygyna garşy göreş boýunça halkara ylalaşyklarynyň ählisine işeňňir gatnaşyjy bolup durýar. Hususan-da, 1996-njy ýylda ýurdumyz neşe serişdeleriniň we psihotrop maddalaryň bikanun dolanyşygyna garşy göreş boýunça BMG-niň halkara konwensiýalarynyň üçüsine goşuldy. Ýurdumyzda BMG-niň, Ýewropa Bileleşiginiň, YHG-niň we beýleki guramalaryň neşe serişdelerine garşy maksatnamalary amala aşyrylyp, neşe serişdeleriniň bikanun dolanyşygyna garşy göreşilmegine, serhetdäki barlagyň güýçlendirilmegine, neşekeşligiň we WIÇ/SPID-iň öňüniň alynmagyna gönükdirilendir.

Hepdeligiň çäklerinde Türkmenistanyň Neşelere garşy göreşmek baradaky döwlet gullugynyň işgärleri kärhanalarda, edaralarda, sanatorilerde we çagalar sagaldyş merkezlerinde neşe serişdeleriniň adamyň saglygyna we şahsyýetine, maşgaladaky gatnaşyklara, jemgyýetçilik tertibine uly zyýan ýetirýändigini düşündirmek boýunça ýörite çäreleri geçirerler. Galyberse-de, esasy habar beriş serişdelerinde neşeleriň ynsanyň bedenine ýaramaz täsirini ýetirýändigini beýan edýän ýörite materiallar çap ediler.

Şu günlerde ýerlerde medisina we bilim ulgamlarynyň, hukuk goraýjy edaralaryň işgärleriniň, jemgyýetçilik guramalarynyň, habar beriş serişdeleriniň wekilleriniň gatnaşmagynda duşuşyklar, düşündiriş häsiýetindäki söhbetdeşlikler we seminarlar, dürli tematiki bäsleşikler geçiriler. Bu çäreleriň ählisi Türkmenistanyň Ýer ýüzündäki ýaşaýşyň hatyrasyna, ýurtda, sebitde we tutuş dünýäde howpsuzlygy, durnuklylygy we yzygiderli ösüşi üpjün etmek maksady bilen, häzirki döwrüň aýylganç, tutuş adamzada howp salýan wehiminiň garşysyna berk durmaga çalyşýandygyny aýdyň görkezer.