Türkmen paýtagtynda tomus paslynda täze binalary ulanmaga bermek dabaralary dowam edýär. Bu gün täze çagalar baglarynyň bir bada ikisi ulanmaga berildi hem-de aşgabatly maşgalalaryň ýene 102-si kaşaň 12 gatly ýaşaýyş jaýlarynyň ikisinde täze jaý toýlaryny tutdular.

Türkmenistanyň Döwlet gümrük gullugynyň buýurmasy boýunça Türkiýäniň «Efor» firmasy tarapyndan gurlan çagalar bagy «Güneş» diýlip atlandyrylýar. Bahasy ABŞ-nyň 4 million dollaryna golaýlaýan bu özboluşly iki gatly toplum Garaşsyzlyk şaýolunyň ugrunda guruldy. Arhitektorlar we taslama düzüjiler çagalaryň 160-synyň özlerini oňaýly duýmagy üçin ähli amatlyklary göz öňünde tutupdyrlar. Okuw geçmek üçin giň we ýagty jaýlar, ýatylýan ýerler, daşary ýurt dillerini we kompýuter boýunça başlangyç bilimleri bermek üçin niýetlenen döwrebap enjamlar bilen üpjün edilen okuw klaslary körpeleriň ygtyýaryndadyr. Şonda ähli enjamlar çagalaryň ýaş aýratynlyklary göz öňünde tutulyp goýlupdyr. Täze çagalar bagynda üsti açyk basseýnleriň ikisi we gyşky basseýn, ähli zerur esbaplar bilen üpjün edilen sport zaly bar, şeýle hem çagalaryň oýnamagy üçin niýetlenen, islendik howada dynç almaga mümkinçilik berýän, tebigy ýagdaýda ýagtylandyrylýan we howasyny üýtgedip bolýan, üsti ýapyk meýdança hem-de milli we beýleki saz gurallarynyň toplumy goýlan aýdym-saz zallary bar. Baýramçylyklar we dabaralar geçirilýän günlerde çagalar we olaryň myhmanlary 300 adamlyk uly aktlar zalynda ýygnanarlar.

Dizaýnerleriň hem çagalar barada alada edendigi görünýär, olar çagalar bagynyň howlusyny bezemekde Türkmenistanyň haýwanat dünýäsine degişli jandarlaryň şekillerini ulanypdyrlar. Binanyň öň tarapynda suw çüwdürimleriniň ikisi bar, olar damjalaýyn usulda suwarýan ulgam bilen birlikde, bu ýerde ýakymly howany döredýär. Simmetrik ýagdaýda ýerleşdirilen we üstüne gyzyl çerepisa örtülen pawilonlaryň sekizisini binagärlik toplumynyň dizaýnyndaky ajaýyp detal hökmünde görkezmek bolar.

Türkmenistanyň Maliýe ministrliginiň buýurmasy boýunça Türkiýäniň «Alp-San» firmasy tarapyndan gurlan çagalar bagynda-da şunuň ýaly ajaýyp şertler döredilipdir. 160 çaga üçin niýetlenen bu haýran galdyryjy şäherjik Bitarap Türkmenistan şaýolunyň ugrunda guruldy. Çagalar üçin goýlan ýörite trenažýorlar onuň esasy aýratynlyklarynyň biridir. Türkmen, rus we iňlis dillerini, kompýuteri öwrenmek üçin okuw otaglary enjamlar bilen doly üpjün edilipdir. Hasap boýunça ol soňky bir ýarym ýylda Aşgabatda açylan mekdebe çenli ýaşdaky çagalar edarasynyň altynjysydyr.

Şol bir wagtyň özünde bu ýerde, Bitarap Türkmenistan şaýolunyň ugrunda Türkiýäniň «Sehil» kompaniýasy tarapyndan gurlan we ähli amatlyklary bolan ýaşaýyş jaýlarynyň ikisinde täze jaý toýlary tutuldy. Şol jaýlaryň biri, ýagny bahasy ABŞ-nyň 8,5 million dollaryna barabar bolan 48 öýli belent ýaşaýyş jaýy Türkmenistanyň Döwlet salgyt gullugynyň buýurmasy boýunça guruldy. Bu ýere göçüp gelenler, esasan, üç we dört otagly öýleriň eýeleri boldular. Bu jaýyň ýanynda Türkmenistanyň Maliýe ministrliginiň buýurmasy boýunça gurlan ýene bir belent bina 54 maşgala göçüp geldi. Bu desganyň bahasy ABŞ-nyň 9 million dollaryndan gowrakdyr.

Ýeri gelende aýtsak, täze ýaşaýyş jaýlaryndaky kwartiralar durmuşda ulanylýan döwrebap tehnika: geýim-gejim we gap-gaç ýuwulýan maşynlar, sowadyjy enjamlar bilen üpjün edilipdir. Aşhanalarda we dalanlarda mebelleriň toplumlary bar.

Şu gün ulanmaga berlen binalaryň ählisinde durmuşda zerur zatlar bilen özbaşdak üpjün edýän ulgamlaryň bardygyny hem aýtmak gerek.