Zeminiň çar künjeginde ýaşaýan ildeşlerimiz bilen ykdysady hyzmatdaşlygy, medeni gatnaşyklary ösdürmek, asylly ynsanperwer maksatlary durmuşa geçirmekde tagallalary birleşdirmek Beýik Galkynyş we özgertmeler eýýamynda berkarar türkmen döwletiniň syýasatynyň esasy ugurlarynyň biri bolmagynda galýar. Taryhy ösüşler we özgertmeler döwründe dünýä türkmenlerinde ata Watany bilen has ysnyşykly gatnaşyk saklamaga, pederleriniň sahawatly gadymy topragynda amala aşyrylýan ägirt uly täzeleniş maksatnamalarynyň durmuşa geçirilişi bilen ýakyndan tanyşmaga has-da amatly mümkinçilikler döreýär.

Täze Galkynyş we özgertmeler eýýamynda gazanylan rowaçlyklara daşary ýurtlarda ýaşaýan watandaşlarymyz bilen bilelikde buýsanmak, dünýä türkmenleriniň jebisligini has pugtalandyrmak üçin, şeýle hem olara Milli baýramymyz—Türkmenistanyň Garaşsyzlygynyň 17 ýyllygy mynasybetli geçirilýän baýramçylyk çärelerine gatnaşmaga mümkinçilik döretmek maksady bilen, Türkmenistanyň Prezidenti Karara gol çekdi. Resminama laýyklykda dünýä türkmenleriniň XI konferensiýasyny 2008-nji ýylyň Garaşsyzlyk aýynyň 24-inde Aşgabat şäherinde çagyrmak bellenildi.

Dünýä türkmenleriniň ynsanperwer birleşiginiň Diwanyna ýurtlar we sebitler boýunça wekilleriň sanynyň we atlarynyň kesgitlenmegini hem-de Konferensiýa gatnaşmagyny üpjün etmek tabşyryldy.

Türkmenistanyň Daşary işler ministrligine, Türkmenistanyň Döwlet migrasiýa gullugyna we beýleki degişli edaralara daşary ýurtly wekilleriň Konferensiýa gatnaşmagyna ýardam bermek, olary ygtyýarnamalar bilen mugt üpjün etmek, konsullyk, hasaba alyş ýygymlaryndan we Türkmenistana gelýän daşary ýurtly adamlar üçin Türkmenistanyň kanunlarynda göz öňünde tutulan beýleki ýygymlardan boşatmak tabşyryldy.