Düýn paýtagtymyzda dostlukly ýurduň baş baýramçylygyna—Russiýanyň gününe bagyşlanan rus kinosynyň hepdeligi açyldy. Bu medeni çäräniň guramaçylary hökmünde Russiýa Federasiýasynyň Aşgabatdaky ilçihanasy bilen Türkmenistanyň Medeniýet we teleradioýaýlymlar ministrligi çykyş etdiler.

Däbe öwrülen kinofestiwalyň programmasyna häzirki zaman rus kinosynyň dürli žanrlaryna degişli çeper filmler girizildi. Şolaryň arasynda «Ada» diýen filosofik drama, real wakalara esaslanýan «Üç günläp Odessada» atly detektiw, basyp alyjy Çingiz han barada gürrüň berýän «Mongol» atly taryhy film, «Biz geljegiň adamlary» atly hyýaly başdan geçirmeler we «Saýlawlar güni» atly komediýa bar. Körpe tomaşaçylar üçin bolsa hemmeler tarapyndan söýülýän «Finist-aýdyň Bürgüt», «Ilýa Muromes», «Aladdiniň jadyly çyrasy» we «Rusaloçka» («Suw perijigi») atly erteki-filmler teklip edilýär.

Türkmenistanyň Magtymguly adyndaky Türkmen milli sazly drama teatrynda kino hepdeliginiň açylyş dabarasynda bellenilişi ýaly, ençeme wagtlardan bäri Türkmenistanyň we Russiýanyň halklaryny tüýs ýürekden dostluk gatnaşyklary birleşdirýär, olar täze taryhy eýýamda döwletara gatnaşyklaryny ösdürmekde möhüm binýada öwrüldi. Bu çäräniň guramaçylary festiwal medeniýet we sungat babatda netijeli gatnaşyklary giňeltmegiň ýolunda nobatdaky ädim bolar we häzirki zaman rus kinematografy bilen türkmenistanlylary has ýakyndan tanyşdyrmaga ýardam eder diýip umyt bildirdiler.

Rus kinosynyň hepdeligi Oguz (iýun) aýynyň 27-sine çenli dowam eder.