Düýn paýtagtymyzyň «Prezident» myhmanhanasynda tegelek stoluň başynda «Türkmen-rus hyzmatdaşlygynyň geljekki ugurlary» diýen mesele boýunça duşuşyk geçirildi, oňa Russiýa Federasiýasynyň işewür toparlarynyň Türkmenistana gelen delegasiýasy gatnaşdy. Iki ýurduň Söwda-senagat edaralarynyň başlangyjy boýunça guralan bu foruma Russiýanyň maýa goýumlar we konsalting baradaky iri kompaniýalarynyň, paýdarlar jemgyýetleriniň we kärhanalarynyň ýolbaşçylary hem-de esasy hünärmenleri, şeýle hem Türkmenistanyň birnäçe ministrlikleriniň, pudaklaýyn edaralarynyň, şol sanda ýurduň Strategik meýilnamalaşdyryş we ykdysady ösüş institutynyň hem-de Senagatçylaryň we telekeçileriň birleşiginiň wekilleri gatnaşdylar.

Russiýanyň delegasiýasynyň baştutany — Russiýa Federasiýasynyň Prezidentiniň Administrasiýasynyň ýolbaşçysynyň kömekçisi Leonid Potapow giriş sözünde Russiýanyň işewür dünýäsini ägirt uly ykdysady we energetiki potensiala eýe bolup durýan ýurt hökmünde Türkmenistanyň mümkinçilikleri bilen tanyşdyrmak bilen baglylykda, şu duşuşygyň uly ähmiýete eýedigini belledi. Şeýle hem bu ýerde aragatnaşyk, ulag we kommunikasiýalar ulgamy, söwda, bank-maliýe we maýa goýumlar boýunça hyzmatlar ýaly dürli pudaklarda hem-de beýleki birnäçe ugurlarda hyzmatdaşlyk etmek üçin oňaýly mümkinçilikleriniň döreýändigi bellenildi.

Myhman Russiýanyň biznes toparlarynyň Türkmenistan bilen özara peýdaly we ysnyşykly gatnaşyklary ösdürmäge uly gyzyklanma bildirýändiklerini aýtdy. «Gazprom», «Lukoýl», «Stroýtransgaz», «Silowyýe maşiny» açyk paýdarlar jemgyýetleri, «INTER RAO ÝEES», «ÝAROWIT ENERGO» ýapyk paýdarlar jemgyýetleri, şeýle hem «Megafon» açyk paýdarlar jemgyýeti, «Metally Wostoçnoý Sibiri» korporasiýasy, «Ýermakowskiý gorno-metallurgiçeskiý kombinat» atly jogapkärçiligi çäklendirilen jemgyýetler, «Uralskiý optiko-mehaniçeskiý zawod» önümçilik birleşigi ýaly öňden bäri gatnaşyk edýän we potensial hyzmatdaşlaryň geljegine uly umyt baglaýan türkmen bazaryna içgin gyzyklanma bildirýändiklerini bellediler.

Russiýa Federasiýasynyň Adatdan daşary we Doly ygtyýarly ilçisi Igor Blatow öz çykyşynda şu forumyň iki ýurduň arasyndaky gatnaşyklaryň häzirki zaman taryhyndaky möhüm wakalaryň ikisiniň—Türkmenistanyň Prezidenti Gurbanguly Berdimuhamedowyň Tatarystan Respublikasyna saparynyň hem-de Russiýa Federasiýasynyň Prezidenti Dmitriý Medwedewiň Türkmenistana saparynyň öňüsyrasynda bolup geçmeginiň simwoliki häsiýete eýedigini belledi. Häzirki wagtda döwletara gepleşigi örän işeňňirleşdirildi hem-de prinsipial taýdan täze tapgyra geçdi, muňa Türkmenistanyň we Russiýanyň liderleriniň şahsy gatnaşyklary degerli ýardam berdi diýip, diplomat nygtady. Iki döwletiň arasyndaky daşary söwda dolanyşygynyň onlarça esse artmagy hem-de iki tarapyň hem konstruktiw hyzmatdaşlygyň potensialyndan has doly peýdalanmak maksady bilen, gatnaşyklary ösdürmäge çalyşmagy taraplaryň netijeli işewür gatnaşyklary giňeltmegi niýet edinýändigine güwä geçýär.

Pikir alyşmagyň barşynda Russiýanyň wekilleri hyzmatdaşlygyň dürli ugurlaryna degişli teklipleri bilen tanyşdyryp, türkmen bazarynyň örän perspektiwalydygyny we şonda maýa goýumlary babatda örän oňaýly ýagdaýyň döredilmeginiň möhüm faktory bolup durýandygyny bellediler. Russiýaly biznesmenleriň pikirine görä, ýangyç-energetika sektory, senagat, ulag ulgamy, oba hojalygy, saglygy goraýyş, bilim, syýahatçylyk we sanatoriý-kurort dynç alşy we beýleki ugurlar boýunça amala aşyrylýan reformalar, milli maksatnamalar we uly möçberli taslamalar ysnyşykly hyzmatdaşlygy ýola goýmak üçin örän oňaýly şertleri döredýär.

«Tegelek stola» gatnaşyjylara Türkmenistan we onuň ykdysady potensialy barada gürrüň berýän wideofilm görkezildi.

Çärä gatnaşyjylar «Tegelek stoluň» başyndaky şunuň ýaly duşuşyklary geçirip durmagyň zerurdygyny bellediler. Ol özara bähbitli türkmen-rus hyzmatdaşlygyny işjeňleşdirmäge we bilelikdäki täze taslamalary işläp düzmäge ýardam eder.



Düýn Russiýanyň delegasiýasynyň agzalary özleriniň Aşgabatda bolmagynyň çäklerinde Gypjaga baryp, Türkmenistanyň ilkinji Prezidenti Saparmyrat Nyýazowyň ýadygärligini hatyraladylar we Ruhy metjide baryp gördüler. Şeýle hem myhmanlar paýtagtymyzyň we onuň etekleriniň gözel ýerleri bilen tanyşdylar.

Russiýa Federasiýasynyň işewürler toparynyň wekilleri Türkmenistanyň ministrlikleriniň we pudaklaýyn dolandyryş edaralarynyň birnäçesinde, şol sanda söwda we ykdysady gatnaşyklar, energetika we senagat, gurluşyk, awtomobil ulaglary, aragatnaşyk, suw hojalyk, saglygy goraýyş we derman senagaty ministrliklerinde, Merkezi bankda we beýlekilerde duşuşyklaryň we gepleşikleriň birnäçesini geçirerler. Saparyň çäklerinde Russiýanyň delegasiýasynyň Türkmenistanyň nebitgaz toplumynyň ýolbaşçylary bilen duşuşygy hem göz öňünde tutulýar.