Türkmen döwlet lukmançylyk institutynda ýurdumyzyň medisina ylmynyň gazananlaryna bagyşlanan ylmy-amaly konferensiýa geçirildi. Konferensiýanyň çäklerinde HITACHI korporasiýasynyň GDA-nyň döwletlerindäki ýörite dileri bolup durýan SOFT-TRONIK kompaniýasy tarapyndan taýýarlanan okatmakda, şol sanda medisina işgärlerini okatmakda interaktiw usullaryny peýdalanmagyň tanyşdyrylyş dabarasy boldy.

Alym lukmanlar häzir ýurdumyzda geçirilýän ylmy-barlaglaryň we işleriň netijeleri bilen abraýly auditoriýany tanyşdyrdylar. Şunda esasy wezipe olary lukmançylyk kömeginiň hilini ýokarlandyrmak, keselleriň öňüni almak we bejermek usullaryny kämilleşdirmek maksady bilen durmuşa ornaşdyrmakdan ybarat bolup durýar diýlip nygtaldy. Şu ýerde hem Türkmenistanyň Prezidenti Gurbanguly Berdimuhamedowyň tutuş ylmy, hususan-da, medisina ylmyny yzygiderli ösdürmek boýunça öňde goýan wezipeleriniň çäklerinde medisina işgärlerini taýýarlamak ilkinji orna geçýär. Türkmenistanyň Ylymlar akademiýasynyň we Ýokary synag toparynyň döredilmegi, aspiranturalaryň we doktoranturalaryň işe girizilmegi ýurdumyzyň ylmyny we bilimini ösdürmekde möhüm ädim boldy diýlip nygtaldy.

Okatmagyň interaktiw usullarynyň tehniki mümkinçiliklerini görkezip, SOFT-TRONIK kompaniýasynyň wekilleri dürli okuw sapaklary boýunça ýörite multimediýa programmalary hakynda gürrüň berdiler. Tanyşdyryş dabarasynyň çäklerinde Aşgabat bilen Berliniň arasynda teleköpri guraldy, şol ýerde SOFT-TRONIK kompaniýasynyň baş edarasy ýerleşýär.
SOFT-TRONIK kompaniýasynyň baş direktory Miroslaw Gryžibowskiniň TDH-a beren gürrüňinde belleýşi ýaly, kompaniýa Türkmenistan bilen eýýäm 15 ýyl bäri hyzmatdaşlyk edýär. Şu ýyllarda kompýuterleri ibermek, okatmagyň interaktiw usullaryny ornaşdyrmak ýaly işleri öz içine alýan hyzmatdaşlygyň iri maksatnamasy durmuşa geçirildi. Indi nobat lukmançylyk institutynyňky, ol interaktiw tagtalar we programmalary testirlemek üçin niýetlenen kompýuterler bilen üpjün ediler. Ýüregiň işleýşiniň analizine degişli Türkmenistanda işlenip düzülen programmalaryň biri HITACHI korporasiýasynyň hünärmenlerinde uly gyzyklanma döretdi. Bu adaty ýagdaýdyr, çünki korporasiýa köp ýurtlarda bar bolan täsin programmalary satyn alýar diýip, myhman belledi. Sebäbi onuň ýyllyk dolanyşygy bir ýylda 90 milliard dollara golaý, programma önümi bolsa 23 göterime deň bolýar. Interaktiw tehnologiýalar indi ösüp başlaýar, biz hem siziň bilen ilkinji hatarlarda durýarys diýip, korporasiýanyň ýolbaşçysy aýtdy.