Türkmen paýtagtynda sosial-ýaşaýyş jaý desgalarynyň birbada üçüsiniň ulanmaga berilmegi täze jaýlaryň gurluşyklarynyň we jaý toýlarynyň tomus möwsümindäki baýramçylyklarynyň dowamy boldy. Şu gün Aşgabadyň günorta böleginde täze iri «Çandybil» söwda merkezi öz gapylaryny alyjylar üçin giňden açdy, ol Bitarap Türkmenistan şaýolunyň we 10 ýyl Abadançylyk köçesiniň kesişýän ýerinde ýerleşýär.

Häzirki günde Türkmenistanda söwda ulgamynyň ösüşi ilatyň ýaşaýyş derejesiniň düýpli ýokarlanmagy we degişlilikde onuň alyjylyk ukybynyň ýokarlanmagy, şeýle hem ýurdumyzyň we daşary ýurtly öndürijileriň harytlarynyň hem hyzmatlarynyň assortimentiniň we möçberiniň mese-mälim artandygy bilen şertlendirilendir. Bahasy ABŞ-nyň 16 million dollaryndan geçýän täze Söwda merkezini ýurdumyzyň Söwda we daşary ykdysady aragatnaşyklar ministrligi bilen Türkmenistanyň Merkezi bankynyň buýurmasy boýunça belli «Polimeks» türk gurluşyk firmasy bina edipdir. Häzirkizaman dünýä standartlaryna laýyklykda doly enjamlaşdyrylan Söwda merkeziniň eýeleýän meýdany 7 müň inedördül metrden geçýär, şonuň ýarysyna golaýy miwe-gök önüm we bakja önümleriniň söwdasy üçin bölünip berlipdir, galan bölegini bolsa azyk we senagat harytlarynyň dükanlary eýeleýärler. Mundan başga-da, alyjylar üçin amatlylyk döretmek maksady bilen bu ýerde dermanhana, 50 orunlyk kafe, şeýle hem «Türkmenbaşy» döwlet täjirçilik bankynyň bölümi ýerleşdirilipdir.

Täze Söwda merkeziniň hemişelik müşderileri, gürrüňsiz, şonuň golaýynda «Şahin» türk gurluşyk firmasy tarapyndan bina edilen 12 gatly 108 öýli ýaşaýyş jaýynda ýaşaýanlar bolar. Häzirki günde bu ýerde Türkmenistanyň Döwlet ätiýaçlandyryş guramasynyň işgärleriniň maşgalalary jaý toýlaryny tutdular. Täze jaýda öýler durmuşda ulanylýan zerur bolan ähli tehnikalar we gurnalan mebeller bilen üpjün edilipdir. Ýanaşyk territoriýalarda çagalar üçin oýun meýdanlary we tennis kortlary gurlupdyr.

Şu gün ir säherden 2005-nji (Mollanepes) köçede ähli amatlyklary bolan ýene bir jaýda adamlar jaý toýlaryny tutdular, ol hem «Polimeks» kompaniýasy tarapyndan gurlupdyr. Bahasy ABŞ-nyň 6 million dollaryna golaýlaýan desganyň buýrujysy Aşgabat şäher häkimligi bolup, şol ýerde onuň b
ölümleriniň işgärleriniň 36-sy jaý toýlaryny tutdular.