Oguz aýynyň 28-ine Türkmenistanyň Prezidenti Gurbanguly Berdimuhamedow iki günlük sapar bilen Russiýa Federasiýasynyň Tatarystan Respublikasyna ugrady. Aşgabadyň Halkara aeroportunda döwlet Baştutanyny ýurdumyzyň Mejlisiniň ýolbaşçylary, hökümetiniň agzalary ugratdylar.

Hormatly Prezidentimiziň awialaýneri üç sagatdan Tatarystanyň paýtagtynyň howa menziline gondy. Türkmenistanyň, Russiýa Federasiýasynyň we Tatarystan Respublikasynyň döwlet baýdaklary bilen bezelen Kazanyň halkara aeroportunda türkmen Liderini Tatarystanyň Prezidenti Mintimer Şaýmiýew we respublikanyň Premýer-ministri Rustam Minnihanow, Tatarystanyň hökümetiniň agzalary mähirli mübäreklediler.

Milli lybasdaky ýigit bilen gyz belent mertebeli türkmen myhmanyna däp boýunça duz-çörek hödür etdiler we gül desselerini gowşurdylar. Tatarystan Respublikasynyň ýokary okuw jaýlarynda okaýan türkmen talyplary Prezident Gurbanguly Berdimuhamedowy mähirli mübärekleýärler. Türkmenistanyň Prezidenti Gurbanguly Berdimuhamedow we Mintimer Şaýmiýew bilelikde ýaşlaryň ýanyna barýarlar, olaryň haýsy okuw jaýlarynda we haýsy hünärler boýunça bilim alýandyklary, şeýle hem olaryň ýaşaýyş-durmuş şertleri bilen gyzyklanýarlar. Türkmenistanyň we Tatarystanyň Liderleri gysgajyk söhbetdeşlikden soň, talyplara bilim dünýäsinde üstünlikler, tutanýerlilik arzuw edýärler.
Gurbanguly Berdimuhamedow we Mintimer Şaýmiýew haly ýodajyk bilen özlerine garaşyp duran awtomobile tarap ýönelýärler. Prezidentiň awtomobil kerweni Tatarystan Respublikasynyň Prezidentiniň Myhmanlar öýüne barýar.

Ýerleşenden, az wagtlyk dynç alyşdan, gysga wagtlyk söhbetdeşlikden soň, hormatly Prezidentimiz Gurbanguly Berdimuhamedow we Mintimer Şaýmiýew bilelikde şäheriň taryhy böleginde, Kazanyň merkezinde ýerleşen Kazan Kremline tarap ýola düşdüler. Tatarystanyň paýtagty türkmen Liderini uly mähir we şatlyk bilen garşylaýar. Bütin ýoluň dowamynda beýik flagştoklarda mizemez dostlugyň simwoly bolan Türkmenistanyň, Russiýa Federasiýasynyň we Tatarystan Respublikasynyň Döwlet baýdaklary pasyrdaýar.

Prezidentimiziň awtomobil kerweni Kazan Kremliniň territoriýasyna girýär, şol ýerde Tatarystan Respublikasynyň Prezidentiniň kabulhanasy ýerleşýär. Mintimer Şaýmiýew Türkmenistanyň Prezidentini Kamin zalyna geçmäge çagyrýar. Ol ýerde ikiçäk gepleşikler geçirildi.

Mintimer Şaýmiýew Prezident Gurbanguly Berdimuhamedowy ýene bir gezek mähirli we tüýs ýürekden mübärekläp, bu sapara hyzmatdaşlygy berkitmegiň, giňeltmegiň ýolundaky täze ädim hökmünde baha berýärler, Tatarystan bolsa Türkmenistany diňe bir geljegi uly partnýor hökmünde görmän, eýsem özüniň hoşniýetli dosty hasaplaýar diýip belledi.
Prezident Gurbanguly Berdimuhamedow mähirli duşuşyk we myhmansöýerlik üçin Tatarystanyň baştutanyna minnetdarlyk bildirip, Russiýa Federasiýasy bilen giň konstruktiw gepleşikleri ösdürmek bilen Türkmenistan geljekde-de iri sebitler bilen göni we ynamly gatnaşyklary ösdürmegi niýet edinýär diýip nygtady. Şu jähtden Türkmenistan bilen Tatarystan Respublikasynyň arasyndaky gatnaşyklar özara peýdaly hyzmatdaşlygyň görelde alarlyk aýdyň mysalydyr, onuň esasynda bolsa hyzmatdaşlygyň üstünlikli iş arkaly toplanan tejribesi, saldamly potensialy, şeýle hem türkmen we tatar halklarynyň taryhy gatnaşyklary, medeni we ruhy däpleriň umumylygy ýatyr diýip, türkmen Lideri nygtady. Prezident Gurbanguly Berdimuhamedow Mintimer Şaýmiýewi Türkmenistana sapar bilen gelip görmäge çagyrdy. Bu çakylyk minnetdarlyk bilen kabul edildi.

Türkmenistan bilen Tatarystanyň baştutanlarynyň arasynda dostlukly, ynanyşmak ýagdaýynda geçirilen gepleşikleriň barşynda ikitaraplaýyn hyzmatdaşlygyň geljegi we mümkinçilikleri ara alnyp maslahatlaşyldy. Onda söwda-ykdysady we senagat sferasynda, ýangyç-energetika sektorynda, oba hojalygynda ileri tutulýan ugurlar bellenildi. Söhbetdeşler däp bolan gumanitar gatnaşyklary berkitmäge, ilkinji nobatda bolsa ylym, bilim babatda, şeýle hem medeniýet we sungat işgärleriniň arasyndaky netijeli gatnaşyklary ösdürmäge aýratyn üns berdiler.

Soňra gepleşikler Türkmenistanyň we Tatarystanyň hökümet delegasiýalarynyň agzalarynyň gatnaşmagynda giňeldilen düzümde dowam etdirildi.

Mintimer Şaýmiýew Tatarystan Respublikasyna sapara çakylygy kabul edenligi üçin belent mertebeli myhmana—Gurbanguly Berdimuhamedowa minnetdarlyk bildirip, türkmen delegasiýasynyň ähli agzalaryny Tatarystanyň topragynda tüýs ýürekden mübärekledi. Tatarystanyň Lideriniň belleýşi ýaly, Türkmenistandan gelen şeýle wekilçilikli delegasiýanyň saparyna bu ýerde hakyky dostlugyň we tutuş tatar halkyna bolan hormatyň nyşany hökmünde garalýar. Mintimer Şaýmiýew ösüşiň täze depginini we täze tapgyryny beren bu duşuşyk biziň gatnaşyklarymyzyň taryhynda möhüm waka boldy diýip belledi.

Tatarystan Respublikasynyň baştutany ikitaraplaýyn hyzmatdaşlygyň kuwwatly potensialyny, ozaly bilen Türkmenistanyň we Tatarystanyň ýolbaşçylarynyň we halklarynyň görkezýän hoşniýetli erkini nazara almak bilen doly üstünligine ynanýaryn diýip aýtdy. Muňa iki ýurduň ykdysadyýetiniň çalymdaşdygy ýardam eder, şonda ýangyç-energetika toplumy möhüm sektorlaryň biridir.

Häzirki zaman Türkmenistanyny, bütin dünýäde ýurduň düýpli abadançylygyna, sosial-ykdysady we medeni ösüşine, dünýä ulgamyna ynamly integrasiýasyny utgaşdyrmaga ugur alan «açyk gapylar» we progressiw reformalar syýasatyny ýöredýän milli Lideri bilen tanaýarlar. Bu syýasat biziň partnýorçylygymyzyň bellenilen depgin bilen çalt ösdüriljekdigine güwä geçýän kepilnamadyr diýip, Tatarystanyň baştutany belledi. Şeýle hem Mintimer Şaýmiýew Türkmenistanyň Prezidentiniň sözüniň iş bilen hiç haçan aýra çykmaýandygy we onuň her bir başlangyjynyň anyk hereketlere girişýändigi baradaky fakta Tatarystanda örän ýokary baha berilýär diýip aýtdy. Şunuň ýaly jogapkärçilikli pozisiýa türkmen Liderine we tutuş ýurda bolan ählumumy hormaty we ýokary halkara abraýyny getirýär.

Türkmenistanyň we Tatarystan Respublikasynyň halklary ruhy we dil umumylyklary taryhy taýdan bir bolan doganlyk halklardyr diýip, Mintimer Şaýmiýew aýtdy. Edil türkmen halky ýaly, Tatarystanyň halky hem özüniň ruhy köklerine ygrarlydyr we Magtymguly Pyragynyň döredijiligine — Gündogaryň dürdänesi hasaplanylýan edebi-filosofiki mirasyna ýokary hormat goýýar. Şu ýyl Türkmenistanda bu beýik şahyryň we akyldaryň doglan gününiň 275 ýyllygy giňden bellenilýär. Kazanda bu şanly sene mynasybetli we Pyragynyň öçmez-ýitmez döredijiligine bagyşlanylan ylmy-praktiki konferensiýa geçirildi. Häzirki döwürde biz türkmen halkynyň görnükli oglunyň, Gündogaryň we bütin dünýäniň beýik şahyrynyň ýadygärligini Tatarystanda ebedileşdirmek baradaky meseläni çözýäris diýip, Mintimer Şaýmiýew aýtdy.

Soňra Tatarystanyň baştutany hyzmatdaşlygyň birnäçe ugurlarynyň üstünde durup geçmek bilen, olaryň ösdürilmegine, hususan-da, gumanitar sferadaky partnýorçylygy berkitmegiň meselelerine aýratyn üns berilýändigini aýtdy. Mintimer Şaýmiýew Tatarystan Respublikasynyň ýokary okuw jaýlarynda okaýan türkmen talyplarynyň sanynyň has-da artdyrylmagyna Tatarystanyň meýil bildirýändigini aýtdy. Biz ýaş türkmenistanlylaryň özlerini öýlerinde ýaly duýmaklary üçin ähli zerur şertleri dörederis diýip, Tatarystanyň Lideri belledi. Şeýle hem ol ylym sferasynda ikitaraplaýyn hyzmatdaşlyk üçin giň perspektiwalar we mümkinçilikler açylýar diýip belledi. Bu hyzmatdaşlyk häzirki döwrüň ruhuna gabat gelýär diýip, Mintimer Şaýmiýew aýtdy we türkmen Lideriniň bu meselä örän uly üns berýändiginiň özüne mälimdigini belledi. Tatarystan Respublikasynyň Prezidenti Türkmenistan bilen köptaraplaýyn gatnaşyklaryň giňeldilmegine taýýardygyny ýene-de bir gezek nygtap, sözi Prezident Gurbanguly Berdimuhamedowa berdi.

Prezident Gurbanguly Berdimuhamedow Mintimer Şaýmiýewe Tatarystan Respublikasyna sapar bilen gelmäge çakylygy we myhmansöýerligi üçin minnetdarlyk bildirip, Tatarystanyň dostlukly halkyna parahatçylygy, abadançylygy we gülläp ösüşi arzuw etdi. Türkmenistanyň Baştutany sözüni dowam etmek bilen, 2013-nji ýylda Bütindünýä tomusky uniwersiadanyň boljak ýeriniň Kazan bolandygy baradaky ýeňiş bilen gutlady we bu uly sport forumynyň üstünlikli geçirilmegini arzuw etdi.

Gurbanguly Berdimuhamedow ikitaraplaýyn hyzmatdaşlygyň meselelerine geçmek bilen, Türkmenistanyň we Russiýa Federasiýasynyň arasyndaky ýola goýlan partnýorçylygyň, şu jähtde Tatarystan bilen söwda-ykdysady we medeni gatnaşyklaryň netijeli işjeňligini, ýokary ösüşini aýratyn kanagatlanmak bilen nygtady. Türkmen Lideriniň belleýşi ýaly, bu babatda Tatarystan Respublikasynyň Prezidenti Mintimer Şaýmiýewiň uly tagallasy bardyr. Ol iki dostlukly halklaryň arasyndaky gatnaşyklaryň ösdürilmegine we çuňlaşdyrylmagyna gönüden-göni üns berýär. Muňa ýokary derejeli delegasiýalaryň yzygiderli alşylmagy we ikitaraplaýyn gepleşikleriň pozitiw netijeleri şaýatlyk edýär. 2007-nji ýylyň Magtymguly we 2008-nji ýylyň Türkmenbaşy aýlarynda Tatarystan Respublikasynyň premýer-ministri Rustam Minnihanowyň ýolbaşçylygyndaky hökümet delegasiýasy Türkmenistanda saparda boldy. «KAMAZ» we «Tatneft» ýaly iri kompaniýalar bilen hyzmatdaşlyk boýunça geçirilen möhüm gepleşikleriň gazananlary durmuşa geçirilip başlanyldy.

Türkmenistanda başy başlanan, öňi bilen ykdysadyýeti diwersifikasiýalaşdyrmaga, täze düşewüntli pudaklary döretmäge, ýokary hilli we eksporta niýetlenen önümleriň toparyny öndürmäge gönükdirilen reformalar özara bähbitli partnýorçylyk üçin örän giň mümkinçilikleri açýar, onuň uly we köp taraply potensialy bolsa hiç bir adamda ikirjiňleme döretmeýär diýip, Prezident Gurbanguly Berdimuhamedow sözüni dowam etdirdi. Şu jähtden döwlet Baştutanymyz nebit çykarmak we ony gaýtadan işlemek sferasynda, nebithimiýa industriýasynda, şeýle hem maşyn gurluşygynda özara gatnaşyklaryň geljegini aýratyn belläp, Kazan motorgurluşyk önümçilik birleşigi, Kazanyň dikuçar we gämi gurluşygy zawody, «Nižnekamskşina» birleşigi we respublikanyň beýleki iri kärhanalary bilen hyzmatdaşlyk etmäge Türkmenistanyň gyzyklanýandygyny nygtady.

Agrar, azyk we gaýtadan işlemek senagaty hem geljegi bolan, netijeli özara hyzmatdaşlygyň ugurlary hasaplanýar. Prezident Gurbanguly Berdimuhamedowyň belleýşi ýaly, oba hojalyk pudagynda türkmen tarapy ikitaraplaýyn formatda, şeýle hem Türkmenistanyň we Tatarystanyň gatnaşmagynda köptaraplaýyn hyzmatdaşlyk etmäge taýýardyr. Hususan-da, azyk senagaty toplumy sferasynda partnýorçylygy giňeltmek üçin ýene bir mümkinçilik, ol hem Tatarystanyň GDA ýurtlarynyň oba hojalyk önümlerini öndürijileriň 2009-njy ýylda Aşgabatda geçiriljek forumyna gatnaşmak mümkinçiligidir. Bu teklip arkalaşyga girýän döwletleriň baştutanlarynyň Sankt-Peterburgda ýakynda geçirilen sammitinde türkmen tarapyndan orta atylypdy.

Gurbanguly Berdimuhamedow Türkmenistanda ýaýbaňlanan özgertmeleri häsiýetlendirip, olaryň esasy maksady halkyň maddy hal-ýagdaýyny gowulandyrmakdan, adamlaryň netijeli zähmeti we mynasyp durmuşy üçin ähli zerur şertleri döretmekden ybaratdyr diýip nygtady. Şunuň bilen baglylykda Hazaryň ekologiýa taýdan arassa türkmen kenarynda halkara derejesindäki şypahana bolan «Awaza» milli syýahatçylyk zolagynyň döredilmegini Türkmenistanyň Prezidenti möhüm ykdysady we şunuň bilen birlikde sosial ähmiýeti bolan taslamalaryň biri diýip atlandyrdy. Gurbanguly Berdimuhamedow Tatarystandan bolan partnýorlary bu täsin taslamany durmuşa geçirmäge gatnaşyjylara goşulmaga çagyrdy, olaryň hatarynda bolsa eýýäm meşhur daşary ýurt firmalarynyň we kompaniýalarynyň elliden gowragy bar.

Elbetde, bilim we ylym sferasy, şeýle hem saglygy goraýyş ikitaraplaýyn hyzmatdaşlygyň ileri tutulýan ugurlarynyň biridir we şeýle bolmagynda galýar. Gurbanguly Berdimuhamedow Türkmenistanyň ýaş, ýokary hünärli kadrlary taýýarlamaga ilkinji nobatda ähmiýet berýändigini nygtap, Tatarystandan bolan partnýorlara bu meseläni çözmekde ýardam edýändikleri üçin minnetdarlyk bildirdi. Mysal üçin, hususan-da, türkmen talyplary eýýäm Almetýewiň nebit institutynda bilim alýarlar. Şunuň bilen baglylykda Türkmenistanyň baştutany tatar tarapyna, mümkinçilige görä, respublikanyň ýokary okuw mekdeplerinde türkmen talyplarynyň sanyny artdyrmak baradaky meselä garamak haýyşy bilen ýüz tutdy.
Türkmen Lideri ylym ýaly möhüm sferada özara gatnaşyklary artdyrmagyň geljegi hakynda söz açyp, Türkmenistanyň we Tatarystanyň uniwersitetleriniň arasyndaky ýakyn gatnaşyklary ýola goýmak baradaky pikiri aýtdy. Prezident Gurbanguly Berdimuhamedow Tatarystanyň ylmy işgärleriniň Aşgabatda geçirilýän halkara forumlara we konferensiýalara yzygiderli gatnaşýandygyny kanagatlanmak bilen belläp, alymlara bilelikdäki barlag taslamalaryny durmuşa geçirmegiň üstünde işlemegi teklip etdi. Bu taslamalar ýokary tehnologiýalar, energiýany tygşytlamak we dikeldilýän energiýa çeşmelerini peýdalanmak babatda amaly işläp taýýarlamalar we beýleki ugurlary gurşap alyp biler. Taryhy-arheologiki ugurlar hem örän möhümdir. Şunda Gurbanguly Berdimuhamedow Türkmenistanyň we Tatarystanyň halklarynyň arasynda öňden bäri dowam edip gelýän medeni aragatnaşyklary hem-de hoşniýetli dostluk, özara düşünişmek däplerini pugtalandyrmagyň möhüm ähmiýetini belledi.

Türkmen Lideri öz çykyşynyň ahyrynda Prezident Mintimer Şaýmiýewe we doganlyk Tatarystanyň ähli halkyna iň gowy arzuwlaryny aýtdy.

Gepleşikleriň barşynda taraplar ileri tutulýan ugurlarda strategiki özara gatnaşyklary işjeňleşdirmek boýunça ädimleri jikme-jik ara alyp maslahatlaşdylar. Türkmenistanda Ylymlar akademiýasynyň dikeldilmegi we ýurtda ykdysady modernizasiýa boýunça, hususan-da, senagat sektorynda durmuşa geçirilýän maksatnamalary hasaba almak bilen, hormatly Prezidentimiz Gurbanguly Berdimuhamedow türkmen tarapynyň innowasion tehnologiýalary işläp taýýarlamak sferasynda hyzmatdaşlyga taýýardygyny aýtdy. Mintimer Şaýmiýew Tatarystanyň Türkmenistana maşyn gurluşygy, şol sanda awiasiýa senagaty boýunça öz potensialyny we tejribesini hödürlemäge taýýardygyny belledi. Şol bir wagtyň özünde Tatarystanyň soňky ýyllarda döredilen ýokary tehnologik önümçilik infrastrukturasynyň bu pudak boýunça dünýäde öňdebaryjy pozisiýalary ynamly eýeleýän Türkmenistanyň dokma senagatynyň önümlerine uly gyzyklanma bildirýändigini aýtdy.

Şeýle hem türkmen-rus hökümetara komissiýasynyň çäklerinde ýakyn özara gatnaşyklaryň zerurlygy bellenildi, oňa bolsa rus tarapyndan Russiýa Federasiýasynyň Hökümetiniň birinji wise-premýeri Wiktor Zubkow ýolbaşçylyk etdi. Eýýäm şu ýyl komissiýanyň işiniň çäklerinde Türkmenistan bilen Tatarystanyň arasyndaky hyzmatdaşlyk boýunça toparlaryň duşuşyklary boldy.

Tatarystanyň Türkmenistanda özüniň wekilhanasyny açmakçydygyny aýdyp, Mintimer Şaýmiýew Türkmenistanyň hem Tatarystanda öz wekilhanasyny açmagy barada öz islegini beýan etdi. Şeýle ädimler özara hyzmatdaşlygy çuňlaşdyrmagyň täze mümkinçiliklerini açar diýlip nygtaldy.

Soňra dabaralar zalynda söwda-ykdysady, ylmy-tehniki we medeni hyzmatdaşlyk hakynda Türkmenistanyň Hökümeti bilen Tatarystan Respublikasynyň Hökümetiniň arasyndaky Ylalaşyga gol çekmek dabarasy boldy. Bu ýere ýygnananlaryň şowhunly el çarpyşmalary astynda bu möhüm ikitaraplaýyn resminama Türkmenistanyň Prezidenti Gurbanguly Berdimuhamedow we Tatarystan Respublikasynyň Prezidenti Mintimer Şaýmiýew gol çekýärler.

Gol çekmek dabarasy tamamlanandan soň, Türkmenistanyň we Tatarystanyň Liderleri metbugat üçin gysgajyk beýannama bilen çykyş etdiler.

Türkmenistanyň Prezidentini Tatarystan Respublikasynyň paýtagtynda mübärekleýändigine tüýs ýürekden buýsanýandygyny we örän guwanýandygyny belläp, Mintimer Şaýmiýew şu saparyň ähli tatar halkyna ägirt uly hormatyň nyşany bolup durýandygyny ýene bir gezek belledi. Ol Tatarystan dünýäniň möhüm sebitinde parahatçylygy we howpsuzlygy üpjün etmekde möhüm orun eýeleýän Bitarap Türkmenistanyň syýasatyny doly goldaýar we makullaýar diýip belledi. Türkmenistanyň Merkezi Aziýada eýeleýän esasy orny köp babatda durnuklylygyň dünýä möçberindäki möhüm faktory bolup durýar.

Mintimer Şaýmiýew gepleşikleriň jemlerine geçmek bilen, düýpli pikir alyşmalaryň bolandygyny belledi. Biz iri ylalaşyklary nazara aldyk we biziň halklarymyzyň bähbitlerine geljekde hem şu ugra eýereris diýip, Tatarystanyň Prezidenti belledi.

Tatarystanyň baştutany temany dowam etdirmek bilen, iki halkyň arasyndaky gadymdan gelýän ruhy we medeni gatnaşyklaryň mizemezdigini kanagatlanmak bilen belledi, şol gatnaşyklar täze taryhy eýýamda yzygiderli berkeýär we umumy bähbitlere hyzmat edýär. Arasynda ýangyç-energetika sferasy, şol sanda nebiti gaýtadan işlemek we nebithimiýa bolan ikitaraplaýyn hyzmatdaşlygyň ileri tutulýan ugurlary barada durup geçmek bilen, Mintimer Şaýmiýew halklary ýakynlaşdyrmagyň kesgitleýji faktory bolan gumanitar hyzmatdaşlygyň möhümdigini aýratyn belledi.

Prezident Gurbanguly Berdimuhamedow habar beriş serişdeleriniň wekillerine ýüzlenip, geçirilen gepleşikleriň örän konstruktiw we işjeň ýagdaýda bolandygyny nygtady, däp bolşy ýaly, gepleşikler ikitaraplaýyn gatnaşyklara mahsus bolan dostluk we özara düşünişmek ýagdaýynda geçdi. Türkmenistan bilen Tatarystan Respublikasynyň arasyndaky hyzmatdaşlyk işjeň ösdürilýär we ähli ugurlar boýunça depgin alýar, biz özara aragatnaşyklarymyza hem-de olaryň ynanyşmak häsiýetine tüýs ýürekden hormat goýýarys diýip, türkmen Lideri aýtdy.
Prezident Gurbanguly Berdimuhamedow gepleşikleriň jemleri barada durup geçip, söwda-ykdysady hyzmatdaşlygy ösdürmegiň, ýangyç-energetika sektorynda hyzmatdaşlyk etmegiň, şeýle hem medeni-gumanitar gatnaşyklary çuňlaşdyrmagyň meseleleriniň şol gepleşikleriň gün tertibine girizilendigini belledi.

Türkmenistanyň Prezidentiniň aýdyşy ýaly, taraplar duşuşyklaryň barşynda netijeli özara gatnaşyklary mundan beýläk-de giňeltmek barada hem ylalaşdylar, bu iki tarapyň hem bähbitlerine doly derejede laýyk gelýär. Munuň özi energetika sferasyna we ilkinji nobatda nebiti gaýtadan işleýän hem-de nebithimiýa industriýasyna degişlidir. Bu babatda Türkmenistan pudagyň kuwwatlyklaryny artdyrmagy, önümleriň dürli görnüşlerini öndürmäge ugur alan täze önümçilikleri döretmegi esasy wezipeleriň biri hökmünde öz öňünde goýýar. Mälim bolşy ýaly, Türkmenistanda öndürilýän polipropilene, çalgy ýaglaryna, suwuklandyrylan gaza, benziniň ýokary derejedäki oktanly sortuna we dizel ýangyjyna dünýä bazarynda üýtgewsiz ýagdaýda uly isleg bildirilýär. Ýangyç-energetika toplumyny ösdürmegiň 2030-njy ýyla çenli niýetlenilen uzakmöhletli döwlet strategiýasynyň çäklerinde ýurdumyzda pudaklaýyn önümi gaýtadan işleýän kärhanalaryň gurluşygy, olary döwrebaplaşdyrmak we olaryň durkuny täzelemek dowam etdirilýär, şunda maýa goýumlarynyň möçberi 1 milliard 600 million amerikan dollaryndan hem geçdi.

Gepleşiklerde telekeçilik düzümleri boýunça hyzmatdaşlyk etmegiň mümkinçilikleri hem ara alnyp maslahatlaşyldy diýip Prezident Gurbanguly Berdimuhamedow sözüni dowam etdirdi. Türkmenistanda daşary ýurt kompaniýalarynyň işlemegi üçin örän göwnejaý şertler, şol sanda amatly maýa goýum ýagdaýy döredildi diýip, döwlet Baştutany belledi. Biz şeýle hem öz tarapymyzdan daşary ýurtlarda türkmen biznesi üçin mümkinçilikleriň giňeldilmegine gyzyklanýarys. Ahyr netijede munuň özi Türkmenistanyň we Tatarystan Respublikasynyň iki tarapyň işewür toparlary üçin maliýe-ykdysady taýdan özüne çekijiligini ýokarlandyrmaga ýardam eder. Mundan başga hem maşyn gurluşyk sferasynda Tatarystanyň tejribesi Türkmenistan üçin örän özüne çekijidir we peýdalydyr. Bu babatda biz Tatarystana senagat sektoryny düýpli döwrebaplaşdyrmak boýunça öz meýilnamalarymyzy nazara almak bilen çynlakaý partnýor hökmünde garaýarys diýip, hormatly Prezidentimiz Gurbanguly Berdimuhamedow belledi.

Bilim we ylym sferasynda hyzmatdaşlyk etmek, şunuň bilen baglylykda Türkmenistanyň hem-de Tatarystanyň ylmy merkezleriniň, ýokary okuw mekdepleriniň arasyndaky gatnaşyklary işjeňleşdirmek hem esasy mesele bolup öňe çykýar, bu babatda bolsa bilelikde iş geçirmek üçin giň mümkinçilikler bardyr. Şunuň bilen birlikde Türkmenistanyň Prezidenti ruhy däpleriň umumylygy bilen ýakyn bolan iki halkyň arasyndaky medeni aragatnaşyklary giňeltmegiň ähmiýetini belledi. Biz arheologiýa, taryh we etnografiýa babatda hyzmatdaşlygyň oňyn tejribesine eýediris, Türkmenistanyň we Tatarystanyň döredijilik toparlary halkara festiwallara we forumlara bilelikde gatnaşýarlar diýip, Prezident Gurbanguly Berdimuhamedow aýtdy we taraplaryň mundan beýläk-de ylym, medeniýet, sungat sferasynda yzygiderli ikitaraplaýyn gatnaşyklary doly derejede goldamaga taýýardygyny tassyklady.

Bir söz bilen aýdylanda, Türkmenistan we Tatarystan söwda-ykdysady babatda hem, gumanitar-medeni sferada hem hyzmatdaşlyk etmegiň uly potensialyna eýedir we häzirki wagtda ony has netijeli durmuşa geçirmegiň ýollary jikme-jik ara alnyp maslahatlaşyldy diýip, türkmen Lideri aýtdy. Prezident Gurbanguly Berdimuhamedow mähirli kabul edendigi, netijeli gepleşikleri geçirmek üçin ajaýyp şertleriň döredilendigi üçin Tatarystan Respublikasynyň Prezidenti Mintimer Şaýmiýewe ýene-de bir gezek tüýs ýürekden minnetdarlyk bildirip, bu gepleşikleriň netijeleri taraplaryň ýene-de has ýakynlaşmagyna, özara peýdaly hyzmatdaşlygy pugtlandyrmaga ýardam eder diýip ynam bildirdi.
Ikitaraplaýyn gepleşikleriň resmi bölegi tamamlanandan soň, Türkmenistanyň Prezidenti Gurbanguly Berdimuhamedow Tatarystan Respublikasynyň Prezidenti Mintimer Şaýmiýew bilen bilelikde Kazan Kremlini — döwlet taryhy-arhitektura goraghanasy bolan täsin arhitektura toplumyny synlady. Kremlde Tatarystanyň Prezidentiniň kabulhanasy, onuň territoriýasynda bolsa Respublikanyň dürli ministrlikleri we pudaklaýyn dolandyryş edaralary ýerleşýär.

2000-nji ýylda UNESKO-nyň Bütindünýä mirasynyň sanawyna girizilen Kazan Kremli iki beýik diniň — yslam we hristian dinleriniň ruhy täsirini özünde jemleýär hem-de tatar we rus arhitektura stilleriniň düýpli sinteziniň özboluşly ýeke-täk nusgasydyr. Tatarystanyň iki mukaddesligi — biri-biriniň garşysynda ýerleşen Blagoweşenskiý Ybadathanasy we Kul-Şarif metjidi munuň aýdyň subutnamasydyr, olar köp milletli halkyň belent ruhunyň, onuň dini ynanyşlara barlyşyklylygynyň we dürli konfessiýalaryň parahatçylykly bolmagyna ygrarlylygynyň simwoly bolup çykyş edýär.

Bu ajaýyp ýerleriň her biriniň öz taryhy bar. Mysal üçin, ymam, din hadymy we şahyr Kul-Şarifiň hormatyna atlandyrylan meşhur 8 minaraly metjit 1552-nji ýylda doly ýakyp ýandyryldy, emma ýüz ýyl geçenden soň, ol hakykatda doly dikeldildi. Şonuň üçin hem şäheriň müň ýyllygy mynasybetli açylan täze Kul-Şarif metjidi diňe bir Kazanyň baş metjidi bolmak bilen çäklenmän, eýsem galkynan Tatarystanyň hem täze simwolydyr. Gaýtadan dikeldilen we öz öňki ajaýyp keşbine getirilen Blagoweşenskiý ybadathanasy Kazanda saklanyp galan taryh we arhitektura ýadygärlikleriniň iň gadymysydyr. Munuň özi Kazan Ýeparhiýasynyň baş ybadathanasy we muzeý hem-de arhiw saklawhanasy bolup hyzmat eden hristian dini ynanjynyň iri merkezleriniň biridir.

Buthanada-da, metjitde-de Prezidentleriň ikisini din wekilleri mähirli mübäreklediler. Olar öz belent mertebeli myhmanlaryna aýratyn hormat we sarpa goýmagyň nyşanyny görkezip, bu täsin ybadathanalaryň döredilmeginiň taryhy, parahatçylygyň hem-de agzybirligiň, durnuklylygyň we Tatarystan Respublikasynyň ruhy ösüşiniň esaslaryny pugtalandyrmakda olaryň möhüm orny hakynda gürrüň berdiler. Türkmenistanyň we Tatarystan Respublikasynyň Prezidentlerini Kazan Kremliniň metjidiniň territoriýasynda gezelenç edýän ýaşaýjylar, turistler, syýahatçylar, ýaşlar ägirt uly şatlyk bilen garşyladylar. Gurbanguly Berdimuhamedow we Mintimer Şaýmiýew olaryň hemmesi bilen ýadygärlik üçin surata düşdüler, olara bagt we abadançylyk arzuw etdiler.

Ruhy mukaddeslikleri synlanyndan soň, Türkmenistanyň Prezidentiniň maşyn kerweni Kazan döwlet uniwersitetine tarap ugraýar, şol ýerde belent mertebeli myhmany Tatarystan Respublikasynyň bilim we ylym ministri Nail Waleýew we ýokary okuw mekdebiniň rektory Mýakzýum Salahow mähirli mübärekleýär.

Kazanyň merkezini bezeýän uniwersitet 1804-nji ýylyň güýzünde —Moskwa we Sankt-Peterburg uniwersitetlerinden soň üçünji bolup döredildi. Hormatly Prezidentimiz Gurbanguly Berdimuhamedow we onuň ýany bilen barýan delegasiýanyň agzalary Russiýanyň XIX asyryň rus klassisizminiň stilindäki ajaýyp arhitektura ansamblynda ýerleşen iri hem-de gadymy medeniýet, bilim we ylym merkezi bilen gyzyklanyp tanyşýarlar, onuň taryhynyň muzeýine aýlanyp görýärler.

Bu täsin muzeýiň ekspozisiýasyny iki müňe golaý eksponatlar düzýär, olaryň arasynda geçmişiň we häzirki döwrüň täsin gymmatlyklarynyň ençemesi bar. Olar diňe bir Russiýanyň gadymy uniwersitetiniň taryhy bilen däl, eýsem uniwersitetiň ylmy mekdebiniň gazananlary, Kazan uniwersitetiniň bütin dünýäde ykrar edilmegini gazanan alymlarynyň ajaýyp açyşlary bilen hem tanyşdyrýar.

Häzirki wagtda Kazan döwlet uniwersiteti nusgawy uniwersitetiň häzirki zaman modelidir, onuň möhüm prinsipi bolsa ylmyň we okatmagyň sintezinden ybaratdyr. Ylmy-barlag institutlary, problemalaýyn laboratoriýalar, botanika bagy, astronomiýa obserwatoriýasy, maglumatlar tehnologiýalary merkezi, neşirýat merkezi we beýlekiler uniwersitet toplumynyň düzümine girýär. 1996-njy ýylda Russiýa Federasiýasynyň Prezidentiniň Permany bilen bu abraýly ylym-bilim merkezi Russiýa Federasiýasynyň halklarynyň medeni mirasynyň aýratyn gymmatly desgalarynyň Döwlet ýygyndysyna goşuldy.

Mälim bolşy ýaly, ýakynda Kazan şäheri olimpiýa oýunlaryndan soň, halkara sport ýaryşlarynyň ähmiýeti we möçberi boýunça ikinjisi bolan, 17 ýaşdan 28 ýaşa çenli ýaşdaky talyplaryň we aspirantlaryň gatnaşmagy bilen her iki ýyldan Talyp sportunyň halkara federasiýasy tarapyndan guralýan 2013-nji ýyldaky tomusky Uniwersiadanyň paýtagty diýlip seçilip alyndy.
Kazanyň meri Ilsur Metşin Türkmenistandan gelen hormatly myhmanlar üçin Uniwersiada — 2013-iň tanyşdyryş dabarasyny geçirip, Tatarystanyň paýtagtynyň seçilip alynmagy Russiýanyň olimpiýa hereketiniň hem-de ýurtda köpçülikleýin sporty ösdürmegiň halkara derejesinde ykrar edilmegi boldy diýip belledi, tomusky oýunlary geçirmäge bolsa Ispaniýanyň Wigo we Günorta Koreýanyň Kwançžu şäherleri dalaş etdiler. Uniwersiada geçirilýän mahaly sport desgalarynyň we binalarynyň 48-si, şol sanda Merkezi stadion, «Basket—holl», otuň üstündäki hokkeý merkezi, Başa-baş göreş Köşgi we beýleki desgalar işe giriziler. Kazanda eýýäm täze stadionyň, Tennis akademiýasynyň, sportuň suw görnüşleriniň köşgüniň, şeýle hem Uniwersiada obasynyň gurluşygyna başlandy, şol obada bütin dünýäden türgenleriň 10 müňe çenlisi ýerleşip bilerler.

Sporty ösdürmäge aýratyn üns berýän Türkmenistanyň Prezidentine aýratyn hormat goýmagyň alamaty hökmünde meşhur «Rubin» futbol klubynyň adyndan ýadygärlik sowgat gowşuryldy. Bu Russiýanyň iň oňat komandalarynyň biridir. 2008-nji ýylda «Rubin» Russiýanyň çempionatlarynyň täze rekordyny gazanyp, ilkinji ýedi tapgyrda ýedi gezek ýeňiş gazandy we öňki gazanylan rekordy täzeledi.

Prezident Gurbanguly Berdimuhamedow türgenlere täze üstünlikleri arzuw edip, hatyra auditoriýasyny synlady, bu ýerde bir mahallar talyplar L.Tolstoý we W.Ulýanow leksiýa diňläpdirler. Prezident Gurbanguly Berdimuhamedow ýadygärlik üçin surata düşýär we hormatly myhmanlaryň kitabynda ýazgy galdyrýar.

Türkmenistanyň baştutany we onuň ýany bilen barýan adamlar mejlisler zalyna geçýärler. Şol ýerde Prezident Gurbanguly Berdimuhamedowa Kazan döwlet uniwersitetiniň Hormatly doktorynyň diplomyny gowşurmagyň dabarasy boldy. Tatarystanyň ylmy jemgyýetçiliginiň wekilleri, uniwersitetiň mugallymlary, talyplary, köp sanly myhmanlar we žurnalistler dik durup, şowhunly el çarpyşmalar bilen türkmen Liderini gutlaýarlar.

Ýokary okuw mekdebiň rektory Mýakzýum Salahow dabaraly çäräni açyp, bu ýere gelenleriň adyndan belent mertebeli türkmen myhmanyny gyzgyn mübärekledi. Ol şu gün Tatarystanyň ylmy jemgyýetçiliginiň şanly waka mynasybetli ýygnanandygyny, ýokary okuw mekdebiniň alymlar geňeşiniň ýakynda bolan mejlisinde ylmy, bilimi, demokratiýany ösdürmäge hem-de halkara hyzmatdaşlygyny giňeltmäge goşan şahsy goşandy we bitiren hyzmatlary üçin Türkmenistanyň Prezidenti Gurbanguly Berdimuhamedowa «Kazanyň döwlet uniwersitetiniň hormatly doktory» diýen ýokary ady dakmak hakynda kararyň kabul edilendigini habar berdi.

KDU-nyň ýolbaşçysy bu ýere ýygnananlary görnükli döwlet we jemgyýetçilik işgäri, ählihalk tarapyndan saýlanan türkmen Lideriniň durmuş ýolunyň esasy döwürleri bilen tanyşdyrdy. Ol Türkmenistanyň Prezidentiniň bitiren işlerini belläp, Prezident Gurbanguly Berdimuhamedowyň ýolbaşçylygynda bu gün Türkmenistanda giň möçberli progressiw özgertmeleriň ýaýbaňlanandygyny, netijede bolsa ýurdumyzyň dünýä ykdysadyýetine okgunly goşulyşyp we ägirt uly halkara abraýyna eýe bolup, durmuş-ykdysady ösüşinde kuwwatly itergini alandygyny habar berdi. Prezident Gurbanguly Berdimuhamedowyň halkara gatnaşyklaryny, şol sanda Türkmenistan bilen Tatarystanyň arasyndaky gatnaşyklary berkitmäge we ösdürmäge goşan uly goşandy hakynda gürrüň bermek bilen, ýokary okuw mekdebiň rektory bu hyzmatdaşlygyň esasyny gumanitar sferadaky, ilkinji nobatda ylym we bilim ulgamyndaky gatnaşyklaryň düzýändigini belledi.

Soňra aýratyn dabaraly ýagdaýda, duşuşyga gatnaşyjylaryň dostlukly el çarpyşmalary astynda Mýakzýum Salahow Türkmenistanyň Prezidentine hormatly lentany dakdy we degişli diplomy gowşurdy.

Talyp ýaşlaryň adyndan Prezident Gurbanguly Berdimuhamedowy Uniwersitetiň ökde talyplarynyň biri gutlady. Ol şu gün ýokary okuw mekdebi üçin, şeýle hem Türkmenistany ygtybarly we uzakmöhletleýin hyzmatdaş hasaplaýan tutuş Tatarystan üçin möhüm waka hökmünde taryha girer diýip belledi. Ysnyşykly gatnaşyklary ýola goýmagyň zerurlygy barada birnäçe gezek nygtalan duşuşykda GDA-nyň ýurtlarynyň talyplarynyň we ýaşlar guramalarynyň IV halkara forumyny geçirmek hakynda teklip orta atyldy. Bu foruma Türkmen döwlet uniwersitetiniň talyplary hem çagyryldy. Kazan uniwersitetiniň talyplarynyň adyndan hormatly Prezidentimiz Gurbanguly Berdimuhamedowa türkmen Lideriniň reformatorçylyk syýasatyna goýýan uly hormatynyň we ylmy ösdürmäge goşýan şahsy goşandynyň nyşany hökmünde ýörite hormat haty gowşuryldy.

Prezident Gurbanguly Berdimuhamedow bu ýere ýygnananlaryň öňünde çykyş edip, bildirilen ynam hem-de ylym we bilim babatda Türkmenistanda geçirilýän reformalara berlen ýokary baha üçin tüýs ýürekden minnetdarlyk bildirdi. Şunda türkmen Lideri Russiýa Federasiýasynyň abraýly we iri okuw, ylmy-barlag merkezleriniň biriniň doktory adyna eýe bolmagyny özi üçin uly abraý hasaplaýandygyny belledi. Ol bu ýokary okuw mekdebiniň Tatarystandaky, şeýle hem onuň çäklerinden uzaklardaky bilim edaralarynyň ulgamynda görnükli orny eýeleýändigini we şu günki waka tutuş türkmen ylmynyň gazananlarynyň ykrar edilmegi hökmünde baha berýändigini nygtady.

Hormatly Prezidentimiz Gurbanguly Berdimuhamedow beýik matematik, Kazan uniwersitetiniň ilkinji rektorlarynyň biri Nikolaý Iwanowiç Lobaçewskiniň: «Dana bolup dogulmaýarlar, danalyga okap ýetilýär» diýen sözlerini getirip, ylmyň we bilimiň jemgyýeti ösdürmegiň, islendik döwletiň gülläp ösmeginiň esasy faktorlary bolup durýandygyny belledi.
—Şu hakykata göz ýetirip, biz Türkmenistanda giň möçberli reformalary, ozaly bilen ylym we bilim sferasyny öz içine alýan reformalary amala aşyrýarys. Okatmagyň ýokary standartlaryny ornaşdyrmak, fundamental we amaly ylmy-barlaglary goldamak hem höweslendirmek, okuw we ylmy edaralary dolulygyna kompýuterleşdirmek, interneti ösdürmek, ylym we bilim sferasynda halkara hyzmatdaşlygyny giňeltmek bu ugurdaky döwlet syýasatynyň esasyny düzýär diýip, Gurbanguly Berdimuhamedow belledi.

Döwlet Baştutanynyň belleýşi ýaly, häzir Türkmenistan Ýewropanyň, Amerikanyň we Aziýanyň ýurtlary bilen netijeli gatnaşyklary ýola goýýar, halkara ylmy-amaly konferensiýalary, simpoziumlary we beýleki forumlary yzygiderli geçirýär. Şol çärelere Tatarystanyň wekilleri hem gatnaşýarlar.

Ylmy gazanylanlary özara alyşmagy ýola goýmagyň möhümdigini we bu sferada hyzmatdaşlygyň bar bolan ägirt uly potensialyny belläp, Türkmenistanyň Prezidenti Türkmen döwlet uniwersiteti bilen Kazanyň döwlet uniwersitetiniň arasynda gös-göni ylmy we okuw gatnaşyklaryny ýola goýmak barada teklip bilen çykyş etdi. Döwlet Baştutany geljegi uly bolan ugurlaryň hatarynda energiýanyň dikeldilýän çeşmelerini peýdalanmagyň tehnologiýalaryny işläp düzmegi, kremniniň esasynda täze tehnologiýa materiallaryny almagy, gumanitar ylymlar sferasyndaky we beýleki ugurlardaky hyzmatdaşlygy mysal getirdi.

«Bu hyzmatdaşlyk Türkmenistanda fundamental we eksperimental ylmyň ýaýbaňlanýan, täze barlag ugurlarynyň ösýän wagtynda örän möhüm bolup durýar» diýip, Prezident Gurbanguly Berdimuhamedow öňdebaryjy okuw mekdepleriniň hyzmatdaşlygynyň iki halkyň arasynda medeni taýdan baýlaşmak, dostlugy we doganlygy berkitmek işinde möhüm orny eýelejekdigini belledi.

Prezident Gurbanguly Berdimuhamedow köp sanly auditoriýa bilen mähirli hoşlaşyp, Kazan döwlet uniwersitetiniň talyplaryna okuwda üstünlik, professor-mugallymlaryna bolsa täze ýeňişleri we ylmy üstünlikleri arzuw etdi.

Prezidentler Gurbanguly Berdimuhamedow we Mintimer Şaýmiýew gysga wagtlyk dynç alanlaryndan soň, «Kazan» halkara atçylyk-sport toplumyna ugraýarlar, şol ýerde belent mertebeli myhmanlary Tatarystanyň Premýer-ministri Rustam Minnihanow we toplumyň direktory Rawil Gataullin garşylaýarlar.

Türkmenistanyň Prezidenti Tatarystanda öndürilýän tehnikanyň toplumyň öňünde, açyk asmanyň astynda ýaýbaňlanan sergisini üns berip synlaýar. Görkezilýän eksponatlaryň hatarynda awtomobiller, kiçi awtobuslar, oba hojalyk tehnikasy, buraw enjamlary we ýörite enjamlar, şöhrat gazanan «KAMAZ» kysymyndaky tehnika, şol sanda traktorlar we beýleki ençeme tehnikalar bar. Bu ýerdäki awiatehnika belent mertebeli türkmen myhmanynyň aýratyn ünsüni çekdi. Prezidentimiz Gurbanguly Berdimuhamedow bu ýerde duran dikuçaryň kabinasynyň içini üns berip öwrendi, onuň kabinasyna ýolbaşçylar bilelikde mündüler. Hormatly Prezidentimiz bu köpugurly per-ganatly maşynlaryň tapgyryny Türkmenistanyň satyn almagynyň mümkinçiliklerini ara alyp maslahatlaşdy. Uçarmansyz uçýan apparatlar hem uly gyzyklanma döretdi, olar soňky ýyllarda giňden ulanylýar. Ýeri gelende aýtsak, at çapyşygy mahaly 200-300 metr belentlikde uçýan şeýle apparatlaryň biri telewizion signaly berdi, şol signalyň kömegi bilen bolup geçýän ýagdaýlaryň hemmesi şu ýerde oturdylan ägirt uly monitorda görkezildi.

Türkmen döwletiniň Baştutanyna dürli ýyllarda Mintimer Şaýmiýewe sowgat berlen we onuň aýratyn buýsanjyna öwrülen meşhur ahalteke bedewleri hem görkezildi.
Soňra myhmanlaryň hemmesi halkara atçylyk-sport toplumynyň binasyna tarap ugrady, onuň foýesinde bolsa Tatarystanyň ykdysady we senagat potensialynyň sergisi ýerleşýär. Bu ýerde oturdylan stendlerde Tatarystanyň iri önüm öndürijileri tarapyndan öndürilýän köp dürli önümler giňden görkezilýär. Şol önüm öndürijileriň arasynda türkmen nebitçileriniň hyzmatdaşy bolan «Tatneft» açyk paýdarlar jemgyýeti hem bar. «Gara altyny» çykarmagyň möçberleri boýunça dünýäde esasy orny eýeleýän bu iri rus kompaniýasynyň stendiniň öňünde Prezident Gurbanguly Berdimuhamedowa kompaniýanyň mümkinçilikleri we onuň Türkmenistan bilen hyzmatdaşlyk etmeginiň geljegi hakyndaky ýörite wideorolik görkezildi. Türkmenistanyň Baştutany dürli pudaklaryň, şol sanda ýeňil we azyk senagatynyň, maşyn gurluşygynyň we beýleki pudaklaryň ösüşi hakynda äşgär düşünje berýän ähli ekspozisiýany örän üns berip synlady. Türkmenistanyň Prezidenti Gurbanguly Berdimuhamedowyň bu ýerde görkezilen hakyky deriden tikilen ajaýyp possunlar aýratyn ünsüni çekdi. Döwlet baştutany önümleriň ýokary hilini belläp, Türkmenistanyň Dokma senagaty ministrine goýun derisinden ýokary hilli önümleri öndürmek boýunça tatar partnýorlary bilen hyzmatdaşlygy ýola goýmak barada tabşyryk berdi.

Soňra Prezidentler Gurbanguly Berdimuhamedow we Mintimer Şaýmiýew liftde WIP—loža çykdylar, şol ýerden bedewlere belet we olary tüýs ýürekden sarpalaýan belent mertebeli myhmanlaryň saparynyň hormatyna ýörite guralan at çapyşygyna syn etdiler.

Türkmenistanda bolşy ýaly, Tatarystanda hem däp bolan atçylygyň öz gözbaşyny asyrlaryň jümmüşinden alyp gaýdýandygyny bellemeli. Hut şu ýerde öz gerimi bilen haýran galdyrýan, Russiýada iň iri we ýeke-täk aýlawyň gurulmagy doly kanunalaýyk ýagdaýdyr, bu ýerde bolsa ajaýyp bedewlere aýratyn mähir bilen garalýar. Täsin toplumyň açylyşy Kazanyň müň ýyllyk ýubileýine hem gabatlanyldy. 90 gektara golaý territoriýada çapuw ýodalary, 6 müňden gowrak adam ýerleşýän ýapyk we açyk tribunalar, çapyksuwarlar üçin klub ýerleşýär. Bu ýerde bedewleri türgenleşdirmek üçin iki sany gezim meýdany, hünär okuwlary üçin manež, çapyşyk geçirilýän seýilgäh, şeýle hem hojalyk zolagy bar, şol zolakda athanalar weterinariýa klinikasy, atlary suwa düşürmek üçin basseýn we hojalyk jaýlary ýerleşýär.

At çapyşygynda ýeňiş gazananlar türkmen atşynaslarynyň hormatyna we Türkmenistanyň Prezidentiniň saparynyň hormatyna goýlan gymmatly baýraklaryň eýeleri boldular, şol at çapyşygyny bolsa bu ýere ýygnananlar uly gyzyklanma bilen synladylar.

Agşam Türkmenistanyň Prezidentiniň hormatyna Tatarystan Respublikasynyň Prezidentiniň adyndan dabaraly kabul edişlik boldy, onuň barşynda hormatly Prezidentimiz Gurbanguly Berdimuhamedow we Mintimer Şaýmiýew söz sözlediler.