Düýn agşam paýtagtymyzda türkmen halkynyň beýik taryhy şahsyýetleriniň — milletiň nesilbaşysy Oguz hana we alty ogluna bagyşlanylan suw çüwdürimleriniň monumental toplumynyň açylyş dabarasy boldy. Bu şanly waka mynasybetli dabaralara Türkmenistanyň Prezidenti Gurbanguly Berdimuhamedow gatnaşdy. Döwlet Baştutany Tatarystan Respublikasyna sapary tamamlanandan soň, Aşgabadyň Halkara aeroportundan göni şu ýere geldi.

Monumental arhitektura—çeperçilik ansambly şäheriň iki şaýolunyň — Bitarap Türkmenistan we Türkmenistanyň Gahrymany Atamyrat Nyýazow adyndaky şaýollaryň kesişýän ýerinde guruldy we paýtagtymyzyň howa menziline barylýan ýerlerdäki iri awtomobil çatrygynyň merkezinde ýerleşendir.

Milletiň Lideriniň doglan güni paýtagtymyza girilýän ýerde suw çüwdürimleriniň toplumynyň açylmagy Türkmenistany we öz halkyny beýik Galkynyşyň ýoly bilen ynamly alyp barýan onuň Lideriniň abraýynyň hakyky ýokary göterilişine şaýatlyk edýän aýratyn nyşandyr, ony gurmagyň başlangyjy bolsa hormatly Prezidentimize degişlidir. Bu şanly waka doganlyk Tatarystana şowly tamamlanan sapara hem gabat geldi.

Suw çüwdürimleriniň täze toplumy gurluşy, gerimi we beýan edilişiniň üýtgeşikligi bilen aklyňy haýran edýär. Onuň ölçegleri bu taslamanyň giň möçberlidigini görkezýär. Ony Türkiýäniň meşhur «Polimeks» kompaniýasy amala aşyrdy. Mysal üçin, gurluşyk geçirilen uçastok skulpturalar we kiçi göwrümdäki suw çüwdürimleri bolan dört sany sektorly merkezi suw çüwdürimini özünde jemläp, bagy-bossanlyga öwrülen meýdançalary gurşap almak bilen 140 gektara golaýdyr. Suw çüwdüriminiň ähli okaralarynyň suwly göwrümi 16 müň kub metre barabardyr, bürünç şekilleriň agramy bolsa 30 tonnadan gowrakdyr.

Bu ýerde göze görünmeýän çylşyrymly inžener-tehniki ulgam: kilometrlere barabar suw geçiriji turbalar we elektrik kabelleri, iki sany dizel generatory, elektrik nasoslarynyň ulgamy, suw arassalaýjy desgalar, uly göwrümli rezerwuarlar, dürli esbaplar we başgalar bar. Ýörite kompýuter yşyk diodlary bilen suw çüwdüriminiň düýbüni yşyklandyrmagy, saz bilen bezemegi hem-de ägirt uly suw çüwdürimlerini sinhronlaşdyrmagy üpjün eder. Häzirki zaman iň täze tehnologiýalaryň ulanylmagynyň monumental toplumy saklamak üçin harajatlary ep-esli azaldýandygy guwançlydyr. Bir günüň dowamynda akkumulýator batareýalarynda toplanan gün energiýasy gijäniň garaňky wagty ägirt uly ansambly yşyklandyrar. Ýodajyklaryň ugrunda we gök otly meýdanlaryň töwereginde oturdylan bezeg yşyklandyryjylarynyň ýüzlerçesi hem akkumulýatorlar we göze görünmeýän batareýalar bilen üpjün edilendir. Suw çüwdürimleriniň toplumyny demirgazykdan, gündogardan we günbatardan arka kysymyndaky owadan, göze gelüwli sütünler gurşap alýar. Olar gezekli-gezegine gije-gündiziň dürli wagtlarynda kölege düşer ýaly edip ýerleşdirilendir. Mundan başga hem bu täsin arhitektura-çeperçilik ansambly bina edilende, esasan gymmat bahaly gurluşyk serişdeleri, şol sanda granit we mermer ulanyldy.

...Dabaranyň başlanmagyna ähli zat taýýar. Dabara gatnaşyjylar Türkmenistanyň Prezidenti Gurbanguly Berdimuhamedowyň gelerine sabyrsyzlyk bilen garaşýarlar. Ynha, Aşgabadyň Halkara aeroportundan gaýdýan ýolda Prezidentiň awtomobil kerweni peýda bolýar. Döwlet Baştutanynyň awtoulagy çüwdürimler toplumynyň ýanynda saklanýar. Bu ýerde milletiň Baştutanyny Türkmenistanyň Mejlisiniň ýolbaşçylary, Ministrler Kabinetiniň agzalary, şeýle hem ýurdumyzda işleýän diplomatik wekilhanalaryň we halkara guramalarynyň baştutanlary hem-de wekilleri mähirli mübärekleýärler. Olar hormatly Prezidentimiz Gurbanguly Berdimuhamedowy doglan güni we Tatarystana üstünlikli tamamlanan sapary bilen tüýs ýürekden gutlaýarlar.

Milli lybasa beslenen gyzlar Türkmenistanyň Prezidentine gül dessesini gowşurýarlar. Din wekilleri döwlet baştutanyny däp boýunça duz-çörek bilen garşylaýarlar we aýat-töwir okaýarlar. Olar hormatly Prezidentimiz Gurbanguly Berdimuhamedowy doglan güni bilen gutlap, milletiň Liderine uzak ömür, berk jan saglyk, bagt we il-ýurt bähbitli asylly işlerinde täze üstünlikleri arzuw etdiler.

Mähirli garşylanandygy we hoşniýetli sözler üçin hemmelere minnetdarlyk bildirip, döwlet Baştutany ýörite bellenen münbere geçýär. Hormatly Prezidentimiz Gurbanguly Berdimuhamedow dabara gatnaşyjylara ýüzlenip, şu günki waka täze taryhy eýýamyň ýyl ýazgysyna ýene bir aýdyň sahypa bolup girer diýip belledi. Bu gün biz nesilbaşymyz Oguz hana we alty sany batyr ogullaryna bagyşlanan ajaýyp suw çüwdüriminiň monumental toplumyny açmak üçin bu ýere ýygnandyk diýip, hormatly Prezidentimiz aýtdy. Hormatly Prezidentimiz Gurbanguly Berdimuhamedow bu ajaýyp ansamblyň paýtagtymyzyň Halkara aeroportuna—biziň Watanymyzyň ýüregine barylýan ýolda iki sany gatnawly magistralyň merkezi çatrygynda guruldy, munuň simwoliki manysy bardyr diýip nygtady. Çünki häzirki wagtda, Beýik Galkynyş eýýamynda Ýer ýüzüniň çar künjünden gadymy hem-de baky juwan Oguz ýurduna gelýän myhmanlaryň sany birsyhly artýar diýip belledi. Täze monumental toplum örän ajaýyp ýadygärlik bolup, diňe bir Aşgabadyň däl, bütin Türkmenistanyň hem giriş derwezesidir. Pursatdan peýdalanyp, hormatly Prezidentimiz Gurbanguly Berdimuhamedow bu ägirt uly arhitektura-çeperçilik ansamblynyň gurluşygyna gatnaşanlaryň ählisine minnetdarlyk bildirdi.

Oguz türkmenleri öz ilkinji döwletini bäş müň ýyl mundan öň döredipdirler diýip, milletiň Lideri sözüni dowam etdirdi. Oguz han türkmen halkynyň durmuş filosofiýasy bolan däp-dessurlarda öz alty ogluny terbiýeläpdir, olara we öz ýigrimi dört agtygyna we ähli nesillerine şol ýörelgeleri saklamagy wesýet edipdir. Häzirki wagtda biz bagtyň we ene topragyň abadançylygynyň, onuň okgunly özgermeginiň hatyrasyna zähmet çekmäge ruhubelentlik berýän Oguz hanyň asylly däplerini dowam edýäris. Bu ideýa häzirki zaman Aşgabadyň binagärlik keşbine görk goşjak çüwdürimler toplumyny döretmegiň esasynda goýuldy, ol häzirki zaman Aşgabadyň arhitektura keşbini has hem bezär.

Dabara gatnaşyjylary, aşgabatlylary we ähli türkmenistanlylary şanly waka mynasybetli gutlap, döwlet Baştutany hemmelere şowlulyk we üstünlikler arzuw etdi.

Iň dabaraly pursat gelip ýetýär: Türkmenistanyň Prezidenti simwoliki lentany kesýär. Kümüşsöw suw çüwdürimleri asmana atylýar. Türkmen halkynyň taryhy öz beýanyny tapan çeper kompozisiýa ähli monumental gözelligi we göwrümi bilen bu ýere ýygnananlaryň öňünde dikelýär. Baş çüwdürimiň howzy 12 ýaprakly güli şekillendirýär, onuň 16 metrlik münberinde ady rowaýata öwrülen Oguz hanyň şekili ör boýuna galýar, ol at üstünde şekillendirilipdir. Şol ýerden şöhle görnüşli bölünen kaskad boýunça suw alty sany gaba şaglap guýulýar, şolarda türkmenleriň nesilbaşysynyň ogullarynyň altysynyň—Gün hanyň, Aý hanyň, Ýyldyz hanyň, Gök hanyň, Dag hanyň we Deňiz hanyň heýkelleri oturdylypdyr. Merkezi çüwdürimiň daş-töweregindäki giň territoriýanyň çar tarapynda bölümleriň dördüsi bolup, olarda dürli görnüşdäki çüwdürimleriň 26-sy ýerleşdirilipdi, olar jübütleýin bölünipdir. Şonda demirgazyk bölümi günortadaka, günbatardaky bolsa gündogardaka meňzedilipdir.

Ägirt uly kompozisiýany döretmegiň üstünde Türkmenistanyň halk suratkeşi Babasary Annamyradowyň baştutanlygyndaky döredijilik topary işledi. Nesilbaşymyz Oguz han paýtagtymyzyň ilaty we myhmanlary bilen salamlaşýan şekilinde elini ýokary galdyryp dur. Oguz hanyň we onuň ogullarynyň altysynyň keşplerini döreden awtorlaryň pikirine görä, monumental topar türkmen halkynyň parahatçylyk söýüjiliginiň, onuň bozulmaz jebisliginiň we agzybirliginiň simwolyny, şonuň bilen bir wagtda hem häzirkizaman türkmen döwletiniň döredijilik ruhuny we kuwwatyny alamatlandyrýar.

Türkmen milli konserwatoriýasynyň horunyň ýerine ýetirmeginde «Galkynyşly Watanym» atly aýdym bolup geçýän wakalara aýratyn dabaraly äheň berýär. Dürli reňkli howa şarlarynyň ýüzlerçesi asmana göterilýär. Döwlet Baştutany teatrlaşdyrylan sahnalaryň bolup geçýän ýerine ugraýar. Bu ýerde Türkmenistanyň Prezidentini aýdyň öwüşginli mukam kompozisiýasyny taýýarlan beýleki ýerine ýetirijiler topary garşylaýar.

Soňra açyk asmanyň astynda Türkmenistanyň medeniýet we sungat ussatlarynyň owadan öwüşginli çykyşlary ýaýbaňlanýar, oňa artistler özleriniň ähli ylhamyny we zehinini, milletiň Liderine bolan söýgüsini we hormatyny siňdiripdirler. Döwlet Baştutanyny we dabara gatnaşyjylaryň hemmesini ady rowaýata öwrülen Oguz han we onuň ogullary ýelden ýüwrük gözel ahalteke bedewlerine atlanyp mübärekleýärler. Şöhrat gazanan gahrymanlarynyň keşplerini türkmen sahna ussatlary başarjaňlyk bilen suratlandyrdylar.

Türkmenistanlylaryň ýaş nesliniň wekilleri hormatly Prezidentimiz Gurbanguly Berdimuhamedowy doglan güni bilen gutlamaga geldiler. Bu ýere ýygnananlaryň şowhunly el çarpyşmalary astynda owadan lybasdaky oglanjyk we gyzjagaz milletiň Liderine ajaýyp gül desselerini gowşurýar.

Fransiýadan gelen tansçy gyz tarapyndan taýýarlanylan howa şaryndaky täsin çykyş ýygnananlaryň ählisi üçin hakykatdan hem garaşylmadyk sowgat boldy. Haýran galan jemagatyň gözüniň alnynda ol howa akrobatikasynyň ussatlygyny görkezdi.

Yşyk sönýär we ýörite ekranlarda, şol sanda suw tekizliginde şöhlenen ekranlarda dokumental film görkezilýär, ol häzirki wagtda ýurdumyzda ýaýbaňlanan deňsiz-taýsyz özgertmeler we reformalar hakynda, Türkmenistanyň Prezidenti Gurbanguly Berdimuhamedow tarapyndan yzygiderli durmuşa geçirilýän parahatçylyk, hoşniýetli goňşuçylyk we giň halkara hyzmatdaşlygy hakynda gürrüň berýär.

Hakyky tans edýän suw çüwdürimleri we ajaýyp feýerwerk bilen özboluşly lazer reňkli-sazly şou baýramçylyk programmasynyň esasy şowhuny boldy, ol paýtagtymyzyň agşamky asmanyny lowurdaýan ýyldyzlaryň müňlerçesi bilen nurlandyrdy. Bu şou tamamlanandan soň, kuwwatly dabaraly owaz bilen «Prezidentiň ýüregi» diýen aýdym ýaňlandy.
Türkmenistanyň Prezidenti Gurbanguly Berdimuhamedow Aşgabadyň dokma toplumynyň golaýynda ýerleşýän jaýynda ýurduň ýolbaşçylar korpusy bilen duşuşdy we doglan güni mynasybetli olaryň gutlaglaryny kabul etdi. Bu ýere ýygnananlar hormatly Prezidentimiz Gurbanguly Berdimuhamedowa berk jan saglyk, gujur-gaýrat, Türkmenistanyň gülläp ösmeginiň hatyrasyna alyp barýan ägirt uly işinde mundan beýläk-de üstünlikleri arzuw etdiler. Özüni gaýgyrman, öz beýik Watanynyň, öz edermen we zehinli halkynyň hatyrasyna we olary şöhratlandyrmak üçin geçirýän ägirt uly işleri üçin milletiň Liderine tüýs ýürekden minnetdarlyk sözleri ýaňlandy.
Suw çüwdürimleriniň monumental toplumynyň açylyş dabarasy giç agşama çenli dowam etdi.