Türkmenistanyň baýdagy dünýädäki iň belent flagştokda parlaýar

Düýn türkmen paýtagtynyň günortasynda Türkmenistanyň Döwlet baýdagyny Ginnesiň Bütindünýä rekordlar kitabyna girizilen belentlige galdyrmak dabarasy boldy. Şu rekorda şaýatlyk etmek üçin Aşgabada Ginnesiň Bütindünýä rekordlar kitabynyň wise-prezidenti Greýg Glendeý geldi.

Ir bilen Beýik Saparmyrat Türkmenbaşy adyndaky Türkmenistanyň Milli muzeýiniň öňündäki baýramçylyk lybasynda bezelen meýdança Türkmenistanyň Mejlisiniň deputatlary, ministrlikleriň we pudaklaýyn edaralaryň ýolbaşçylary, jemgyýetçilik guramalarynyň, ýaşlaryň, habar beriş serişdeleriniň wekilleri ýygnandylar, şol ýerde 133 metr beýiklikdäki flagştok oturdyldy. Bu flagştogy guran «Polimeks» kompaniýasynyň ýolbaşçylary we gurluşykçylary hem bu ýerde boldular.

Hormat garawulynyň orkestriniň we Aşgabat şäheriniň Medeniýet müdirliginiň saz toparlarynyň çykyşlary baýramçylyga gatnaşyjylara aýratyn dabara we şowhunlylyk çaýýar, olaryň ýerine ýetirmeginde ýöriş sazlary we watançylyk aýdymlary ýaňlanýar. Myhmanlaryň ýüzlerinde şatlyk öwüşginleri nur saçýar.

Türkmenistanyň Döwlet baýdagyny galdyrmagyň resmi dabarasy başlanýar. Hormat garawulynyň esgerleri ýöriş sazynyň owazy astynda sazlaşykly gadamlar bilen meýdança gelýärler. Olaryň ellerinde Türkmenistanyň Döwlet baýdagy bar, onuň möçberi 52,5 we 35 metre barabardyr, agramy 420 kilogramdyr. Türkmenistanyň Döwlet senasynyň dabaraly owazy astynda bu ýere ýygnananlaryň ýüreklerinde Watanymyza, onuň şu günki gününe buýsanç duýgusyny oýarýan ägirt uly milli baýdagymyz ýuwaşlyk bilen asmana göterilýär.

«Häzirki wagtda Türkmenistan dünýä bileleşiginde mynasyp orny eýeleýär, biziň öňümizde bagtly geljege tarap aýdyň ýol açykdyr, ýöne biz oňa mynasyp bolmak üçin yhlas bilen zähmet çekmelidiris» diýip, öz egsilmez gujur-gaýraty we hyjuwly işi bilen raýat edermenliginiň, öz halkyna wepaly hyzmat etmegiň göreldesi bolan, milletiň Lideri Gurbanguly Berdimuhamedow aýdýar. Milletiň Lideriniň doglan gününde milli baýdagymyzyň dünýäde iň belent flagştokda parlamagy çuňňur simwolikidir, hormatly Prezidentimiz bolsa Tatarystanda bolmak bilen, döwletleriň we hökümetleriň ýolbaşçylaryndan gutlaglary kabul edýär. Bu gutlaglaryň aňyrsynda ähli gujur-gaýratyny dogduk Watanymyzyň galkynmagyna durşy bilen bagş eden türkmen Lideriniň bitiren görnükli hyzmatlarynyň ykrar edilmegi durandyr. Häzirki wagtda Türkmenistanda buýsançly we zähmetsöýer türkmen halkynyň durmuşa teşnelik bilen garamagy, öz döredijilikli zähmetiniň miwelerinden peýdalanmagy üçin ähli şertler döredilendir. Biziň zähmete ýugrulan adaty günlerimiz agzybirligiň baýdagy astynda aýratyn ähmiýete eýe bolup, baýramçylyklarymyz bolsa amala aşyrylan beýik işleriň şatlygyna öwrüldi.

Baýdagymyz ir säheriň mylaýym şemalyna pasyrdap, flagştogyň depesine ýetende şowhunly el çarpyşmalar ýaňlandy, bu ýere ýygnananlar birek-biregi gyzgyn gutladylar. Ýaşulular asylly işlere hemaýat bermegini diläp, aýat-töwir okadylar. Ine, indi ol watançylygyň, ahlaklylygyň we milletimiziň täze galkynyşynyň beýik düşünjeleriniň biziň aňymyzda ykrar edilmeginiň şaýady, döwletliligimiziň, buýsanjymyzyň hem-de hormatymyzyň simwoly bolan Garaşsyz Türkmenistanyň baýdagy al-asmanda buýsanç bilen pasyrdaýar. «Prezidentiň ýüregi» atly aýdymyň ýerine ýetirilmegi baýramçylygyň jemini jemledi, şol aýdymy dabara gatnaşyjylaryň hemmesi bilelikde ýerine ýetirdiler.

Indiden beýläk, Ginnesiň Bütindünýä rekordlar kitabynyň täze neşirinde Türkmenistanyň pasyrdaýan Döwlet baýdagynyň möçberi we munuň dünýäde iň beýik flagştokdygy baradaky habar bilen, surat çap ediler. Bu barada Türkmenistanyň Döwlet baýdagynyň galdyrylmagynyň resmi dabarasy tamamlanandan soň, Ginnesiň Bütindünýä rekordlar kitabynyň wise-prezidenti Greýg Glendeý habar berdi. Ol bu üstünligi tassyklaýan sertifikaty hem gowşurdy.

Türkmenistan Iordaniýadan we Birleşen Arap Emirliklerinden öňe geçdi. Olarda bolsa degişlilikde 132 we 123 metr beýiklikdäki flagştoklar bar. Munuň özi Türkmenistanyň Ginnesiň Bütindünýä rekordlar kitabyny alan ikinji rekordydyr. Mälim bolşy ýaly, birnäçe ýyl mundan öň şol kitaba dünýäde iň uly diýlip ykrar edilen «Altyn asyr» atly elde dokalan türkmen halysy girizildi. «Meniň üçin bu dabaralara gatnaşmak iki esse şanlydyr, sebäbi men Türkmenistanda birinji gezek bolýaryn we siziň ajaýyp paýtagtyňyz, häzirki zaman binalaryňyz, gözel seýilgähleriňiz we skwerleriňiz meni haýran galdyrdy, agşamlaryna bolsa Aşgabat şäheri müňlerçe çyralaryny ýakyp, hrustal şähere öwrülýär. Bu sapar meniň kalbymda uzak wagtlap galar» diýip, Greýg Glendeý gürrüň berýär.