Düýn türkmen paýtagtynyň merkezinde, Magtymguly şaýolunyň ugrunda täzelenen «Parahat» medeni-dynç alyş merkezi öz gapylaryny giňden açdy.

Toplumyň durkuny özgertmegiň ABŞ-nyň 4 million dollaryna golaý bahasy bolan işlerini «Bahar» türk gurluşyk firmasy amala aşyrdy. Türkmenistanyň Döwlet haryt-çig mal biržasy onuň buýrujysy hökmünde çykyş etdi. Medeni-dynç alyş merkeziniň durky şäher bezegçilik estetikasyna bildirilýän häzirki zaman talaplaryna we häzirki zaman sosial infrastrukturasynyň äheňlerine laýyklykda, şeýle hem Aşgabatda işjeň ösdürilýän göwün açyş we dynç alyş industriýasynyň talaplaryny göz öňünde tutmak bilen özgerdildi. Bu merkez köp ugurlaýyn meýdançany öz içine alýar, ol maşgala bolup dynç almak we ýaşlaryň medeni dynç alşy üçin niýetlenendir. Şol ýere gelýänlere hyzmatlaryň uly spektri: kinogörkezişler, dürli şowhunlary, baýramçylyklary, tanyşdyryş dabaralaryny we sergileri geçirmek teklip ediler.

Şol ýerde iň täze tehnikalar bilen enjamlaşdyrylan 50 orunlyk DVD salon, internet kafe, korporatiw we maşgala dabaraly çäreleri üçin 600 orunlyk banket zaly bar. Şeýle hem merkeziň foýesinde amatly dynç almak üçin ähli şertler döredilipdir. Onuň içki bezegleri modern we neoklassika äheňlerinde bezelipdir. Şonuň bilen birlikde otaglaryň her biri özüne mahsus bezegçilik äheňleri bilen tapawutlandyrylypdyr.

Şowly dizaýn «Parahadyň» öňündäki seýilgähiň hem durkuny özgerdipdir. Agaçlaryň saýasynda dynç almak üçin owadan oturgyçlar goýlupdyr, köçede ägirt uly monitor gurnalypdyr we 200 orunlyk tomusky kafe işlär.