Öňňin Kazan şäherinde ýerleşýän Myhmanlar öýündäki öz kabulhanasynda Türkmenistanyň Prezidenti Gurbanguly Berdimuhamedow «Itera» halkara kompaniýalar toparynyň baştutany Igor Makarowy kabul etdi.

Holdingiň ýolbaşçysy saparyň iş grafiginiň doludygyna garamazdan, wagt tapandygy üçin Türkmenistanyň Baştutanyna minnetdarlyk bildirip, özleriniň her bir täze duşuşygyna hemişe şatdygyny belledi.

I.Makarow söhbetdeşligiň barşynda öz baştutanlyk edýän halkara kompaniýalar toparynyň Türkmenistan bilen köpýyllyk netijeli hyzmatdaşlygy giňeltmäge örän ýokary gyzyklanma bildirýändigini ýene-de tassyklady, şol hyzmatdaşlygyň çäklerinde häzirki wagtda bilelikdäki taslamalaryň birnäçesi üstünlikli durmuşa geçirilýär.

Hususan-da, kompaniýanyň baştutany möhüm desgalaryň birnäçesiniň gurluşygynyň barşy hakynda hormatly Prezidentimiz Gurbanguly Berdimuhamedowa hasabat berdi, olaryň hatarynda «Awaza» milli syýahatçylyk zolagyndaky myhmanhana, Aşgabatda kompaniýanyň ofisi, Türkmenabatda stadion we beýlekiler bar. Iri senagat önümçilikleriniň, şol sanda ýod-brom we karbamid zawodlarynyň gurluşygy beýleki geljegi uly taslamalaryň hatarynda agzaldy.

«Itera» halkara kompaniýalar toparynyň ýolbaşçysy pursatdan peýdalanyp, hormatly Prezidentimiz Gurbanguly Berdimuhamedowy doglan güni bilen gutlady hem-de bagt, saglyk we halkynyň abadançylygynyň hatyrasyna türkmen Lideriniň iri möçberli özgertmeler maksatnamalaryny durmuşa geçirmegiň ýolunda täze ajaýyp üstünlikleri arzuw etdi.