Hormatly Prezidentimiz Gurbanguly Berdimuhamedowyň «KAMAZ» awtomobil gigantynda bolmagy

Düýn Türkmenistanyň Prezidenti Gurbanguly Berdimuhamedow Tatarystan Respublikasyna düýn başlanan iki günlük saparynyň çäklerinde, Naberežnyýe Çelny şäherindäki «KAMAZ» açyk paýdarlar jemgyýetiniň awtomobil zawodyna we ylmy-tehniki merkezine bardy.

Ozal habar berlişi ýaly, düýn Kazanda ýokary derejedäki ikitaraplaýyn gepleşikler uly üstünlik bilen geçirildi, olar türkmen we tatar halklarynyň asyrlaryň dowamyndaky dostluk hem-de doganlyk däplerine ygrarlydygyny tassyklady. Hormatly Prezidentimiz Gurbanguly Berdimuhamedow we Mintimer Şaýmiýew tarapyndan duşuşyklaryň jemleri boýunça gol çekilen söwda-ykdysady, ylmy-tehniki we medeni hyzmatdaşlyk hakyndaky hökümetara Ylalaşyk ýola goýlan netijeli hyzmatdaşlygy hil taýdan täze derejä çykarmaga iki tarapyň hem taýýardygynyň tassyklanmasy boldy.

Düýn ir bilen Tatarystanyň Prezidenti Mintimer Şaýmiýew we Respublikanyň Premýer-ministri Rustam Minnihanow Myhmanlar öýüne, türkmen Lideriniň kabulhanasyna geldiler, olar hormatly Prezidentimiz Gurbanguly Berdimuhamedowy doglan güni bilen tüýs ýürekden we gyzgyn gutladylar, saglyk hem-de türkmen halkynyň bagtynyň we abadançylygynyň hatyrasyna alyp barýan köptaraply işinde üstünlikleri arzuw etdiler.

Soňra ertirlik nahary berildi, ertirlik nahary tamamlanandan soň, türkmen döwletiniň Baştutany Tatarystan Respublikasynyň Prezidenti Mintimer Şaýmiýew bilen mähirli hoşlaşdy we Tatarystanyň Premýer-ministri bilen bilelikde golaýda ýerleşen dikuçar meýdançasyndan Naberežnyýe Çelny şäherine uçdy.

Tatarystanyň Prezidenti Türkmenistanyň habar beriş serişdelerine beren interwýusynda Türkmenistanyň Prezidentiniň saparyna ýokary baha berip, Kazanda geçirilen ikitaraplaýyn gepleşikleriň örän ýokary derejede netijeli bolandygyny belledi. Biz özara gatnaşyklaryň ähli ugurlary boýunça bilelikdäki örän uly işi geçirmeli bolarys, biziň öňümizde gazanylan ylalaşyklary we gol çekilen hökümetara Ylalaşygyny nazara almak bilen, giň mümkinçilikler açylýar diýip, hususan-da, Mintimer Şaýmiýew aýtdy. M.Şaýmiýew gadymy döwürlerden bäri türkmen we tatar halklaryny baglanyşdyrýan dostluk däpleri hakynda söz açyp, häzirki wagtda hem bu özara gatnaşyklaryň ähli derejelerde üstünlikli dowam edýändigini nygtady.
Bir sagatdan gowrak wagtdan soň, Türkmenistanyň Prezidenti bortunda bolan dikuçar «KAMAZ» açyk paýdarlar jemgyýetiniň awtomobil zawodynyň önümçilik korpusynyň ýanynda ýerleşen meýdança gonýar. Hormatly Prezidentimiz Gurbanguly Berdimuhamedowyň ýanynda Ministrler Kabinetiniň Başlygynyň orunbasarlary R.Meredow, T.Tagyýew we N.Şagulyýew bolýarlar.

Türkmen Liderini «KAMAZ-yň» baş direktory we Tatarystanyň hökümetiniň agzalary mähirli we tüýs ýürekden garşylaýarlar. Hemme ýerde türkmen we rus dillerinde gutlag transparantlar asylypdyr, Türkmenistanyň, Russiýa Federasiýasynyň we Tatarystan Respublikasynyň Döwlet baýdaklary pasyrdaýar.

Hormatly Prezidentimiz Gurbanguly Berdimuhamedow Russiýanyň awtogigantynyň önümçilik korpuslaryna tarap ugraýar we baş ýygnaýjy konweýer ýerleşen sehe az wagtlyk ekskursiýany amala aşyrýar. Bir kilometre golaý bolan merkezi pyýada bir gije-gündizde hem aýlanyp çykyp bolmajakdygyny nazara alyp, döwlet Baştutany elektromobile münýär.
Häzirki wagtda «KAMAZ» açyk paýdarlar jemgyýeti Russiýa Federasiýasynyň iri awtomobil korporasiýasydyr, ol dünýäniň uly ýük göterýän awtomobillerini esasy öndürijileriniň reýtinginde durnukly ýagdaýda öňdäki orny eýeleýär. Şu ýylyň başynda bu iri kompaniýanyň paýyna Russiýanyň ýük awtomobilleri bazarynyň 30 göterimine golaýy düşdi. «KAMAZ» açyk paýdarlar jemgyýeti 2006-njy ýylda hil babatda Russiýa Federasiýasynyň hökümetiniň baýragyny alan; «Bäsleşige ukyplylyk we hil» nominasiýasynda «Rus söwda Olimp» baýragynyň laureaty bolan ýeke-täk kompaniýadyr.

Häzirki wagtda «KAMAZ» tehnikalaryň köp görnüşlerini: ýük awtomobillerini, tirkegleri, awtobuslary, traktorlary, dizel dwigatellerini, güýç beriji agregatlary we beýlekileri öndürýär. Awtogigantyň 30 ýyldan gowrak taryhynda onuň kärhanalarynda ýük awtomobilleriniň 1,7 milliondan gowragy we dizel dwigatelleriniň 2,3 milliondan gowragy öndürildi, kompaniýa şolary öndürmegiň möçberi boýunça dünýäde 8-nji orny eýeleýär.

Dynçgünüdigine garamazdan sehde iş gaýnap joşýar. Sebäbi her gije-gündizde awtomobil zawodyň baş ýygnaýjy konweýerinden dürli modifikasiýadaky taýýar awtomobilleriň 200-si çykýar.

Goşun üçin köp maksatly awtomobilleri tapgyrlaýyn öndürmek gigant zawodyň işiniň ileri tutulýan ugurlarynyň biridir, «Mustang» kysymyndaky awtomobiller — KAMAZ-4350, KAMAZ-5350 we KAMAZ-6350 awtomobilleri şolara degişlidir, olar bilen Russiýa Federasiýasynyň Ýaragly Güýçleri üpjün edilýär. Türkmenistanyň Prezidenti konweýerden çykan KAMAZ-4350 awtomobiliniň ýanynda durýar we ony üns berip synlaýar.

Türkmenistanyň Prezidenti we onuň ýany bilen barýan hökümet delegasiýasynyň agzalary dürli modellerdäki täze maşynlar bilen tanşanlaryndan we häzirki wagtda doly döwrebaplaşdyrmak işi tamamlanýan önümçiligi gözden geçirenlerinden soň, «KAMAZ» açyk paýdarlar jemgyýetiniň ylmy-tehniki merkezine bardylar. Ägirt uly binanyň öňünde, Türkmenistanyň, Russiýanyň we Tatarystanyň baýdaklary, hormatly Prezidentimiz Gurbanguly Berdimuhamedowy doglan güni bilen gutlaglar we oňa bagt hem-de üstünlikler baradaky arzuwlar ýazylan köp sanly gutlag transparantlary bilen bezelen açyk meýdançada «KAMAZ» tarapyndan öndürilen traktorlardan we týagaçlardan has oňaýly awtobuslara çenli dürli modifikasiýaly we maksatly tehnikanyň ähli modelleri görkezilýär. Açyk asmanyň astyndaky bu sergide Türkmenistanyň Baştutanyny ugradýan gidiň ornunda «KAMAZ» açyk paýdarlar jemgyýetiniň Baş direktory Sergeý Kogogin we kärhananyň baş konstruktory Damis Waleýew çykyş etdiler.

Hakykatda taslama býurosy bolan ylmy-tehniki merkez awtomobilleri döretmek, synag nusgalaryny ýasamak we olary synagdan geçirmek, tehnologiýalary sazlamak we önüm taýýarlaýja bäsleşige ukyply önümi köpçülikleýin öndürmek üçin bermek bilen meşgullanýar. Häzirki wagtda bu ýerde dürli hünärdäki işgärleriň müňden gowragy: konstruktorlar, tehnologlar, dizaýnerler, barlagçylar, ýokary hünärli işçiler we synag geçiriji sürüjiler işleýärler. Merkezde laboratoriýalary we synag stansiýalaryny özünde jemleýän kuwwatly barlag hem-de tejribe-synag binýady bar. Bularyň hemmesi awtogiganta hyzmat etmek boýunça ýönekeý ygtybarly we oňat hilli awtomobilleri döredip, önümçiligi birsyhly kämilleşdirmäge we döwür bilen aýakdaş gitmäge mümkinçilik berýär, awtogigantyň önümlerine bolsa bütin dünýäde isleg bildirilýär.

Hormatly Prezidentimiz Gurbanguly Berdimuhamedow hödürlenen modelleriň her biri bilen jikme-jik tanyşýar. Gysylan gazda işleýän kuwwatly KAMAZ hormatly Prezidentimizde aýratyn gyzyklanma döredýär. Ýangyjyň tygşytly harçlanylýandygyny nazara almak bilen şeýle maşynlary ulanmak tebigy gazyň ägirt uly gorlaryna eýe bolan Türkmenistan üçin örän geljegi uludyr, şol maşynlaryň gaz bilen bir gezek doldurylmagy 400 kilometr ýoly geçmäge ýetýär. Agyr ýol şertlerinde işleýän KAMAZ-lar, şeýle hem oba hojalyk tehnikasy, hususan-da, traktorlar Türkmenistanyň işjeň ösýän halk hojalygy üçin peýdaly bolup biler, olaryň käbiri eýýäm Türkmenistanyň toprak-howa şertlerinde synagdan geçirilýär.

Maşyn parkyny synlamagyň barşynda Türkmenistanyň Prezidenti bu ýerde öndürilýän häzirkizaman awtobuslary bilen tanyşdy, olar şäherara we syýahatçylyk gatnawlary üçin niýetlenendir. Olaryň biriniň salonyna girip görüp, Gurbanguly Berdimuhamedow bu tapgyr barada awtobusda gurnalan ekranda görkezilen ýörite wideorolige syn etdi.
Ajaýyp ekskursiýa üçin minnetdarlyk bildirip, döwlet Baştutany baş konstruktor we onuň ýanynda bolýan «KAMAZ»-yň baş direktory bilen mähirli hoşlaşyp, Naberežnyýe Çelny şäherinden 100 kilometrlikde ýerleşýän tebigatyň täsin künjegine—Krasnyý bor diýen ýere dikuçarda uçdy. Şol ýerde, gür tokaýlygyň içinde, Iž derýasynyň boýunda kärhananyň dynç alyş ýeri we awçylyk hojalygy ýerleşýär. Ähli ýerlerde bolşy ýaly, Türkmenistanyň Prezidenti bu ýerde hem mähirli, hoşniýetli kabul edildi.

Hormatly Prezidentimiz Gurbanguly Berdimuhamedowy doglan güni mynasybetli mähirli gutlap, iri korporasiýanyň ýolbaşçylary türkmen Liderine söweşjeň maşyny sowgat berdiler, ol abraýly halkara bäsleşiklerine, şol sanda belli «Pariž-Dakar» ralli bäsleşiklerine yzygiderli gatnaşýan maşynlaryň tapgyryndandyr. Sowgat berlen maşynyň dizaýny milli däpleriň iň gowy äheňlerinde ýerine ýetirilipdir—onuň ýüzünde okgunly çapyp barýan ahalteke bedewleri, Türkmenistanyň kartasy we haly göli şekillendirilipdir. Onuň görnükli ýerinde owadan ýazylan 51 san belgisini görmek bolýar, ol hormatly Prezidentimiz Gurbanguly Berdimuhamedowyň doglan gününiň şu günki bellenilýän senesidir.

«KAMAZ»-yň Baş direktoryna minnetdarlyk bildirip, döwlet Baştutany onuň teklibi boýunça professional sürüjiniň lybasyny geýýär we hut özi awtoulagyň rulunyň başyna geçýär. Şturman-mehanigiň ornuny bolsa ady rowaýata öwrülen Wladimir Çagin eýeleýär, ol birnäçe gezek «Pariž-Dakar» aralygynda geçirilen ralli bäsleşikleriniň absolýut çempiony bolupdy. Hormatly Prezidentimiz awçylyk hojalygynyň territoriýasynda aýlaw edýär. Soňra hormatly Prezidentimiz Gurbanguly Berdimuhamedow maşyndan düşüp, bäsleşiklere gatnaşan beýleki söweşjeň maşyny ýolsuz ýerleriň şertlerinde hem synap görmäge isleg bildirýär. Ýokary hünärli maşyn sürüjiden we Premýer-ministr Rustam Minnihanowdan ybarat düzümdäki topar bilen hormatly Prezidentimiz töwereklere aýlanýar. Tatarystanyň hökümetiniň baştutanynyň soňra aýdyşy ýaly, ol agyr maşynda duş gelýän ähli päsgelçilikleri ynamly, ussatlyk bilen geçen we özüniň başarjaň häsiýetini dolulygyna açyp görkezen Türkmenistanyň Prezidentiniň maşynyň çalt sürüşine haýran galypdyr.

Gezelençden soň, bu ýerde awçylyk hojalygynda Türkmenistanyň Baştutanynyň hormatyna günortanlyk nahary berildi, nahar başynda bu ýere ýygnananlar hormatly Prezidentimiz Gurbanguly Berdimuhamedowy doglan güni bilen tüýs ýürekden gutladylar, parahatçylyga we progrese hyzmat etmekde türkmen Lideriniň hyzmatlaryna çuňňur hormat goýýandyklaryny we ony ykrar edýändiklerini beýan etdiler. Şu ýerde hormatly Prezidentimiz Gurbanguly Berdimuhamedowyň Russiýanyň we Türkiýäniň Prezidentleri bilen telefon arkaly söhbetdeşlikleri boldy, olar şahsy söhbetdeşlikde Türkmenistanyň Liderini gutlamaga isleg bildirdiler.

Mähirli garşylanandygy üçin minnetdarlyk bildirip, Türkmenistanyň Prezidenti «KAMAZ»-yň ýolbaşçylary bilen hoşlaşýar we dikuçarda Tatarystanyň paýtagtyna gaýdyp gelýär. Bu ýerde, göni uçuş meýdanynda Tatarystanyň Prezidenti Mintimer Şaýmiýew bilen gysgaça jemleýji söhbetdeşlik boldy. Hormatly Prezidentimiz Gurbanguly Berdimuhamedow iki dostlukly halklaryň gatnaşyklarynyň taryhynda täze tapgyryň başyny başlan, geçirilen gepleşikleriň jemlerine ýokary baha berip, Tatarystanyň ýolbaşçysy bilen mähirli hoşlaşýar, onuň Türkmenistana jogap saparyna sabyrsyzlyk bilen garaşjakdygyny belleýär. Tatarystanyň Prezidenti mundan beýläk-de netijeli hyzmatdaşlyk üçin ygtybarly esasyň düýbüni tutan sapar üçin türkmen Liderine minnetdarlyk bildirip, Türkmenistanyň Prezidenti bilen mähirli hoşlaşýar we oňa ak ýol arzuw edýär.

Hormatly Prezidentimiz Gurbanguly Berdimuhamedow Kazan şäheriniň halkara aeroportundan özüne garaşýan «Boingiň» bortuna münýär, ol Aşgabada tarap ugur alýar.
Düýn günüň ikinji ýarymynda hormatly Prezidentimiziň uçary türkmen paýtagtynyň Halkara aeroportunda gondy. Uçaryň ýanynda Türkmenistanyň Prezidentini Mejlisiň ýolbaşçylary, hökümetiň agzalary garşyladylar, olar hormatly Prezidentimiz Gurbanguly Berdimuhamedowy Tatarystan Respublikasyna saparynyň üstünlikli tamamlanmagy bilen, şeýle hem doglan güni bilen tüýs ýürekden we mähirli gutladylar.