Hormatly Prezidentimiz Gurbanguly Berdimuhamedowyň Tatarystan Respublikasyna saparynyň jemlerine

Häzirki wagtda bütin dünýä başarnykly hem-de maksada okgunly türkmen Lideriniň egsilmez, kuwwatly, döredijilikli gujur-gaýratyny duýýar. Ýurdumyzy günsaýyn we sagatsaýyn özgerdýän şol egsilmez gujur-gaýrat adamlarda ertirki güne bolan ynamy oýarýar hem-de Watanymyzyň, diýmek, her bir adamynyň bagtynyň we abadançylygynyň hatyrasyna bellenilen meýilnamalary durmuşa geçirmäge güýç berýär. Hormatly Prezidentimiz Gurbanguly Berdimuhamedow gaýragoýulmasyz çözgütleriň kabul edilmegi zerur bolan meseleleri uzaga çekdirmezden çözmegi, sözüň hiç bir babatda işden aýra çykmazlygyny talap etmek bilen ýerine ýetiriji häkimiýetiň işinde, ykdysadyýetde, daşary syýasatda täze talaplary belleýär.
Umuman alnanda, munuň özi halkara orbitasyna aýgytly çykmakda hem ýa-da sesden çalt uçýan söweşjeň MiG-29—istrebitelinde uçuş geçirmekde hem syýasy erk-islegiň we konstruktiw hereketleriň öz mysalyňda, batyrgaý başlangyçlaryňda we şahsy edermenligiňde berkidilýän halatydyr...
Şol günler Tatarystanda, Naberežnyý Çelnyda «KAMAZ-yň» kuwwatly tehnikasyny synlan mahaly hormatly Prezidentimiz Gurbanguly Berdimuhamedow abraýly halkara rallilerine gatnaşýan we ýeňiş gazanýan maşynlaryň biri bolan kuwwatly KAMAZ-da ýolsuz ýerde ýokary tizlikde sürmek başarnygyny görkezip, ýene-de bir gezek özüniň deňsiz-taýsyz, gujurly häsiýetini ýüze çykardy.
Dogrusy, Tatarystanda Türkmenistanyň Lideri öz ýöredýän syýasatynyň ähli güýjüni we çuňlugyny görkezdi, bu bolsa Russiýanyň sebitleri bilen aragatnaşyklary ösdürmegiň çäklerinde ilkinji gezek geçirilen bu saparyň üstünlikli bolmagyny üpjün etdi.
Üçünji müňýyllykda halklaryň we döwletleriň söwda-ykdysady, energetika, tehnologiýa, ulag-kommunikasiýa babatda artýan özara baglylygy biziň pikir-oýlarymyzyň we hereketlerimiziň öz häsiýeti boýunça global bolmagyny hem-de adamzady birleşdirmäge gönükdirilmegini talap edýär. Dünýäniň ykbalyna parhsyz bolmadyk her bir adamyny hoşniýetli goňşuçylyk duýgusy gurşap almalydyr. Hut ýokary adamkärçilik aýratynlyklary Türkmenistanyň Prezidentini häsiýetlendirýär, onuň gujur-gaýraty, syýasy pragmatizmi, ýönekeýligi we ýürekdeşligi hyzmatdaşlarda uly hormat bilen garamagy we onuň bilen aýakdaş gitmegi oýarýar. Türkmenistan öz Lideriniň ýöredýän syýasaty bilen häzirki wagtda parahatçylygyň täze formatlaryny döretmäge önjeýli goşant goşýar, şonda howpsuzlygy, durnuklylygy, sosial adalatlylygy diňe syýasy ýa-da harby serişdeler bilen gazanmak mümkin däldir, şolara tarap ýol ylmyň, medeniýetiň, söwda we syýahatçylyk sferasynyň üstünden, ýurtlara we halklara bolelinlik getirýän ykdysady taýdan peýdaly taslamalaryň üstünden geçýär.
Bu babatda Türkmenistan we Tatarystan ideal hyzmatdaşlardyr. Olar geografiki nukdaýnazardan amatly ýerde—gadymy döwürlerden bäri Ýewraziýa ýurtlaryny birleşdirýän ulag ugurlarynyň çatryklarynda ýerleşendirler, baý uglewodorod we beýleki tebigy serişdelere eýedirler, olaryň ruhy, taryhy kökleri umumydyr we häzirki dünýäniň global meselelerini çözmäge çemeleşmeleri birmeňzeşdir. Tutuşlygyna alnanda bolsa bularyň hemmesi tejribäni, adam we maddy baýlyklary alyşmak üçin hakykatda çäksiz mümkinçilikleri açýar. Doganlyk halklaryň eşreti üçin bu mümkinçiligi peýdalanmak zerurdyr. Bu pikir hormatly Prezidentimiz Gurbanguly Berdimuhamedowyň Tatarystana saparynyň bütin dowamynda amala aşyrylan işleriň içinden eriş-argaç bolup geçdi.
«Türkmenistan Russiýa Federasiýasy bilen giň konstruktiw gatnaşyklary ösdürip, geljekde-de onuň iri sebitleri bilen ygtybarly göni aragatnaşyklary giňeltmegi maksat edinýär. Bu babatda Türkmenistan bilen Tatarystan Respublikasynyň arasyndaky gatnaşyklar netijeli, özara peýdaly hyzmatdaşlygyň nusga alarlykly ajaýyp mysalydyr, onuň esasyna bolsa hyzmatdaşlyk etmegiň gazanylan üstünlikli tejribesi we ägirt uly potensialy, şeýle hem öňden gelýän taryhy aragatnaşyklar, türkmen we tatar halklarynyň medeniýetiniň we ruhy däpleriniň umumylygy goýlandyr» diýip, hormatly Prezidentimiz Gurbanguly Berdimuhamedow Kazanda aýtdy.
Türkmenistanyň we Tatarystanyň hyzmatdaşlyk etmeginiň däp bolan ugurlary ýangyç-energetika sektoryndan, oba hojalygyndan, maşyn gurluşygyndan başga hem maýa goýum syýasatyna we hususy sektora aýratyn üns berildi. Biz öz tarapymyzdan daşary ýurtlarda türkmen biznesi üçin mümkinçilikleriň giňeldilmegi bilen örän gyzyklanýarys diýip, hormatly Prezidentimiz Gurbanguly Berdimuhamedow belledi. Türkmenistanyň özünde bolsa daşary ýurt kompaniýalarynyň işlemegi üçin örän göwnejaý şertler, şol sanda amatly maýa goýum ýagdaýy döredilendir.
Geçirilen bu saparyň aýdyň beýan edilen gumanitar tarapy hem boldy. Bilimi, ylmy ösdürmekde, demokratiki ösüşde we halkara hyzmatdaşlygynda bitiren hyzmatlaryny we bu babatda goşan görnükli şahsy goşandyny ykrar etmegiň alamaty hökmünde hormatly Prezidentimiz Gurbanguly Berdimuhamedowa «Kazan döwlet uniwersitetiniň hormatly doktory» diýen belent adyň berilmegi munuň tassyklamasydyr. Kazan döwlet uniwersiteti bolsa Russiýanyň iri we gadymy medeni, bilim we ylym merkezidir.
Kazanda bolan, söwda-ykdysady, ylmy-tehniki we medeni hyzmatdaşlyk hakyndaky hökümetara Ylalaşyga gol çekilmegi bilen tamamlanan ýokary derejedäki duşuşyklaryň özboluşlylygy UNESKO-nyň Bütindünýä mirasynyň sanawyna goşulan ajaýyp arhitektura ansambly bolan Kazan kremline, Blagoweşenskiý Ybadathanasyna we Kul-Şarif metjidine, «Kazan» halkara atçylyk-sport toplumyna, Tatarystanyň paýtagtynyň beýleki ajaýyp ýerlerine baryp görmegi özünde jemleýän saparyň resmi maksatnamasynda hem, köpsanly resmi däl duşuşyklarda we gatnaşyklarda hem öz beýanyny tapdy, olar bolsa dogrusy, döwletleriň we halklaryň derejesinde hem, ýönekeý adamlaryň derejesinde hem hyzmatdaşlyk köprülerini gurmagyň aýratyn ukybyna eýe bolan täze formasiýadaky ynsanyň—türkmen Lideriniň daşary ýurtly saparlary üçin eýýäm däbe öwrüldi.
—Häzirki Türkmenistan öz Lideriniň ýolbaşçylygynda «açyk gapylar» syýasatyny we ýurdy düýpli täzelemäge, artýan sosial-ykdysady we medeni ösüşi, koordinatlaryň dünýä ulgamyna ynamly goşulmaga gönükdirilen progressiw reformalary ynamly ýöredýän döwlet hökmünde bütin dünýäde mälimdir. Tatarystanda Türkmenistanyň Prezidentiniň aýdan sözüniň işden aýra çykmaýandygyna we onuň başyny başlan her bir başlangyjynyň bada-bat anyk hereketlere geçýändigine ýokary baha berýärler—diýip, Tatarystanyň Prezidenti Mintimer Şaýmiýew nygtady.
Tejribeli we paýhasly syýasatçy bolan Tatarystanyň lideriniň bu sözlerinde hormatly Prezidentimiz Gurbanguly Berdimuhamedowyň syýasy stiliniň düýp mazmuny beýan edilýär, hormatly Prezidentimiz progrese tarap ymtylýan we hakyky dostlaryna hem-de hyzmatdaşlaryna açyk bolan ýurt hökmünde Türkmenistanyň bütin dünýäde abraýynyň belende göterilmegini gazandy.