Türkmenistan we Saud Arabystany: dostluk we hyzmatdaşlyk ýoly bilen

Düýn paýtagtymyzyň «Prezident» myhmanhanasynda tanyşdyrylan kitap şeýle atlandyrylýar. Iki döwletiň we iki halkyň arasynda bozulmaz dostlugyň we netijeli hyzmatdaşlygyň ýene bir aýdyň simwolyna öwrülen dabaranyň guramaçylary hökmünde Türkmenistanyň Daşary işler ministrligi we Saud Arabystany Patyşalygynyň Aşgabatdaky Ilçihanasy çykyş edýärler.
Tanyşdyrylyş dabarasyna Ministrler Kabinetiniň agzalary, ministrlikleriň we pudaklaýyn dolandyryş edaralarynyň, jemgyýetçilik guramalarynyň, daşary ýurtlaryň Türkmenistandaky ilçihanalarynyň, şeýle hem biziň ýurdumyzda işleýän kompaniýalarynyň we firmalarynyň wekilleri, žurnalistler gatnaşdylar.
Saud Arabystany Patyşalygynyň Türkmenistandaky Adatdan daşary we Doly ygtyýarly ilçisi Abdul Aziz Ibrahim Al-Gadir we dabaranyň hormatly myhmany—Şazada Muhammed ben Saad ben Halid Al-Saud ýygnananlara gutlag sözleri bilen ýüzlendiler. Olar Onuň Alyhezreti, Saud Arabystanynyň Patyşasyna we Türkmenistanyň Prezidentine kitaby döretmekde goldaw berendikleri üçin tüýs ýürekden minnetdarlyk bildirdiler, şu günki bolup geçýän waka iki ýurduň arasynda dostlukly gatnaşyklary we netijeli hyzmatdaşlygy berkitmek hem ösdürmek işine hyzmat eder diýip nygtadylar. Dabarada çykyş eden Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow Türkmenistan bilen Saud Arabystanynyň halklaryny gadym wagtlardan bäri birleşdirýän dostluk we ruhy taýdan ýakynlyk däpleri täze taryhy eýýamda mynasyp dowamatyny tapdy diýip belledi. Munuň özi umumy eşretleriň hatyrasyna üstünlikli ösdürilýän döwletara gatnaşyklaryna hil taýdan täze itergi berýär we täze mazmun bilen onuň üstüni ýetirýär.
«Türkmenistan we Saud Arabystany: dostluk we hyzmatdaşlyk ýoly bilen» atly kitap Türkmenistanyň Daşary işler ministrligi we Saud Arabystany Patyşalygynyň Türkmenistandaky Ilçihanasy tarapyndan çapa taýýarlandy, türkmen, arap, iňlis we rus dillerinde neşir edildi. Onuň mazmuny neşiriň hemaýatkäri we howandarynyň — Şazada Muhammed ben Saad ben Halid Al-Saudyň okyjylara ýüzlenmesi bilen açylýar. Kitap üç bölümden ybaratdyr, olaryň birinjisi —Türkmenistanyň Prezidenti Gurbanguly Berdimuhamedowyň Beýik Galkynyş eýýamynda giň möçberli döwlet we reformatorçylyk işine bagyşlanypdyr. Ikinji bölüm — Saud Arabystany Patyşalygyna bagyşlanypdyr: onda Onuň Alyhezreti, Patyşa Abdulla ben Abdul Aziz Al-Saudyň terjimehalynyň maglumatlary we döwletiň taryhy hem häzirki zaman ösüşi barada jikme-jik gürrüň öz beýanyny tapypdyr. Türkmenistanyň Prezidenti Gurbanguly Berdimuhamedowyň ilkinji daşary ýurt saparynyň Saud Arabystanyna amala aşyrylandygyna aýratyn orun berlipdir. Kitabyň suratlar bilen oňat bezelendigini, Türkmen döwlet neşirýat gullugy tarapyndan neşir edilendigini aýdylanlaryň üstüne goşaýmak galýar.
Tanyşdyrylyş dabarasynyň çäklerinde Türkmenistanyň Prezidenti Gurbanguly Berdimuhamedowyň Saud Arabystanyna resmi sapary we bu dostlukly ýurt barada gürrüň berýän resminamalaýyn filmleriň görkezilişi boldy. Şeýle hem paýtagtymyzyň «Prezident» myhmanhanasynyň foýesinde tematiki surat sergisi ýaýbaňlandyryldy.