Türkmenistanyň Prezidenti ABŞ-nyň Türkmenistandaky Işleri wagtlaýyn ynanylan wekilini kabul etdi

Düýn Türkmenistanyň Prezidenti Gurbanguly Berdimuhamedow ABŞ-nyň Türkmenistandaky Işleri wagtlaýyn ynanylan wekili Riçard Houglendi kabul etdi. Ol Türkmenistanda diplomatik missiýasyny tamamlaýar.
Riçard Houglend duşuşmaga mümkinçilik döredendigi üçin minnetdarlyk bildirip, hormatly Prezidentimize we türkmen hökümetine öz işinde goldaw berendikleri üçin minnetdarlyk sözlerini aýtdy. Ol özüniň Türkmenistanda işlän ýyllarynyň bütin dowamynda bu goldawy duýup geldi. Ilçiniň belleýşi ýaly, Türkmenistan örän ajaýyp ýurtdur. Ol bu ýurda gaýdyp gelmäge hemişe şatdyr. Şunuň bilen baglylykda, diplomat düýn açylan ajaýyp suw çüwdürimleriniň monumental toplumynyň ýatdan çykmajak täsir galdyrandygyny belledi. Bu toplum Aşgabadyň gözel keşbine gözellik goşdy. Pursatdan peýdalanyp, Riçard Houglend Türkmenistanyň Prezidentini doglan güni bilen gutlady we berk jan saglyk, bagt hem-de döwlet durmuşynyň ähli ugurlarynda progressiw reformalary durmuşa geçirmekde üstünlikler arzuw etdi.
Söhbetdeşligiň barşynda döwlet Baştutany we myhman hyzmatdaşlygyň potensialy we geljegi jähtinden türkmen-amerikan gatnaşyklarynyň ençemesini ara alyp maslahatlaşdylar. Taraplar döwletara gatnaşyklaryň ýokary derejededigini kanagatlanmak bilen nygtap we onuň açyk, konstruktiw häsiýete eýedigini belläp, birek-birege hormat goýmak we deňlik ýörelgelerinde netijeli gatnaşyklary ösdürmäge taýýardyklaryny tassykladylar.
Hormatly Prezidentimiz Gurbanguly Berdimuhamedowyň nygtaýşy ýaly, Türkmenistan diňe bir ikitaraplaýyn formatda däl, eýsem abraýly halkara guramalarynyň, ilkinji nobatda, BMG-niň çäklerinde Amerikanyň Birleşen Ştatlary bilen hyzmatdaşlygy ösdürmäge uly ähmiýet berýär. Häzir türkmen-amerikan gatnaşyklary täze ösüşe eýe bolýar, munuň özi döwrüň, iň esasy-da taraplaryň erk-islegleri bilen şertlendirilendir diýip, döwlet Baştutany aýtdy. Şunuň bilen baglylykda söhbetdeşler ileri tutulýan ugurlaryň ençemesi boýunça, hususan-da, söwda-ykdysady ulgamynda, ýangyç-energetika sektorynda, oba hojalygynda we beýlekilerde netijeli hyzmatdaşlygy ösdürmegiň mümkinçilikleri barada pikir alyşdylar. Däbe öwrülen gumanitar hyzmatdaşlygy, şol sanda bilim, ylym we saglygy goraýyş ulgamlarynda gatnaşyklary berkitmek we giňeltmek meselelerine aýratyn üns berildi.
Duşuşygyň dowamynda özara gyzyklanma bildirilýän sebitleýin we halkara syýasatyň birnäçe meselelerine garaldy. Şu jähtden taraplar sebitleýin howpsuzlygy we durnuklylygy üpjün etmek, şol sanda neşe serişdeleriniň kontrabandasyna garşy durmak ugurlarynda hyzmatdaşlyga ygrarly bolup galýandyklaryny tassykladylar. Amerikaly diplomatyň nygtaýşy ýaly, ABŞ Bitarap Türkmenistanyň konstruktiw daşary syýasy ugruny we ylalaşdyryjylyk başlangyçlaryny goldaýar. Olar Türkmenistana halkara arenasynda uly abraý getirdi.
Hormatly Prezidentimiz Gurbanguly Berdimuhamedow we myhman hoşlaşan mahaly türkmen-amerikan gatnaşyklarynyň geljekde hem üstünlikli ösdüriljekdigine ynam bildirdiler. Türkmenistanyň Prezidenti ikitaraplaýyn hyzmatdaşlygy berkitmäge goşan goşandy üçin Riçard Houglende minnetdarlyk bildirip, diplomata geljekde hem uly üstünlikler arzuw etdi.